Bibelsøk

Søk
Velg oversettelse
Hvor finner jeg...

Tilbake til oversikten

Goalmmát Mosesgirji

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

Forrige kapittelNeste kapittel

Israela jahkásaš basit
23Hearrá sártnui Mosesii:
   
 2 Cealkke israellaččaide: Dát leat Hearrá basit, mu basit maid galgabehtet gulahit bassi čoagganeapmin.
   
 3 Guhtta beaivvi vahkus oažžubehtet bargat, muhto čihččet beaivi lea sabbat, vuoiŋŋastanbeaivi bassi čoagganeami várás, ja dalle ehpet oaččo bargat maidege. Dat lea Hearrá sabbat, gos dal ásažehpetge.
   
 4 Dát leat Hearrá basit, bassi čoagganeamit maid galgabehtet doallat mearriduvvon áigái.  5 Vuosttaš mánu njealljenuppelogát beaivvi eahkedisveaiggis leat Hearrá beassážat,  6 ja seammá mánu vihttanuppelogát beaivvi leat Hearrá gudnin suvrutkeahtes láibbi basit. Čieža beaivvi dii oažžubehtet borrat dušše suvrutkeahtes láibbi.  7 Vuosttaš beaivvi galgabehtet doallat bassi čoagganeami; dan beaivvi ehpet oaččo bargat maidege.  8 Dán čieža beaivvis galgabehtet juohke beaivvi oaffaruššat dollaoaffara Hearrái, ja čihččet beaivvi lea bassi čoagganeapmi; dalle ehpet oaččo bargat maidege.
   
 9 Hearrá sártnui Mosesii:
   
10 Cealkke israellaččaide: Go dii boahtibehtet dan eatnamii maid mun attán didjiide, ja rádjabehtet doppe šattuid, de galgabehtet doalvut báhppii vuosttaš gordnegihpu iežadet šattus. 11 Beaivvi maŋŋil sabbaha báhppa galgá bajidit gordnegihpu Hearrá muođuid ovdii, vai Hearrá dohkkehivččii din. 12 Seammá beaivvi go gordnegihppu bajiduvvo, de galgabehtet oaffaruššat boaldinoaffarin Hearrái jahkásaš lábbá mii lea almmá vigi haga. 13 Borramušoaffaris mii dasa gullá galget leat guokte efalogádasa sevlejuvvon jáffut mat leat seaguhuvvon oljjuin. Dat lea dollaoaffar man hádja lea Hearrá miela mielde. Juhkamušoaffar mii dasa gullá galgá leat hin-njealjádasa veardde viidni. 14 Muhto láibbi ja gordojuvvon gortniid ja varas gortniid ehpet oaččo borrat ovdal dan beaivvi go buktibehtet oaffarattáldaga Ipmilasadet. Dát lea agálaš láhka didjiide buolvvas bulvii, gos dal ásažehpetge.
   
15 Dii galgabehtet diktit gollat čieža olles vahku dan beaivvi rájes mii lea sabbaha maŋŋil, dan beaivvi rájes go buvttiidet gordnegihpu mii bajiduvvui oaffarin. 16 Dii galgabehtet lohkat vihttalogi beaivvi dan beaivvi rádjái mii boahtá čihččet sabbaha maŋŋil; dalle galgabehtet buktit Hearrái borramušoaffara ođđa šattus. 17 Galgabehtet dalle iešguhtege buktit ruovttus guokte láibbi maid bajidehpet oaffarin. Láibbiide galgá atnit guokte efalogádasa sevlejuvvon jáffuid, ja dat galget láibojuvvot suvrradáiggis. Dat leat álgošaddoattáldat Hearrái. 18 Earret láibbi dii galgabehtet buktit čieža jahkásaš lábbá mat leat almmá vigi haga, nuorra vuovssá ja guokte viercca. Dat galget oaffaruššojuvvot Hearrái dollaoaffarin oktan borramušoaffariin ja juhkamušoaffariin mat dasa gullet. Dat lea dollaoaffar man hádja lea Hearrá miela mielde. 19 Dasto galgabehtet oaffaruššat bohká suddooaffarin ja guokte jahkásaš lábbá searvevuođaoaffarin. 20 Báhppa galgá bajidit daid oaffarin Hearrá muođuid ovdii oktan álgošattu vuosttaš láibbiiguin ja guvttiin lábbáin. Dat leat basuhuvvon Hearrái ja gullet báhppii. 21 Seammá beaivái dii galgabehtet gulahit bassi čoagganeami. Dat lea bassi, dalle ehpet oaččo bargat maidege. Dát galgá leat didjiide agálaš láhka buolvvas bulvii, gos dal ásažehpetge.
   
22 Go šaddu ráddjojuvvo du eatnamis, de it oaččo čuohppat gortni gitta bealdoravddaid ráje itge čoaggit gordneoivviid mat leat báhcán. Guođe daid gefiid ja vierrásiid várás. Mun lean Hearrá, din Ipmil.
   
23 Hearrá sártnui Mosesii:
   
24 Cealkke israellaččaide: Čihččet mánu vuosttaš beaivvi galgabehtet doallat vuoiŋŋastanbeaivin, muitobeaivin goas bossubehtet dorvve ja čoagganehpet bassi čoagganeapmái. 25 Dalle ehpet oaččo bargat maidege, muhto galgabehtet oaffaruššat Hearrái dollaoaffara.
   
26 Hearrá sártnui Mosesii:
   
27 Seammá čihččet mánu logát beaivvi lea soabahusbeaivi. Dalle galgabehtet doallat bassi čoagganeami, fástudit ja oaffaruššat Hearrái dollaoaffara. 28 Dan beaivvi ehpet oaččo bargat maidege, danin go dat lea soabahusbeaivi mii buktá soabahusa didjiide Hearrá, muođuid ovddas. 29 Jos muhtin ii fástut dan beaivvi, de son galgá jávkaduvvot álbmogisttis. 30 Ja juohkehačča gii dan beaivvi bargá maidege, mun duššadan eret su álbmogis. 31 Dii ehpet oaččo bargat maidege. Dát galgá leat didjiide agálaš láhka buolvvas bulvii, gos dal ásažehpetge. 32 Dat lea didjiide sabbahiid sabbat, dakkár sabbat goas galgabehtet fástudit. Dán mánu ovccát beaivvi eahkeda rájes maŋit eahkedii galgabehtet doallat sabbatvuoiŋŋasteami.
   
33 Hearrá sártnui Mosesii:
   
34 Cealkke israellaččaide: Seammá čihččet mánu vihttanuppelogát beaivvi álget čiežabeaivásaš Hearrá lastagoahtebasit. 35 Vuosttaš beaivvi lea bassi čoagganeapmi, dalle ehpet oaččo bargat maidege. 36 Čieža beaivvi galgabehtet oaffaruššat Hearrái dollaoaffariid; gávccát beaivvi galgabehtet doallat bassi čoagganeami ja oaffaruššat Hearrái dollaoaffara. Dalle lea bassi čoagganeapmi ehpetge dii oaččo bargat maidege.
   
37 Dát leat Hearrá basit maid galgabehtet gulahit bassi čoagganeapmin. Dalle galgabehtet oaffaruššat Hearrái dollaoaffariid ja boaldinoaffariid, borramušoaffariid, njuovvanoaffariid ja juhkamušoaffariid, juohke beaivvi dat oaffar mii lea mearriduvvon. 38 Dáidda lassin bohtet vel Hearrá sabbahat ja din attáldagat, buot din lohpádusoaffarat ja buot eaktodáhtolaš oaffarat maid addibehtet Hearrái.
   
39 Čihččet mánu vihttanuppelogát beaivvi, go lehpet rádjan eatnama šattuid, de galgabehtet ávvudit čiežabeaivásaš Hearrá basiid. Vuosttaš beaivi lea sabbat ja gávccát beaivi lea maid sabbat. 40 Vuosttaš beaivvi galgabehtet váldit čábbámus muoraid šaddosiid, pálbmalasttaid, lastás ovssiid ja sieđgaovssiid ja ávvudit čieža beaivvi Hearrá, Ipmileattet, muođuid ovddas. 41 Dii galgabehtet ávvudit daid Hearrá bassin čieža beaivvi juohke jagi. Dat galgá leat didjiide agálaš láhka buolvvas bulvii. Čihččet mánus dii galgabehtet ávvudit daid basiid. 42 Dalle dii galgabehtet orrut čieža beaivvi lastagođiin. Buot eatnamis riegádan israellaččat galget orrut lastagođiin, 43 vai din mánát dieđášedje ahte mun dikten israellaččaid orrut lastagođiin, go bukten sin Egyptas. Mun lean Hearrá, din Ipmil.
   
44 Ná Moses almmuhii israellaččaide Hearrá basiid.
Note guokte efalogádasa: efa dahje dovdameahttun mihttu. \fq hin-njealjádasa: sullii 1,5 lihttera.
Forrige kapittelNeste kapittel

14. mai 2021

Dagens Bibelord

Markus 16,19–20

Les i nettbibelen

19Etter at Herren Jesus hadde sagt dette til dei, vart han teken opp til himmelen og sette seg ved Guds høgre hand. 20Men dei gjekk ut og forkynte alle stader. Herren sjølv var hos dei og stadfeste Ordet med dei teikna som følgde med.•

19Etter at Herren Jesus hadde sagt dette til dei, vart han teken opp til himmelen og sette seg ved Guds høgre hand. 20Men dei gjekk ut og forkynte alle stader. Herren sjølv var hos dei og stadfeste Ordet med dei teikna som følgde med.•