Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Babela doardna
Olbmot lassánišgohte eatnamii.
Buohkat sárdno seamma giela,
ja buohkat ipmirdedje guđet guimmiideaset.
Sii vánddardedje, gávdne leagi ja ásse dohko.
«Gullet mat dál, mii dahkat diilageđggiid ja boaldit daid garasin,
vai beassat hukset,» dadje sii guhtet guoibmáseaset.
Sii boaldigohte diilageđggiid bivastatgálluid,
ja firre eananbihka dassážii go gieđat dorggiidedje,
ovdalgo borde geđggiid badjálaga
ja bidje eananbihka gaski amaset luovvanatta.
Ja dađistaga ceagganedje viesut.
Dat šadde stuorábut ja stuorábut,
eanet ja eanet,
čábbábun ja ebmobun ja alibun.
«Huksejehkot eambbo,» dadje olbmot,
«doartna mii ollá albmái!»
Dalle gulustuvvo min birra buohkaide,
ja mii šaddat Ipmila láhkásažžan.»
Buohkat bargagohte, ja doardna stuorui,
diilageađgi diilageađggi ala, eananbihkka gaskkas.
Ii mihkkege sáhttán sin bissehit.
De njiejai Ipmil vulos olbmuid lusa.
Son oinnii doartna ja dajai:
«Máid sii barget?
Guđe ládje atnet sii dan eallima maid mun lean sidjiide addán?»
Ipmil oinnii ahte dat ii lean buorre olbmuide,
ja oinnii ahte ii sis lean dáhttu dan bissehit.
Ipmil oinnii ahte fápmu billistii olbmuid.
Dalle Ipmil moivašuhtii sin vai bissehivččii sin daguid.
Son bijai iešguđet gielaid sin njálbmái,
ja sii eai šat máhttán gulahallat.
Olbmot huikigohte guhtet guoibmáseaset,
muhto das šattai dušše rigearra.
Sii eai šat sáhttán gárvvistit doartna,
go buot maid háliidedje dahkat seahkánii allajienat šuddideapmái.
De sirdájedje olbmot Babel gávpogis eret.
Ja buot joavkkut atne iežaset giela
ja lávde miehtá máilmmi.
Loga muitalusa Biibbalis
1Oppa eatnamis sárdno ovtta giela ja geavahedje seammá sániid. 2Go olbmot vulge nuorttas, de sii gávdne Sineara eatnamis leagi ja ásse dohko. 3Sii dadje guhtet guoibmáseaset: “Dahkkot diilageđggiid ja boldot daid garasin.” Sii atne diillaid huksengeađgin ja eananbihka muvremii. 4Sii dadje guhtet guoibmáseaset: “Huksejehkot alcceseamet gávpoga ja toartna mii ollá albmái. Nu mii dahkat alcceseamet nama, amamet bieđganit miehtá eatnama.” 5De Hearrá njiejai geahččat gávpoga ja toartna maid olbmot ledje huksemin. 6Hearrá celkkii: “Sii leat okta álbmot, ja sis buohkain lea oktahat giella. Dát lea dušše álgu. Dál sidjiide ii leat veadjemeahttun mihkkege maid sii áigot dahkat. 7Njidjot ja moivašuhttot sin giela, vai nubbi ii gula nuppi sárdnuma.” 8Ja nu Hearrá biđgii sin miehtá eatnama, ja sii heite huksemis gávpoga. 9Gávpot gohčoduvvui Babelin, dasgo doppe Hearrá moivašuhtii oppa eatnama giela, ja doppe Hearrá biđgii sin miehtá eatnama.