Jeriko

Go Moses jámii, de šattai Josva Israel álbmoga jođiheaddji.
Josva doalvvui álbmoga dan eatnamii maid Ipmil lei sidjiide lohpidan.
Muhto álggos fertejedje sii rasttidit Jordan joga,
mii dien ággis lei dulvan badjel ravddaid.

Muhtin ija go sii ledje gohtten Jordanii,
sáddii Josva suollemasat guokte iskkadeaddji Jeriko gávpogii
mii lei nuppe bealde joga.
Iskkadeaddjit goarpmuiga bajás gávpotmuvrra bokte.
Ja bajimusas, muvrra siste, lei viessu.
Doppe orui okta nisu man namma lei Rahab.
Son lei siivui sudno vuostá ja guossohii sudnuide borrat.
Son čiehkalii hoahpus sudno dáhke nala suinniid vuollái
go gonagasa olbmát bohte ohcat iskkadeddjiid.
Rahab dájuhii fávttaid ja dajai ahte dat amas olbmot ledje juo mannan.
Ihkku son luittii iskkadeddjiid báttiin láseráigge vulos.

«Mii leat gullan movt Ipmil veahkehii din
Guodjameara ja sáttomeahci čađa», muitalii son sudnuide.
«Dalle mii juo vuolláneimmet din dihte.
Muhto go dii váldibehtet Jeriko: sestet mu bearraša ja mu!
Čájehehket midjiide buorrevuođa, nugo mun lean dahkan buoridutnuide!»
De soai bivddiiga su čatnat rukses bátti lásii
mearkan dasa ahte dán viesu olbmot galge várjaluvvot.

Iskkadeaddjit bođiiga ruovttoluotta Josva lusa
ja muitaleigga dan maid diđiiga gávpoga birra.
«Áigi lea dievvan», dajai Josva.
«Mii rasttidit Jordana».
Son bivddii báhpaid mannat ovddemusas
ja guoddit lihtuárkka iežaset gaskkas.
Ja dakkaviđe go juolggit guske čáhcái,
bisánii dulvečáhci bajábealde golgamis
ja orui dego oktan čopmán guhkkin.
Israela álbmot rasttidii joga goikeeatnama mielde.
Olbmot gávpogiin gulle dan oavddu birra, ja dorggiidedje.

Oktii lei Josva váccašeame akto.
De deaivvai son ovtta olbmá mas lei rohttejuvvon miehkki gieđas.
«Leatgo don min bealde vai gulat go min vašálaččaide?» jearai Josva.
«In, mun lean Hearrá soahteveaga oaivámuš», vástidiiolmmái.
«Dál lean mun boahtán».
De čippustii Josva, gopmirdii eatnamii muođuid,
go son ipmirdii ahte lei deaivan eŋgela.

Go Josva bođii álbmoga lusa,
dajai son: «Mun dieđán mii oažžut Jeriko iežametgihtii.
Muhto eat mii dárbbaš soahtat dan gávpoga dihte.
Mii galgat dorvviiguin bossut».

Álbmot dagai nu go son logai.
Sii eai soahttán, muhto vázze gávpotmuvrra birra,
lihtoárka olggiid nalde bosodettiin dorvviiguin.
Nu sii dahke oktii beaivvis guhtta beaivvi.
Čihččet beaivvi vázze sii čieža geardde gávpoga birra.
Go báhpat bosso dorvviiguin dan čihččet beaivvi,
čuorvvui álbmot alla jienain.
Dallánaga gáhčai muvra,
ja álbmot manai sisa.

Jeriko mollejuvvui visot muoldun,
muhto Rahab ja su bearaš gáddjojuvvojedje.

Loga muitalusa Biibbalis

1Jeriko poarttat ledje lohkkaduvvon ja dahppagasas israellaččaid dihte. Ii oktage beassan gávpogis olggos iige gávpogii sisa. 2Hearrá celkkii Josuai: “Mun attán du gihtii Jeriko, dan gonagasa ja buot dan gievrras soahteolbmáid. 3Din soahteolbmát galget mannat gávpoga birra, vádjolit dan birra oktii beaivvis. Dii galgabehtet dahkat nu guhtta beaivvi. 4Čieža báhpa galget guoddit čieža vierccačoarvedorvve árkka ovddas. Čihččet beaivvi dii galgabehtet mannat gávpoga birra čieža geardde, ja báhpat galget bossut dorvviid. 5Go báhpat bossugohtet čoarvedorvviid ja dii gullabehtet dorvviid jiena, de oppa álbmot galgá bajidit stuorra soahtečuorvasa. Dalle gávpoga muvrrat gahččet, ja din soahteolbmát besset mannat gávpogii, juohkehaš njuolga ovdasis.” 6Josua, Nuna bárdni, rávkkai lusas báhpaid ja dajai sidjiide: “Dii galgabehtet guoddit lihtuárkka, ja čieža báhpa galget guoddit čieža vierccačoarvedorvve Hearrá árkka ovddas.” 7Álbmogii son dajai: “Vulget vázzit gávpoga birra. Soahteolbmát galget mannat Hearrá árkka ovddas.” 8Go Josua lei sárdnon álbmogii, de čieža báhpa geat gudde čieža čoarvedorvve, vulge vázzit Hearrá lihtuárkka ovddas. Sii bosso dorvviid, ja Hearrá lihtuárka čuovui sin maŋis. 9Soahteolbmát manne báhpaid ovddas geat bosso dorvviid, ja maŋuš bođii árkka maŋis, ja dorvvet čudje heaittekeahttá. 10Josua lei dadjan álbmogii: “Allet bajit soahtečuorvasa! Orrot jávohaga, allos din njálmmis vulgo oktage sátni. Easkka dan beaivvi go mun gohčun din bajidit soahtečuorvasa, de galgabehtet čuorvut.” 11Nu Hearrá árka guddojuvvui gávpoga birra ovtta geardde. Dasto olbmot manne siidii ja idjadedje doppe. 12Josua lihkai árrat iđedis ja vuolggahii báhpaid guoddit Hearrá árkka. 13Dat čieža báhpa geat gudde dan čieža čoarvedorvve, manne Hearrá árkka ovddas ja bosso dorvviid heaittekeahttá. Soahteolbmát vázze sin ovddas, ja maŋuš bođii Hearrá árkka maŋis, ja dorvvet čudje heaittekeahttá. 14Dan beaivvige sii manne gávpoga birra ovtta geardde ja de máhcce siidii. Nu sii dahke guhtta beaivvi. 15Čihččet beaivvi sii lihkke go iđedisguovssu badjánii ja manne gávpoga birra seammá láhkái, muhto dál čieža geardde. Dušše dan beaivvi sii manne gávpoga birra čieža geardde. 16Go báhpat čihččet geardde bossugohte dorvviid, de Josua gohčui álbmoga: “Bajidehket soahtečuorvasa! Hearrá addá gávpoga din gihtii. 17Gávpot ja buot mii doppe lea, vihahuvvo duššadeapmái ja gullá Hearrái. Dušše fuorrá Rahab ja buohkat geat leat suinna viesus, ožžot eallit, danin go son čiegai iskkadeddjiid geaid mii leimmet vuolggahan. 18Váruhehket váldimis maidege mii lea vihahuvvon duššadeapmái, muđui dii vihahehpet duššadeapmái oppa Israela siidda ja dagahehpet dasa lihkuhisvuođa. 19Buot silbba ja golli ja buot bronsa- ja ruovdediŋggaid galgá basuhit Hearrái ja doalvut Hearrá dávvirgámmárii.” 20Álbmot bajidii soahtečuorvasa ja báhpat bosso dorvviid. Dalán go álbmot gulai dorvviid jiena, de dat bajidii stuorra soahtečuorvasa. Dalle Jeriko muvrrat gahčče, ja soahteolbmát manne gávpogii, juohke olmmái dan sajis gokko čuoččui. Nu israellaččat válde gávpoga.

Les i nettbibelen