Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Jesus buorida
Jeriko gávpotpoartta olggobealde lei buolli báhkka.
Čalmmehis Bartimeus čohkkái das ja gearjidii.
Son ii oaidnán maidege, muhto son gulai mii dáhpáhuvai.
Son gulai alla jienaid mat fas gáide
ja olbmuid vázzima geat joreštedje gávpoga olggos-sisa,
ja ásengaccaid mat spohkke dan geađgás luotta vuostá.
Dakko gos Bartimeus čohkkái ja gearjidii olggobealde
Jeriko gávpotpoartta haksojedje iešguđetlágán hájat;
dopmu, bivastat, biebmu ja máisttut:
«Veahket mu, attesmat munnje vehá ruđa!»
De gullojedje olbmot boahtime olggos gávpogis.
Sii ledje ilus ja boagustedje, ja muhtin namuhii ovtta nama:
Jesus Nasaretlaš – iigo son lea gullan dien nama ovdal?
Iigo son lean okta gii buoridii fas buohcci olbmuid?
Lávkkit ja jienat lahkonedje su.
Son ii gearjidan šat ruđa, son čuorvvui.
«Jesus Nasareálaš, gula mu, veahket mu!»
Máŋggas su birra šiggo su jávohuvvat.
Muhto son čuorvvui velá jitnoseappot:
«Jesus Nasareálaš, gula mu, veahket mu!»
Olmmošjoavku lei juo measta meaddel manname.
Muhto de bisánedje lávkkit.
Šattai jaskat.
Son gulai liekkus ja ustitlaš jiena dadjame:
«Bartimeus, maid don dáhtut ahte mun dagan dutnje?»
Son njuikii bajás ja čurvii: «Hearrá, daga mu oaidnin!»
Dat buorre jietna dajai: «Vázzil! Du osku lea du beastán.»
Vehážiid mielde, dego beaittaliidni livččii eret váldojuvvome,
rahpasii sutnje čuovga, ja ivnnit.
Son sáhtii oaidnit.
Ja son geahčai njuolga Nasareálačča Jesusa ámadadjui.
De son guđii iežas gearjidansaji ja čuovui Jesusa mielde.
Loga muitalusa Biibbalis
46Sii bohte Jerikoi. Go Jesus de vulggii gávpogis oktanaga máhttájeddjiidisguin ja ollu olbmuiguin, de geaidnoguoras čohkkái čalmmehis gearjideaddji Bartimeus, Timeusa bárdni. 47Go son gulai ahte nasaretlaš Jesus lei mannamin das meaddel, de son čuorvugođii: “Jesus, Davida bárdni, árpmit mu!” 48Olusat šiggo su vai son jávohuvašii, muhto son čuorvvui vel jitnoseappot: “Davida bárdni, árpmit mu!” 49Dalle Jesus orustii ja celkkii: “Rávket su deike.” Sii manne rávkat čalmmeheami ja dadje sutnje: “Ale bala! Čuožžil, son rávká du.” 50Olmmái nuolastii oalgebiktasa, njuikii čuoččat ja bođii Jesusa lusa. 51Jesus jearai sus: “Maid don dáhtut ahte mun dagan dutnje?” Čalmmeheapme vástidii: “Rabbuni, daga mu oaidnin.” 52Dalle Jesus celkkii sutnje: “Vázzil, du osku lea beastán du.” Dallánaga olmmái šattai oaidnin, ja son vádjolišgođii Jesusa mielde.