Israela vašálaččaid duopmu
1 Profehtasátni.
Hearrá sátni lea Hadraka eatnamis,
Damaskus dan ássansadji,
Arama čalbmegollášhan gullá Hearrái
nugo buot Israela čearddatge.
2 Nu lea maid dan ránnjáeatnamis
Hamatis,
velá Tyrosis ja Sidonisge,
vaikko dat leat viisát.
3 Tyros lea huksen suodjinis ladni,
čobmen silbba dego muoldda,
buhtis golli nugo gáhtaid durddi.
4 Muhto Hearrá váldá gávpoga
ja suhppe merrii dan muvrraid.
Dolla duššada dan oalát.
5 Aškelon oaidná dan ja gáfestuvvá,
Gaza doarggista balus,
nu maiddái Ekron,
dasgo dan doaivu duššá.
Gaza massá gonagasas,
Aškelon šaddá ávdimin,
6 Ašdodis ássá seahkeálbmot.
Mun, Hearrá, doaján filistalaččaid čeavlli.
7 Mun válddán varrabierggu sin njálmmis,
fastivuođaid sin bániid gaskkas.
Dat geat filistalaččain báhcet,
gullet min Ipmilii,
sii leat dego Juda sohka,
Ekrona olbmot dego jebuslaččat dolin.
8 Mun gáhtten iežan viesu
soahteveagaid vuostá
mat fallehit ja geassádit.
Ii goassege šat boađe oktage
áŧestit mu álbmoga,
dál mu čalmmit leat rahpasat.
Siona ráfigonagas
9 Čuorvvo ilus, nieida Sion,
ávvut sakka, nieida Jerusalem!
Geahča, du gonagas boahtá.
Son lea vanhurskkis ja buktá bestojumi,
son lea vuollegaš, son riide áseniin,
nuorra ásenoriin.
10 Son duššada soahtevovnnaid Efraimis
ja heasttaid Jerusalemis,
son doadjá soahtedávggiid.
Son gulaha álbmogiidda ráfi,
su váldi ollá mearas merrii,
Eufrata rájes gitta máilmmi ravddaid rádjái.
Hearrá bealušta álbmogis
11 Varralihtu fámuin
mun luoittán du fáŋggaid
čázihis arvegáivvos.
12 Máhccet ladnái, fáŋggat, dis lea doaivu!
Odne mun lohpidan:
Mun buhtten dutnje guovttegeardásaččat.
13 Mun lean gealdán Juda dávgin,
bidjan Efraima dasa njuollan.
Mun hásttán du bártniid, Sion,
Greikka bártniid vuostá
ja dagan du sáŋgára miehki láhkásažžan.
14 Hearrá almmustuvvá iežas álbmogii,
su njuolla girdá dego álddagas.
Hearrá Ipmil bosáda dorvve,
son manná ovdan lulliriđus.
15 Hearrá, Almmiveagaid Ipmil,
suodjala iežas álbmoga.
Su šleaŋgogeađggit duššadit vašálaččaid,
časket sin eatnamii.
Varra golgá dego viidni,
oaffarlihtit divvet,
áltára čiegat varahuvvet.
16 Dan beaivvi Hearrá Ipmil
gádju álbmogis,
dan beaivvi son čohkke sin
dego sávzaealu.
Sii šealgájit su eatnamis
dego divrras geađggit oaivečiŋas.
17 Man buorrin eanan šaddá,
man čáppahin!
Nuorra olbmát fávrrosmuvvet dan gortnis,
nuorra nieiddat dan viinnis.