Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Jesus šiggu biekka
Go Jesus muitalii,
de lávejedje álo olu olbmot boahtit su gullat.
Oktii lei son jávregáttis.
De čoahkkanedje dohko nu olu olbmot
ahte Jesus fertii mannat muhtima fatnasii
ja bivdit su suhkat fávlelii,
ja olmmošálbmot čuoččui gáttis ja guldalii su sártni.
Veaigebeallái lei Jesus váiban.
Son dajai máhttájeddjiidasas: «Vulgot don bealláijávrri».
Máŋggas máhttájeddjiin ledje guollebivdit,
ja vulge áinnas suhkat.
Sii háliidedje dovdat biekka ja báruid
ja fatnasa sugadeami mii sáhtii maid nahkáriid rohttehit.
«Nohkes fal», dadje sii Jesusii.
Son gávnnai oaivvuloža,
ja velledii maŋŋeskoahttasii nohkat.
De bođii garra jorribiegga jávrri badjelii.
Čoarre bárut šávve fatnasii ja dat devdui.
Máhttájeaddjit goivo ja
muhtimat guokkardedje maŋŋeskoahttasii
ja bokte Jesusa:
«Oahpaheaddji, itgo don beroš das ahte mii leat vuodjume?»
De Jesus čuoččahii,
šikkui biekka ja gohčui jávrri:
«Ložže! Golke!»
De vahččii, ja šattai áibbas vuodjagoalki.
Jesus geahčai máhttájeddjiide ja dajai:
«Manne dii lehpet nu balus?
Iigo dis leat velá osku?»
Máhttájeaddjit balle sakka ja jurddašedje:
Sihke biegga ja jávri jeagadit su.
Mii olbmáid dát lea?
Loga muitalusa Biibbalis
35Go dan seammá beaivvi eahket lei šaddan, de Jesus celkkii máhttájeddjiidasas: “Vulgot don beallái jávrri.” 36Máhttájeaddjit luite olbmuid vuolgit ja manne fatnasii mas Jesus lei juo čohkkámin. Eará fatnasatge čuovvuledje. 37De bođii garra jorribiegga, ja bárut leiko fatnasii nu ahte dat juo devdogođii. 38Muhto Jesus lei fatnasa maŋágeahčen oađđimin guottá vuostá. Máhttájeaddjit bokte su ja dadje: “Oahpaheaddji, itgo don beroš das ahte mii heavvanit?” 39De son morránii, šikkui biekka ja gohčui jávrri: “Jávohuva! Oro jaska!” De váhččii, ja šattai áibbas goalki. 40Jesus celkkii sidjiide: “Manne dii lehpet nu balus? Iigo dis veláge leat osku?” 41Dalle sii balle sakka ja dadje guhtet guoibmáseaset: “Mii olbmáid dát lea? Velá biegga ja jávrige jeagadit su.”