Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Mánná ja niesti
Jesus vulggii máhttájeddjiidisguin fatnasiin
nuppe beallái Galileajávrri.
Sii manne gáddái muhtin sajis vai besse leat muosis sierra,
ja manne dasto várrevieltti bajás
gos lei várddus oaidnit meara.
Muhto olu olbmot čuvvo sin,
dannego sii ledje oaidnán ahte Jesus lei buoridan buohcci olbmuid.
Veadjimis sávve sii beassat oaidnit eanet oavdudaguid.
Olles beaivi golai.
Olbmot maŋemus nealgugohte.
Muhto ii oktage háliidan vuolgit das eret.
Jesus siđai máhttájeddjiid addit sidjiide borrat,
muhto máhttájeaddjit vástidedje ahte sii eai sáhttán dan dahkat,
go ledje ilá olu olbmot.
Dattege dajai okta: «Dáppe lea okta mánná geas lea niesti.
Sus leat vihtta láibbi ja guokte guoli.
Muhto mii dat lea ná ollugiidda?»
«Gohččot olbmuid čohkkedit», celkkii Jesus.
Ja de son smávvii láibbiid ja guliid,
giittii Ipmila ja juogadii daid máhttájeddjiide.
Máhttájeaddjit juhke biepmu viidáseappot
ja biebmu ii nohkan!
Dat baicce lassánii juogadettiin.
Dat lei dego niehku.
Vihtta duhát nelgon dievdoolbmo gallánedje dan beaivvi,
ja dasa lassin vel nissonat ja mánát geat eai lean lohkkojuvvon.
Máhttájeaddjit čogge báhcán biepmuid
ja devde daiguin guoktenuppelohkái veaddelihti.
Olbmot čurvo, ja imaštalle mii son dál lei dáhpáhuvvan.
Lei go dološáiggi profehta fas boahtán ruovttoluotta,
son gii jugii olbmuide láibbi meahcis?
Dalle vulggii Jesus sin luhtte eret,
son manai čoruid badjel várrái,
dohko gos sáhtii oaidnit meara bures.
Son lei akto.
Olbmot gohčodedje maid Mosesa profehtan,
son adnojuvvui leamen dat vuosttaš stuora profehta.
Ipmil lei lohpidan ahte maŋemus áiggiid áiggui son fas sáddet dakkár
profehta go Moses lei.
Loga muitalusa Biibbalis
1Das maŋŋil Jesus vulggii Galileajávrri dahjege Tiberiasjávrri nuppi beallái. 2Ollu olbmot čuvvo su, danne go sii oidne mearkkaid maid son dagai go buoridii buhcciid. 3Jesus manai várrái ja čohkánii dohko máhttájeddjiidisguin. 4Beassážat, juvddálaččaid basit, ledje lahka. 5Go Jesus geahčastii, de son oinnii ollu olbmuid boahtimin lusas. Son celkkii Filipii: “Gos mii sáhttit oastit láibbi, vai buot dát ožžot borrat?” 6Dan son celkkii vai beassá geahččalit Filipa, dasgo son gal diđii maid áiggui dahkat. 7Filip vástidii: “Ii guovttečuođi denáriige fidne dan mađe láibbi ahte juohkehažžii livččii bihtášge.” 8Dalle nubbi máhttájeaddji, Simon Petera viellja Andreas, dajai sutnje: 9“Dáppe lea mánná geas leat vihtta bivgeláibbi ja guokte guoli. Muhto mii dat lea ná ollugiidda?” 10Jesus celkkii: “Gohččot olbmuid čohkánit.” Das lei rássás báiki, ja olbmot čohkánedje. Das ledje birrasii vihttaduhát olbmá. 11Jesus válddii láibbiid, giittii Ipmila ja juogadii láibbiid daidda geat ledje čohkkámin das. Seammá ládje son juogadii guliid, ja buohkat ožžo nu ollu go dáhtto. 12Go buohkat ledje gallánan, de Jesus celkkii máhttájeddjiidasas: “Čogget báhcán bihtáid, vai ii mihkkege fearranuša.” 13Sii dahke nu, ja viđa bivgeláibbis čoggojedje vel guoktenuppelohkái veaddelihti dievva bihtát mat ledje báhcán go buohkat ledje geargan boradeames. 14Go olbmot oidne mearkka maid Jesus dagai, de sii dadje: “Dát lea duođaid dat profehta gii galggai boahtit máilbmái.” 15Jesus diđii ahte sii áigo boahtit ja veagal dahkat su gonagassan. Danne son vulggii sin luhtte ja manai várrái. Son manai dohko okto.
15Hearrá, du Ipmil, čuoččáldahttá vieljaidat gaskkas profehta, mu láhkásačča. Su dii galgabehtet guldalit.
21Sii jerre: “Gii don dalle leat? Leatgo don Elia?” Son vástidii: “In leat.” Sii jerre: “Leatgo don dat lohpiduvvon profehta?” Son vástidii: “In leat.”
22Moses lea cealkán: Hearrá, din Ipmil, čuoččáldahttá vieljaideattet gaskkas profehta, mu láhkásačča. Gullet su ja dahket buot maid son dadjá didjiide.