Bibelsøk

Søk
Velg oversettelse
Hvor finner jeg...

Tilbake til oversikten

Vuosttaš Samuelgirji

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

Forrige kapittelNeste kapittel

Saul boahtá Samuela lusa
9Benjamina čearddas lei rikkis ja fámolaš olmmái gean namma lei Kiš. Su áhčči lei Abiel, Serora bárdni. Serora áhčči lei Bekorat, ja su áhčči benjaminlaš Afiah.  2 Kišis lei bárdni gean namma lei Saul. Son lei nuorra ja ebmos olmmái, Israelis ii lean ebmot olmmái go Saul. Son lei oaivvi guhkit go buot earát.
   
 3 Oktii Saula áhči Kiša ásendámmát láhppojedje. Kiš dajai bárdnásis Saulii: “Váldde bálvvá mielddát ja vuolgge ohcat ásendámmáid.”  4 Dat guovttos manaiga Efraima várreeatnama čađa ja Šališa eatnama čađa, muhto eaba gávdnan áseniid. Soai manaiga maid Šaalima eatnama čađa, muhto eai ásenat lean doppege. De soai manaiga Benjamina eatnama čađa, muhto eaba gávdnan áseniid.  5 Go soai leigga boahtán Sufa eatnamii, de Saul dajai bálvái gii sus lei mielde: “Vuolgu ruoktot, muđui áhčči balahišgoahtá munno eambbo go ásendámmáid.”  6 Muhto bálvá dajai: “Don gávpogis ássá beakkán Ipmila olmmái. Buot maid son einnosta, dáhpáhuvvá. Vuolgu dohko, son máhttá muitalit gosa moai galge mannat.”  7 Saul dajai bálvái: “Muhto jos moai manne dohko, de mii munnos lea addit sutnje? Dasgo láibi lea nohkan munno lávkkain, iige munnos leat mihkkege eará maid addit Ipmila olbmái. Mii munnos livččii?”  8 Muhto bálvá dajai Saulii: “Mus lea silbašekelnjealjádas. Dan mun attán Ipmila olbmái, ja de son muitala gosa moai galge mannat.”  9 Go israellaččat dovle bivde rávvaga Ipmilis, de sii dadje: “Bohtet, vulgot oaidni lusa!” Dat gii dál gohčoduvvo profehtan, gohčoduvvui dovle oaidnin. 10 Saul dajai bálvái: “Buorre, nu maid dahke.” De soai manaiga gávpogii gos Ipmila olmmái lei.
   
11 Go soai leigga goargŋumin luohká gávpogii, de soai deaivvaiga muhtun nieiddaid geat ledje boahtimin viežžat čázi. Soai jearaiga sis: “Leago oaidni dáppe?” 12 Nieiddat vástidedje: “De lea, son lea dáppe. Muhto doabmi! Son lea aiddo boahtán deike, danin go álbmogis lea odne oaffarfeastta dievás. 13 Go mannabeahtti gávpogii, de deaivabeahtti su ovdal go son manná mállásiidda oaffarbáikái. Olbmot eai boradišgoađe ovdal go son lea boahtán ja buressivdnidan oaffara. Easkka das maŋŋil guossit boradišgohtet. Manni dállánaga, aiddo dál doai sáhttibeahtti deaivat su.” 14 Soai vulggiiga gávpogii, ja seammás go soai olliiga dohko, de Samuel gii lei mannamin oaffarbáikái, bođii sudno ovddal.
   
15 Beaivvi ovdal go Saul bođii, de Hearrá lei almmuhan dan Samuelii ja cealkán: 16 “Ihttin dán muttos beaivvi mun vuolggahan du lusa muhtin benjaminlaš olbmá. Don galggat vuoidat su mu álbmoga Israela oaivámužžan. Son beastá mu álbmoga filistalaččaid gieđas, danin go mun lean oaidnán iežan álbmoga heađi ja gullan dan bárguma.”
   
17 Go Samuel oinnii Saula, de Hearrá celkkii sutnje: “Die lea dat olmmái gean mun oaivvildin. Son oažžu ráđđet mu álbmoga.” 18 Saul manai Samuela lusa portii ja dajai: “Muital munnje gos oaidni ássá.” 19 Samuel vástidii: “Mun lean oaidni. Mana mu ovddas oaffarbáikái, de oažžubeahtti odne boradit muinna. Ihttin árrat don beasat vuolgit, ja dalle mun muitalan dutnje maid dáhtut diehtit. 20 Ale balat ásendámmáid mat láhppojedje dus golbma beaivvi dás ovdal; dat leat gávdnon. Almma buot mii lea sávvanveara Israelis, gártá dutnje ja du sohkii?” 21 Muhto Saul dajai: “Munhan gulan Benjamina čerdii mii lea uhcimus Israela čearddain, ja mu sohka lea heajumus Benjamina čearddas. Manin don dalle sártnut munnje nu?”
   
22 Samuel doalvvui Saula ja su bálvvá vissui ja bijai sudno čohkkát boaššumussii gussiid gaskii. Das ledje sullii golbmalogi olbmá. 23 Samuel dajai málesteaddjái: “Buvtte dál dan bierggu maid mun adden dutnje ja gohččon bidjat sierranassii.” 24 Málesteaddji válddii čoarbbeali ja biehčama ja bijai daid Saula ovdii. Samuel dajai: “Geahča, maid mun ledjen bidjan sierranassii. De bora! Dat biddjojuvvui sierranassii dutnje dán feastta várás.” Nu Saul boradii Samueliin dan beaivvi. 25 Dasto soai máhcaiga oaffarbáikkis gávpogii. Saulii láhče oađđinsaji dáhki ala, 26 ja son veallánii nohkkat. Go iđedisguovssu badjánii, de Samuel čurvii Saulii dáhki ala: “Lihka! Mun mieđuštan du mátkái.” Saul lihkai, ja soai manaiga ovttas olggos. 27 Go soai leigga ollen gávpotravdii, de Samuel dajai Saulii: “Gohčo bálvvá mannat munno ovdal.” Go bálvá lei mannan, de Samuel dajai: “Orus oanehassii, de mun muitalan dutnje maid Ipmil lea cealkán.”
Note silbašekelnjealjádas: sullii 2,8 grámma.
Forrige kapittelNeste kapittel

12. april 2021

Dagens Bibelord

1. Peter 5,1–4

Les i nettbibelen

1De eldste blant dere ber jeg inntrengende, jeg som selv er en eldste og et vitne om Kristi lidelser og har del i herligheten som skal åpenbares: ... Vis hele teksten

1De eldste blant dere ber jeg inntrengende, jeg som selv er en eldste og et vitne om Kristi lidelser og har del i herligheten som skal åpenbares: 2Vær hyrder for den Guds flokk som dere har hos dere! Ha tilsyn med den, ikke av tvang, men av fri vilje, slik Gud vil, og ikke for vinnings skyld, men av hjertet. 3Gjør dere ikke til herrer over dem som Gud har gitt dere ansvar for, men vær et forbilde for flokken. 4Når den øverste hyrden åpenbarer seg, skal dere få herlighetens seierskrans som aldri visner.