Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Jairosa nieida
Jesus ja máhttájeaddjit ledje leamaš fatnasiin jávrri alde.
Dál sii ledje gáddái ollen,
ja gesse fatnasa bajás.
Muhto olbmot čoagganedje sin birra.
Sii háliidedje gullat maid Jesus logai.
De bođii muhtin dievdu gean namma lei Jairos.
Son lávii jođihit ipmilbálvalusaid synagogas.
Sus ledje muođut šovkkodan ja čalmmit čuvge baluin.
Son luoitádii Jesusa julggiid ovdii ja dajai:
«Mu uhca nieiddaš lea jápmime.
Boađe bidjat su ala gieđaid, vai son beassá eallit».
Jesus vulggii Jairosa mielde.
Muhto sii ádjánedje, dannego olles olmmošveahka čuovui maŋis.
Sii báhkkejedje juohkesajis beassat Jesusa lahka,
ja Jesus ja máhttájeaddjit eai beassan gosage.
De bohte olbmot Jairosa viesus ja muitaledje váivves sága.
Sii dadje: «Jairos, du nieiddaš lea jápmán.
Ale šat vuorjja oahpaheaddji.»
Muhto Jesus dajai sidjiide: «Allet bala! Dušše fal oskot!»
Son bivddii máhttájeddjiid ja olmmošveaga orrut das,
ja válddii mielde Petera, Jakoba ja Johannesa,
dan golbma máhttájeaddji geaiguin son eanemus ovttastalai.
Sii čuvvo Jairosa su viesu lusa.
Jairosa viesus ledje dievva olbmot.
Sii čirro jitnosit, nugo vierru lei go muhtin lei jápmán.
«Manne dii čierrubehtet ja čuorvubehtet morrašis?» jearai Jesus.
«Mánná ii leat jápmán, son oađđá».
Sii dušše boagustedje su.
«Mannet olggos!» dajai son.
Dušše váhnemat ja golbma máhttájeaddji besse leat das.
Sii manne dohko gos nieiddaš lei vealláme.
Son lei guoktenuppelot jahkásaš.
Jesus válddii dan unna gieđaža iežas gihtii ja dajai:
«Talita kumi»
– dat mearkkaša: Nieiddaš, lihka!
Dallánaga son čuoččahii ja váccašišgođii.
Váhnemat eaba bálljo jáhkkán iežaskka čalmmiide.
«Addet sutnje vehá borrat», dajai Jesus ja moddjái.
Loga muitalusa Biibbalis
21Go Jesus lei fas mannan fatnasiin jávrri nuppe beallái, de ollu olbmot čoahkkanedje su lusa. Go son lei ain jávregáttis, 22de dasa bođii muhtin synagoga ovdaolmmoš gean namma lei Jairos. Go olmmái oinnii Jesusa, de son luoitádii su julggiid ovdii 23ja ánuhii: “Boađe, mu uhca nieiddaš lea jápmimin. Bija gieđaid su ala, de son dearvvašmuvvá iige jáme.” 24Jesus vulggii su mielde, ja ollu olbmot čuvvo su ja bahkkejedje sutnje. 25Das lei maid nisson gii lei gillán vardima guoktenuppelohkái jagi. 26Son lei leamaš máŋgga dálkkasteaddji divššus ja lei gillán olu. Son lei golahan buot mii sus lei, iige lean ožžon maidege vehkiid, muhto lei baicca hedjonan. 27Son lei gullan mii muitaluvvui Jesusa birra, ja dál son bođii olbmuid gaskka Jesusa duohkái ja guoskkahii su biktasiid maŋil, 28dasgo son jurddašii: “Jos beasašin guoskkahit su biktasiid, de mun dearvvašmuvan.” 29Dallánaga vardin bisánii, ja son dovddai rupmašis ahte lei buorránan givssistis. 30Jesus dovddai dalán ahte sus lei vuolgán fápmu. Son jorggihii olbmuid siste ja jearai: “Gii guoskkahii mu biktasiid?” 31Máhttájeaddjit dadje sutnje: “Don oainnát ahte olbmot bahkkejit du ala, ja jearat: Gii guoskkahii mu?” 32Muhto Jesus geahčai iežas birra vai beassá oaidnit gii dan lei dahkan. 33Nisson doarggistii balus, danin go son diđii mii lei dáhpáhuvvan sutnje. Son bođii Jesusa ovdii, luoitádii eatnamii ja muitalii buot mii lei dáhpáhuvvan. 34Jesus celkkii sutnje: “Nieiddažan, du osku lea buoridan du. Mana ráfis, don leat buorránan givssistat.” 35Go Jesus lei ain sárdnumin, de muhtumat synagoga ovdaolbmo ruovttus bohte ja dadje: “Du nieida jámii. Ale šat vuorjja oahpaheaddji.” 36Go Jesus gulai sin sániid, de son celkkii synagoga ovdaolbmui: “Ale bala, duššefal oskko.” 37Son ii suovvan ovttage boahtit mielde earret Petera, Jakoba ja Johannesa, Jakoba vielja. 38Sii bohte synagoga ovdaolbmo vissui, ja Jesus oinnii šláma ja olbmuid geat čirro ja fuiko. 39Son manai sisa ja celkkii sidjiide: “Manne dii šlápmabehtet ja čierrubehtet? Ii mánná leat jápmán, son oađđá.” 40Olbmot boagustedje su. Muhto son ájii buohkaid olggos, válddii mielddis máná áhči ja eatni ja daid geat ledje suinna, ja manai latnjii gos mánná lei. 41De son válddii máná gihtii ja celkkii: “Talita kum!” Dat mearkkaša: “Nieida, mun cealkkán dutnje: Lihka!” 42Ja dallánaga nieida čuožžilii ja váccašii; son lei guoktenuppelotjahkásaš. Buohkat hirpmástuvve sakka. 43Muhto Jesus gilddii sin garrasit muitaleames geasage mii lei dáhpáhuvvan. Son gohčui sin addit niidii borrat.