Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Ođđa albmi ja ođđa eanan
Johannes lei fáŋgasullos Patmosis.
Son čohkkái iežas bákteráiggi olggobealde
muhtin sotnabeaiiđida ja geahčai dan golke merrii.
Son jurddašii risttalaččaid birra geat ledje nannámis.
Sii doarrádallojuvvojedje danin go ledje risttalaččat.
Movt son dat manai singuin?
Johannes lei leamaš sin jođiheaddji,
muhto keaisár lei váldán su gitta.
Man gallis son velá ledje válddahallan gitta?
De son gulai fámolaš jiena iežas duohken.
Son jorggihii, ja das čuoččui Jesus.
Son orui oaidnit nu movt juo Johannes su muittii ge,
muhto son lei seammás earálágan;
su vuovttat ledje nu vielgadat dego buhtis ullut,
čalmmit bulle dego dolla,
ja su jietna dego čuojaidii Johannesa belljiide go son dajai:
«Ale bala! Čále dan maid oainnát ja gulat.»
Ja Johannes oinnii –
uvssa mii rahpasii albmái.
Son manai sisa dan uksaráiggi ja oinnii truvnno.
Ipmil ieš čohkkái dan alde,
ja buohkat su birra lávlo máidnunlávlagiid sutnje.
Láppis lei das, Láppis mii lei njuvvojuvvon,
ja rabai girjegearu.
Ja Johannes oinnii – son oinnii visot mii dás
maŋŋil galggai dáhpáhuvvat:
dat stuora soahti gaskkal buori ja bahá.
Son oinnii vuoittu, ja movt bahá oktii galggai vuoittáhallat.
Ja son oinnii –
dan ođđa eatnama
gos visot lei buhtis ja buorre,
gos Ipmil sihkui eret buot gatnjaliid
gos bárggas ja moraš ja visot mii bávččagahttá
ja visot mii earuha olbmuid, ii lean šat.
Jesus dajai: «Geahča, mun boađán fargga.»
Ja de son jávkkai.
Johannes lei akto.
Son čohkkái ain su bákteráiggi olggobealde.
Lei sotnabeaiiđit, ja goalki mearas.
De son čálligođii: «Allet bala!»
Loga muitalusa Biibbalis
9Mun, din viellja Johannes gii lean dinguin servvolaš áŧestusaide, riikii ja Jesusa gierdavašvuhtii, ledjen Ipmila sáni ja Jesusa duođaštusa dihte sullos man namma lea Patmos. 10Hearrá beaivvi mun rohttašuvven Vuoiŋŋas, ja mun gullen iežan duohken alla jiena mii čuojai dego stuorra dorve. 11Jietna celkkii: “Čále girjái maid oainnát, ja vuolggat girjji čieža searvegoddái: Efesosii, Smyrnai, Pergamonii, Tyatirai, Sardesii, Filadelfiai ja Laodikeai.” 12Mun jorggihin geahččat gii munnje sártnui, ja go mun jorggihin, de mun oidnen čieža golleginttaljuolggi 13ja ginttaljulggiid gaskkas muhtuma gii lei olbmobártni láhkásaš. Su gárvun lei guhkes oalgebivttas ja ratti birra golleboagán. 14Su oaivi ja vuovttat čeaskájedje dego vilges ullut, nugo muohta, ja su čalmmit ledje dego dollanjuokčamat. 15Su juolggit gearrájedje dego veaiki mii lea ášus áhcagastojuvvon, ja su jietna lei nugo eatnat čáziid márra. 16Olgeš gieđas son doalai čieža nástti, su njálmmis geaigái bastilis guovtteávjjot miehkki ja su ámadadju lei dego beaivváš go dat báitá fámustis. 17Go mun oidnen su, de mun gahččen su julggiid ovdii dego jábmi.Muhto son bijai olgeš gieđa mu ala ja celkkii:“Ale bala! Mun lean vuosttamuš ja maŋimuš, 18son gii eallá. Mun ledjen jápmán, muhto dál mun ealán álo ja agálaččat. Mus leat jápmima ja jábmiidáimmu čoavdagat. 19Čále dan dihte maid oainnát, dan mii lea dál ja dan mii šaddá dás maŋŋil. 20Don oidnet čieža nástti mu olgeš gieđas ja čieža golleginttaljuolggi, ja daid čiegusvuohta lea dát: Čieža nástti leat čieža searvegotti eŋgelat, ja čieža ginttaljuolggi leat dat čieža searvegotti.”
1Dasto mun oidnen dán: Almmi uksa lei rabas, ja gullui seammá jietna maid mun ledjen gullan ovddit háve – dego livččii bossojuvvon dorvii. Dat celkkii munnje: “Boađe deike bajás! Mun čájehan dutnje mii dás maŋŋil šaddá.”
1Das maŋŋil mun gullen almmis stuorra jiena, dego stuorra olmmošeatnatvuohta livččii lávlon: Halleluja! Bestojumi buktá min Ipmil, su lea hearvásvuohta ja fápmu. 2Su duomut leat duođat ja vanhurskásat. Son lea dubmen stuorra fuorá gii bilidii eatnama fuorrávuođainis, son lea mávssahan fuorrái bálvaleddjiidis vara. 3Jietna gullui fas: Halleluja! Fuorá dola suovva badjána álo ja agálaččat. 4Guokteloginjeallje vuorrasa ja dat njeallje sivdnádusa luoitádedje muđolassii Ipmila ovdii ja rohkadalle su gii čohkká truvnnus. Sii celke: “Amen. Halleluja!” 5Ja truvnnus gullui jietna: “Máidnot min Ipmila, buot su bálvaleaddjit, dii geat sus ballabehtet, smávvát ja stuorrát!” 6De mun gullen jiena mii lei dego olmmošeatnatvuođa ja stuorra čáziid márra ja garra bajána jupma. Dat celkkii: Halleluja! Hearrá, min Ipmil, Buotveagalaš, lea dál gonagas. 7Illudehkot ja ávvudehkot, addot sutnje gudni! Dál leat boahtán Lábbá heajat. Su moarsi lea ráhkkanan, 8sutnje lea gárvvuhuvvon buhtis ja čuovgilis liidnebivttas.Dat liidnebivttas lea bassi olbmuid vanhurskkis dagut. 9Eŋgel celkkii munnje: “Čále: Ávdugasat dat geat leat bovdejuvvon Lábbá headjamállásiidda.” Ja son celkkii velá: “Dát leat Ipmila duohta sánit.” 10Mun luoitádin su julggiid ovdii vai beasan rohkadallat su, muhto son celkkii: “Ale dan daga! Mun lean Ipmila bálvaleaddji nugo don ja du vieljat geat lehpet Jesusa duođašteaddjit. Ipmila don galggat rohkadallat!”Jesusa duođašteddjiin lea profehtastallama Vuoigŋa. 11De mun oidnen almmi rabasin, ja geahča: Vilges heasta ja dan čielggis olmmái. Son lea oskkáldas ja duohta, son dubme ja soahtá vanhurskásit. 12Su čalmmit ledje dego dollanjuokčamat, sus ledje oaivvis máŋga kruvnnu, ja sutnje lei čállojuvvon namma maid dušše son ieš dovdá. 13Son lei gárvodan varas buonjostuvvon oalgebiktasa, ja su namma lea Ipmila Sátni. 14Su maŋis bohte almmiveagat vilges heasttaid čielggis fiinna, vilges ja buhtis liidnebiktasii gárvvohuvvon. 15Su njálmmis boahtá bastilis miehkki. Dainna son časká álbmogiid, son stivre daid ruovdesoppiin ja duolbmá viidnebohčingári man dievva lea buotveagalaš Ipmila buolli moari viidni. 16Su biktasii alimiid bokte lea čállojuvvon namma: Gonagasaid Gonagas ja hearráid Hearrá.
1Ja mun oidnen ođđa almmi ja ođđa eatnama. Ovddit albmi ja ovddit eanan ledje jávkan, iige áhpi lean šat. 2Mun oidnen go bassi gávpot, ođđa Jerusalem, bođii vuolás almmis Ipmila luhtte, ráhkaduvvon nugo moarsi gii lea čiŋahuvvon irgásis. 3Ja mun gullen truvnnus alla jiena mii celkkii: “Geahča, Ipmila goahti olbmuid gaskkas! Son ássá sin gaskkas, ja sii šaddet su álbmogin. Ipmil ieš lea sin luhtte. 4Son sihkku sin čalmmiin juohke gatnjala. Jápmin ii leat šat, ii moraš, bárgun iige váivi. Buot mii lei ovdal, lea jávkan.”