31Go sii ledje bilkidan su oalle botta, de sii nulle sus oalgebiktasa, gárvvuhedje sutnje su iežas biktasiid ja vulge doalvut su russiinávlejuvvot. 32Dohko manadettiin sii deive Simon-nammasaš kyrenelaš olbmá ja bággejedje su guoddit Jesusa ruossa. 33Go sii bohte báikái mii gohčoduvvo Golgatan, Oaiveskálžobáikin, 34de sii fálle Jesusii viinni masa lei seaguhuvvon sáhppi. Go son máisttii dan, de son ii dáhtton juhkat. 35Go sii ledje russiinávlen Jesusa, de sii juogadedje su biktasiid vuorbádemiin. 36De sii čohkánedje dasa fáktet su. 37Su oaivvi bajábeallái sii bidje čállosa mas bođii ovdan su duomu sivva: “Dát lea Jesus, juvddálaččaid gonagas.” 38Oktanaga Jesusiin russiinávlejuvvojedje guokte rievvára, nubbi su olgeš ja nubbi su gurut beallái. 39Dat geat vázze meaddel, bilkidedje su. Sii bárde oaivvi 40ja dadje: “Don gii veaját gaikut vuolás tempela ja hukset dan fas golmma beaivvis – beastte dál iežat, jos leat Ipmila bárdni, ja njieja vuolás ruossas!” 41Seammá láhkái bajimusbáhpat oktan čáloahppavaččaiguin ja vuorrasiiguin bilkidedje su ja dadje: 42“Earáid son lea beastán, muhto iežas ii máhte beastit. Son lea Israela gonagas, njidjos dál vuolás ruossas! Dalle mii oskut sutnje. 43Son lea dorvvastan Ipmilii. Gádjos dál Ipmil su, jos su ráhkista. Sonhan lea dadjan ahte lea Ipmila bárdni.” 44Seammá láhkái hiddjideigga su maiddái rievvára guovttos geat leigga russiinávlejuvvon oktanaga suinna. 45Guđát diimmus šattai seavdnjat miehtá oppa eatnama, ja dat bisttii gitta ovccát diimmu rádjái. 46Ovccát diimmus Jesus čuorvvui alla jienain: “ Eli, Eli, lema sabaktani?” Dat lea: “Ipmilan, Ipmilan, manne don leat mu guođđán?” 47Go muhtumat dain geat čužžo das, gulle dan, de sii dadje: “Son čuorvu Elia.” 48Dalán muhtun sis doamai viežžat guobbarasa, láktadii dan suvrra viinniin ja coggalii soabbegeahčái, vai beassá addit sutnje juhkat. 49Earát dadje: “Ale vuos! Gehččot, boahtágo Elia gádjut su.” 50Muhto Jesus čuorvvui fas alla jienain ja attii vuoiŋŋas. 51Dalle tempela ovdaloavdda gaikánii guovdat, badjeravddas gitta vuolleravdii. Eanan doarggistii, bávttit luoddanadde, 52hávddit rahpasedje, ja eatnat jápmimii oađđán bassi olbmuid rupmašat čuožžiledje bajás. 53Sii vulge hávddiineaset, ja Jesusa bajásčuožžileami maŋŋil sii bohte bassi gávpogii ja almmustuvve eatnagiidda. 54Go čuohtásaoaivámuš ja olbmát geat suinna ledje fáktemin Jesusa, oidne eatnama doarggisteamen ja buot mii dáhpáhuvai, de sii suorganedje sakka ja dadje: “Dát olmmái fertii leat Ipmila bárdni!” 55Maiddái máŋga nissona ledje dobbelaččas geahčadeamen dán. Sii ledje vádjolan Galilea rájes Jesusa mielde ja bálvalan su. 56Sin searvvis ledje Maria Magdalena, Jakoba ja Josefa eadni Maria ja Sebedeusa bártniid eadni.

Les i nettbibelen

21Sii bággejedje muhtun olbmá gii lei mannamin das meaddel, guoddit Jesusa ruossa. Son lei kyrenelaš Simon, Aleksandrosa ja Rufusa áhčči, gii lei boahtimin gávpogii. 22Sii dolvo Jesusa báikái man namma lea Golgata – dat lea Oaiveskálžobáiki. 23Sii adde sutnje juhkat viinni masa lei seaguhuvvon myrra, muhto son ii váldán dan. 24De sii russiinávlejedje su ja juogadedje su biktasiid ja vuorbádalle maid guhtege oaččui. 25Lei goalmmát diibmu go sii russiinávlejedje su. 26Bajilčálusin lei čállojuvvon váidda su vuostá: Juvddálaččaid gonagas. 27Oktan suinna sii russiinávlejedje guokte rievvára, nubbi su olgeš ja nubbi su gurut beallái. 28Nu ollašuvve čállagiid sánit: Son lohkkojuvvui láhkarihkkuid searvái. 29Dat geat manne meattá, bárde oaivvi ja bilkidedje su: “Don gii gaikkut tempela ja hukset dan fas golmma beaivvis, 30beastte dal iežat ja njieja vuolás ruossas!” 31Seammá láhkái bilkidedje su maiddái bajimusbáhpat ja čáloahppavaččat. Sii dadje guhtet guoibmáseaset: “Earáid son gal lea beastán, muhto iežas ii veaje beastit. 32Njidjos dál ruossas – Messias, Israela gonagas! Go mii dan oaidnit, de mii oskut sutnje.” Maiddái dat geat leigga russiinávlejuvvon oktan suinna, hiddjideigga su. 33Beaiveguovdil, guđát diimmus, sevnnjodii miehtá eatnama, ja seavdnjadas bisttii gitta ovccát diimmu rádjái. 34Ovccát diimmus Jesus čuorvvui alla jienain: “ Eloi, Eloi, lema sabaktani?” Dat lea: “Ipmilan, Ipmilan, manne don leat mu guođđán?” 35Go muhtumat dain geat ledje das, gulle dan, de sii dadje: “Son čuorvu Elia.” 36Muhtun viehkalii njuoskadit guobbarasa ettetviinnis, bijai dan soabbegeahčái, attii sutnje juhkat ja dajai: “Gehččot dal, boahtágo Elia váldit su vuolás.” 37Muhto Jesus čurvii alla jienain ja attii vuoiŋŋas. 38Dalle tempela ovdaloavdda gaikánii guovdat, badjeravddas gitta vuolleravdii. 39Go čuohtásaoaivámuš gii čuoččui das su buohta, oinnii Jesusa mo son attii vuoiŋŋas, de son dajai: “Duođaid, dát olmmái lei Ipmila Bárdni!” 40Dobbelaččas ledje maiddái muhtun nissonat geahččamin. Das ledje Maria Magdalena, nubbi Maria gii lei nuorat Jakoba ja Josesa eadni, ja Salome. 41Sii ledje vádjolan Jesusa mielde juo Galileas ja bálvalan su. Das ledje maiddái ollu eará nissonat geat ledje boahtán Jerusalemii Jesusa mielde.

Les i nettbibelen

26De soalddáhat doalvugohte Jesusa. Mátkkis sii bissehedje Simon-nammasaš kyrenelaš olbmá gii lei boahtimin gávpogii, ja bidje su guoddit ruossa Jesusa maŋis. 27Ollu olbmot bohte maŋis, maiddái máŋga nissona geat árkkálmastaledje ja čirro Jesusa. 28Jesus jorggihii sin guvlui ja celkkii: “Allet mu čiero, Jerusalema nieiddat, čirrot baicca iežadet ja mánáideattet. 29Boahtá áigi goas daddjojuvvo: Ávdugasat leat sahkuheamit, ávdugasat dat goaŧut mat eai leat riegádahttán, ja dat čiččit mat eai leat njamahan. 30Dalle olbmot dadjet váriide: Gahččet min ala, ja dieváide: Gokčet min. 31Jos dát dahkkojuvvo ruonas murrii, mii dalle šaddá dahkkojuvvot ástan murrii?” 32Oktanaga Jesusiin dolvojuvvojedje steavliduvvot guokte eará olbmá, guokte vearredahkki. 33Go sii bohte báikái mii gohčoduvvo Oaiveskálžun, de sii russiinávlejedje Jesusa ja vearredahkkiid, nuppi su olgeš, nuppigis su gurut beallái. 34Muhto Jesus celkkii: “Áhčážan, atte sidjiide ándagassii. Sii eai dieđe maid sii dahket.” Soalddáhat juogadedje gaskaneaset Jesusa biktasiid vuorbádallamiin. 35Olbmot čužžo geahčadeamen. Muhtun ráđđeolbmátge ledje das hiddjideamen Jesusa. Sii dadje: “Earrásiid son gal lea beastán – bestos dal iežas, jos juo lea Messias gean Ipmil lea válljen.” 36Soalddáhatge bilkidedje su. Sii bohte su lusa, geigejedje sutnje ettetviinni 37ja dadje: “Jos don leat juvddálaččaid gonagas, de beastte iežat.” 38Su bajil lei maid čála: “Dát lea juvddálaččaid gonagas.” 39Nubbi dain vearredahkkiin geat heaŋgáiga ruossas, bilkidii su ja dajai: “Almma don leat Messias? Beastte dalle iežat ja munno!” 40Muhto nubbi cuiggodii su: “Itgo donge bala Ipmilis, vaikko gillát seammá ráŋggáštusa? 41Moai gal letne ánssášan dupmome, moai ráŋggáštuvvojetne daguideame mielde, muhto dát olmmái ii leat dahkan maidege baháid.” 42Ja son dajai: “Jesus, muitte mu, go boađát riikasat.” 43Jesus vástidii: “Duođaid, mun cealkkán dutnje: Odne juo don leat muinna paradisas.” 44Lei juo guđát diibmu. Dalle, beaiveguovdil, šattai seavdnjatvuohta oppa eatnama miehtá, ja dat bisttii gitta ovccát diimmu rádjái. 45Tempela ovdaloavdda gaikánii guovdat. 46Ja Jesus čuorvvui alla jienain: “Áhčážan, du gieđaide mun oskkildan vuoigŋan.” Go son lei cealkán dan, de son attii vuoiŋŋas. 47Go čuohtásaoaivámuš oinnii mii dáhpáhuvai, de son rámidii Ipmila ja dajai: “Duođaid, dát olmmái lei vuoiggalaš.” 48Ja buohkat geat ledje čoagganan geahččat, čorbme rattiset go oidne dán ja máhcce gávpogii. 49Jesusa oahppásat čužžo guhkkeleappos ja oidne mii dáhpáhuvai. Sin searvvis ledje maiddái dat nissonat geat ledje boahtán su mielde Galileas.

Les i nettbibelen

17Sii doalvugohte Jesusa. Son guttii ieš iežas ruossa dan báikái mii gohčoduvvo Oaiveskálžobáikin, hebreagillii Golgatan. 18Doppe soalddáhat russiinávlejedje Jesusa ja guokte earrása oktanaga suinna, ovtta goappáge beallái ja Jesusa sudno gaskii. 19Pilatus lei čálihan távvala mii giddejuvvui russii. Das ledje sánit: “Jesus nasaretlaš, juvddálaččaid gonagas.” 20Ollu juvddálaččat lohke čállaga, danne go báiki gos Jesus russiinávlejuvvui, lei lahka gávpoga. Čála lei čállojuvvon hebreagillii, latiinnagillii ja greikkagillii. 21Juvddálaččaid bajimusbáhpat dadje Pilatusii: “Ale čále: ‘Juvddálaččaid gonagas’. Čále ahte son lea dadjan: ‘Mun lean juvddálaččaid gonagas’.” 22Pilatus vástidii: “Maid čállen, dan čállen.” 23Go soalddáhat ledje russiinávlen Jesusa, de sii válde su biktasiid ja juogadedje daid njealji sadjái, iežas oasi guđege soalddáhii. Sii válde maid báiddi, muhto go dat lei sávnnjeheapme, badjin gitta vulos oktan bihttán gođđojuvvon, 24de sii dadje guhtet guoibmáseaset: “Allot gaikkot dan. Vuorbádallot, guhtemuš dan oažžu.” Nu ollašuvai dát čállaga sátni: Sii juogadedje mu biktasiid gaskaneaset ja vuorbádalle mu gárvvu.Aiddo dan soalddáhat dahke. 25Jesusa ruossa guoras čužžo su eadni ja su eatni oabbá ja vel Maria, Klopasa áhkká, ja Maria Magdalena. 26Go Jesus oinnii eatnis ja su bálddas dan máhttájeaddji gean ráhkistii, de son celkkii eadnásis: “Nisson, son lea du bárdni.” 27Dasto son celkkii máhttájeaddjái: “Son lea du eadni.” Dan rájes máhttájeaddji válddii su ruktosis. 28Jesus diđii ahte dál buot lei ollašuvvan, ja vai čála ollašuvašii son celkkii: “Mun goikkan.” 29Das lei lihtti man dievva lei ettetviidni. Soalddáhat buonjostedje das guobbarasa, bidje dan isopa nađđii ja dolle dan su njálmmi ovdii. 30Jesus jugai viinni ja celkkii: “Dat lea ollašuhttojuvvon.” Son sojaldahtii oaivvis ja attii vuoiŋŋas.

Les i nettbibelen