Olmmoš gilvvagárddis

Ipmil lei sivdnidan almmi ja eatnama.
Son lei sivdnidan gilvvagárddi olbmuide
gos olmmái ja nisson vádjoleigga fárrolaga.
Soai leigga álás, muhto eaba heahpanaddan.

«Moai sáhtte borrat buot muorain dáppe», dajai olmmái,
«earret muoras mii lea gasku gilvvagárdi,
dat mii addá dieđu buoris ja bahás.»

Nisu váruhii mannamis muora lahka.
Muhto de bođii gearpmaš, mii lei gávvileamos buot meahcceelliin.
Dat dajai nissonii: «Lea go Ipmil duođaid cealkán dan
ahte doai eahppi oaččo borrat ovttage muoras gilvvagárddis?»

«I-i», dajai nisu, «moai sáhtte borrat vaikko makkár muoras,
earretgo ovtta muoras.
Ipmil lea dadjan ahte jus moai das borre,
de moai jápme.»

Dalle gearpmaš dajai nissonii:
«Eahppi eisege jáme!
Dan beaivve go borrabeahtti dan muoras,
de dudno čalmmit rahpasit,
ja doai šaddabeahtti Ipmila láhkásažžan!
De dovdabeahtti buori ja bahá.»

Nisson geahčai dárkilit murrii.
Šaddu orui hui njálggat.
De son njulgii gieđa ja válddii šattu,
borai, ja attii dan olbmái
gii lei čuožžume su bálddas,
ja son nai borai.

Dalle soai fuobmáiga ahte leigga álás,
ja soai heahpaneigga.
Soai govččaiga álásvuođaska ja čiehkádeigga
go gulaige Ipmila vázzime gilvvagárddis.

Ipmil čuorvvui olbmái: «Gos don leat?»
«Dáppe», dajai olmmái ja bođii su lusa.
«Mun čiehkadin dasgo ledjen álás.»
«Gii dutnje muitalii ahte leat álás?
Leatgo don borran dan muoras mas mun gilden du borramis?»
jearai Ipmil olmmáiolbmás.
«Dat ii lean mun,» dajai olmmái, «dat lei nisson gii fillii mu!»
«Gearpmaš dájuhii mu», dajai nisu.
De Ipmil celkkii gearbmašii: «Don leat garuhuvvon!»
Nissonii son celkkii: «Don galggat bákčasiiguinriegádahttit mánáidat.»
Ja olbmái son celkkii: «Don galggat rahčat biepmuovddas.
Ja jápmin lea boahtán sivdnádussii.»
Ipmil hábmii gárvvuid náhkis ja gárvvuhii daid sudnuide.
Dalle son ájii sudno olggos gilvvagárddis
ja bijai sudno bargat eatnamiin.

Loga muitalusa Biibbalis

1Gearpmaš lei gávvileamos buot meahcielliin maid Hearrá Ipmil lei dahkan. Dat jearai nissonis: “Leago Ipmil duođaid cealkán ahte doai eahppi oaččo borrat ovttage muoras gilvvagárddis?” 2Nisson vástidii gearbmašii: “Gal moai ožžo borrat gilvvagárddi muoraid šaddosiid. 3Dušše dan muora hárrái mii šaddá gasku gilvvagárddi, Ipmil lea cealkán: Alli bora dan šaddosiid allige guoskka dasa, amade jápmit.” 4Dalle gearpmaš dajai nissonii: “Eahppi eisege jáme. 5Muhto Ipmil diehtá ahte dan beaivvi go doai borrabeahtti das, de dudno čalmmit rahpasit ja doai šaddabeahtti Ipmila láhkásažžan, nu ahte diehtibeahtti buori ja bahá.” 6Nisson oinnii dál ahte muora šaddosat ledje buorit borrat ja ahte dat lei čáppat geahčadit ja geasuheaddji, danne go dat attii jierpmi. Son válddii das šaddosa ja borai ja attii maid boadnjásis gii lei suinna, ja sonnai borai. 7Dalle rahpasedje sudno čalmmit, ja soai fuobmáiga ahte leigga álás. Soai njađiiga oktii fiikonlasttaid ja giesaiga daid alimiid birra. 8Eahkedis go lei gáludan, de soai gulaiga Hearrá Ipmila váccašeamen gilvvagárddis. Dalle olmmái ja su áhkká čiehkádeigga Hearrá Ipmilis gilvvagárddi muoraid gaskii. 9Muhto Hearrá Ipmil rávkkai olbmá ja jearai: “Gos don leat?” 10Olmmái vástidii: “Mun gullen du lávkkiid gilvvagárddis ja ballagohten, dasgo mun lean álás, ja danne mun čiehkádin.” 11Hearrá Ipmil jearai: “Gii dutnje muitalii ahte leat álás? Leatgo don borran dan muoras mas mun gilden du borramis?” 12Olmmái vástidii: “Nisson gean don addet munnje guoibmin, attii munnje dan muora šaddosa, ja mun borren.” 13Dalle Hearrá Ipmil celkkii nissonii: “Maid don leat dahkan!” Nisson vástidii: “Gearpmaš fillii mu, ja mun borren.” 14De Hearrá Ipmil celkkii gearbmašii: “Danne go dahket dán, de don leat garuhuvvon, áddjojuvvon eret buot šibihiid ja fuođđuid luhtte. Čoavjját alde don galggat njoammut, ja muoldda borrat buot beivviidat. 15Mun bijan vaši du ja nissona gaskii, du náli ja su náli gaskii: Dat cuvke du oaivvi, muhto don čuolastat su šušmái.” 16Nissonii son celkkii: “Garasin mun dagan du áhpehisvuođa váivviid, ja bákčasiiguin don galggat riegádahttit mánáidat. Boadnjásat galgá leat du hállu, ja son galgá ráđđet du.” 17Ja olbmái son celkkii: “Danne go guldalit áhkát ja borret dan muoras mas mun gilden du borramis, de eanan galgá leat garuhuvvon du dihte. Váivválaš rahčamiin don šattat háhkat das eallámuša nu guhká go ealát. 18Eanan šaddada dutnje bastilislánjáid ja gáskálasaid, ja don šattat borrat eatnama šattuid. 19Bivastatgálluid don galggat borrat láibbát dassážii go fas máhcat eatnamii, dasgo das don leat váldojuvvon. Muolda don leat, ja muoldan don fas šattat.” 20Adam bijai áhkkásis namman Eva, dasgo son šattai buot olbmuid eadnin. 21Hearrá Ipmil dagai Adamii ja su áhkkái gárvvuid náhkis ja gárvvuhii daid sudnuide. 22Hearrá Ipmil celkkii: “Olmmoš lea dál šaddan min láhkásažžan, son diehtá sihke buori ja bahá. Go son dal ii geigeše gieđa ja válddáše šaddosa eallima muoras ja boraše ja ealáše agálaččat!” 23Ja Hearrá Ipmil ájii olbmo Edena gilvvagárddis ja bijai su bargat eatnama, mas son lei váldojuvvon. 24Son ájii olbmo eret ja bijai Edena gilvvagárddi nuorttabeallái kerubaid ja álddagasti miehki fáktet geainnu eallima muora lusa.

Les i nettbibelen