Bibelsøk

Søk
Velg oversettelse
Hvor finner jeg...

Tilbake til oversikten

Brevet til hebrearane

Kapittel 12
1 2 3 4 5 6 7 8 9 10 11 12 13

Forrige kapittelNeste kapittel

Trua sin opphavsmann og fullendar
12Difor, når vi har så stor ei sky av vitne kring oss, så lat oss leggja av alt som tyngjer, og synda som heng så fast ved oss, og halda ut i det løpet som ligg framfor oss,  2 med blikket fest på Jesus, trua sin opphavsmann og fullendar. For å få den gleda som venta, heldt han ut på krossen utan å bry seg om skamma, og han har sett seg på høgre sida av Guds kongsstol.  3 Ja, tenk på han som heldt ut ein slik motstand frå syndarar, så de ikkje trøytnar og blir motlause.
Gud oppdreg oss
 4 I striden mot synda har de enno ikkje gjort slik motstand at det har kosta blod.  5 Har de gløymt den formaninga som talar til dykk som til born:
           Son min, forakt det ikkje når Herren viser deg til rette,
           mist ikkje motet når han refsar.
          
   
 6  For den Herren elskar, viser han til rette,
           og han straffar kvar son han tek seg av.
 7 Hald ut og lat dykk oppdra, for Gud tek seg av dykk som søner. Ja, lat meg få sjå ein son som faren ikkje viser til rette!  8 Blir de ikkje viste til rette som alle andre, då er de ikkje søner, men uekte born.  9 Vi har hatt våre jordiske fedrar som oppdrog oss, og vi hadde respekt for dei. Skal vi ikkje mykje heller bøya oss under Far til åndene, så vi kan leva? 10 For fedrane viste oss til rette berre ei kort tid og slik dei sjølve syntest var best, men han gjer det til vårt beste, så vi skal bli heilage som han. 11 All irettesetjing synest nok å vera meir til sorg enn til glede medan ho står på. Men sidan gjev ho att fred og rettferd som frukt hos dei som slik har vorte oppøvde.
          
   
12  Difor, styrk dei hangande hender
           og dei skjelvande kne!
          
   
13  Lat føtene gå på beine vegar,
så det halte ikkje blir vridd ut av ledd, men heller blir lækt.
   
14 Jag etter fred med alle, og etter helging, for utan helging skal ingen sjå Herren. 15 Sjå til at ikkje nokon går bort frå Guds nåde! Lat inga beisk rot få veksa opp og gjera skade så mange blir forgifta. 16 Sjå til at ingen driv hor eller lever gudlaust som Esau, han som selde førstefødselsretten sin for eit einaste måltid mat. 17 De veit at han sidan vart bortvist då han ønskte å få velsigninga. Det var ikkje mogleg å venda om, endå han bad med tårer.
Sinai og Sion
18 De er ikkje komne til eit fjell de kan ta og kjenna på, ikkje til logande eld, til skyer, mørker og storm, 19 ikkje til gjallande horn og ei røyst som tala slik at dei som høyrde på, bad om å bli sparte for å høyra meir. 20 For dei kunne ikkje tola det påbodet som vart gjeve: Om så eit dyr rører ved fjellet, skal det steinast. 21 Ja, så skremmande var synet at Moses sa: « Eg er så redd at eg skjelv.» 22 Nei, de er komne til Sion-fjellet, til den levande Guds by, det himmelske Jerusalem, til dei mange tusen englar, til ei høgtidsfeiring, 23 til forsamlinga av dei førstefødde som er oppskrivne i himmelen. De er komne til ein dommar som er Gud for alle, til åndene åt dei rettferdige som har nådd fullendinga, 24 til Jesus, mellommannen for ei ny pakt, og til reinsingsblodet som talar sterkare enn Abels blod.
   
25 Sjå til at de ikkje viser frå dykk han som talar! Dei som viste frå seg han som tala guddomsord her på jorda, kom ikkje unna. Endå mindre skal vi koma unna om vi vender oss bort frå han som talar frå himmelen. 26 Den gongen fekk røysta hans jorda til å skjelva. Men no har han lova: Endå ein gong vil eg rista ikkje berre jorda, men himmelen med. 27 Her står det: «endå ein gong». Dette viser at det som kan rokkast fordi det er skapt, skal skiftast ut, så det som ikkje kan rokkast, skal bli ståande. 28 Sidan vi får eit urokkeleg rike, så lat oss vera takksame og slik tena Gud med gudsfrykt og ærefrykt, til glede for Gud. 29 For vår Gud er ein fortærande eld.
Hebr 12,5 viser til Ordt 3,11f
Note : viser … til rette: kan òg omsetjast «oppdreg», jf. v. 7.9.
Hebr 12,22 viser til Gal 4,26, Op 14,1, Op 21,2
Note : Sion-fjellet: tempelhøgda i Jerusalem. Jf. 2 Sam 5,6ff; Sal 48.
Forrige kapittelNeste kapittel

Dagens Bibelord

Kolossarane 1,9–14

Les i nettbibelen

9Heilt frå den dagen vi fekk høyra om dette, har vi ikkje halde opp med å be for dykk. Og det er vår bøn at de må bli fylte med kunnskap om Guds vilje og få all den visdom og innsikt som Anden gjev, ... Vis hele teksten

9Heilt frå den dagen vi fekk høyra om dette, har vi ikkje halde opp med å be for dykk. Og det er vår bøn at de må bli fylte med kunnskap om Guds vilje og få all den visdom og innsikt som Anden gjev, 10så de kan leva eit liv som er Herren verdig, og vera heilt og fullt til glede for han, bera frukt i all god gjerning og stadig veksa i kjennskap til Gud. 11De skal styrkjast av krafta frå hans herlegdom, så de alltid er uthaldande og tolmodige. Og med glede 12skal de takka Far, som gjorde dykk i stand til å få del i den arven dei heilage får i lyset. 13For han har fria oss ut frå mørkrets makt og ført oss over i riket til Sonen, som han elskar. 14I han er vi frikjøpte og har fått tilgjeving for syndene.