Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Jerusalem gahččá
Go gonagas Salomo jámii, de Israela riika juohkásii.
Álbmogat álge rohkadallat eará ipmiliidda ja rihkko lihtu Ipmiliin.
Goappašat riikkaide ledje márran olbmot.
Álggos válde Davviriikka,
ja dasto áite Jerusalema lulde.
Dat maŋemus gonagas lulde ii lean buorre gonagas,
son dagai dušše nu movt ieš háliidii.
Son jođihii álbmoga stuimmiide, muhto ii lihkostuvvan.
Babylona gonagas sáddii veagaidis sin vuostá,
ja birastahtii Jerusalema guokte jagi.
Álbmot gávpotmuvrraid siskkobealde nealggui.
Go sis nogai biebmu,
de vašálaččat njeide muvrra ja báhkkejedje sisa.
Olles álbmot dolvojuvvui fáŋgan Babyloniai,
dušše geafimusat besse báhcit.
Gávpot ja tempel báhce buollit.
Vašálaččat ledje rievidan buot sin dávviriid.
Sii čirro go dolvojuvvojedje eret,
muhto ii oktage gádjon sin.
Lei go Ipmil sin guođđán?
Sii ollejedje Babyloniai, ja vehážiid mielde
sii ipmirdišgohte ahte Ipmil lei doppe maid.
Sii áibbašedje ruovttoluotta Jerusalemii ja Juda-riikii,
muhto sii eai lean guđđojuvvon deike amas riikii.
Sii servvoštalle ja movttiidahte guhtet guimmiideaset,
doallagohte allabasiid, ja čohkkejedje iežaset čállosiid.
Olbmot geat bohte Judas, šadde juvddálažžan doppe, eksiillas.
Dál sii muite ja dihte geat sii ledje.
Áigi golai.
Maŋŋel čiežalogi jagi ožžo juvddálaččat dieđu
ahte besse fas máhccat ruoktot.
Sii eai báljo jáhkkán dasa maid gulle.
Sii vulge ruovttueatnamii dego niegus.
Jurddaš go dát galggai dáhpáhuvvat sin eallináiggis!
Sii besse váldit mielde daid rieviduvvon tempeldávviriid,
ja manne ruovttoluotta Jerusalema fas hukset.
Sii ceggejedje fas gávpotmuvrra.
Sii ceggejedje viesuid ja tempela.
Ja dat ádjánii.
Go sii viimmat gerge,
de bivde sii báhpa viežžat girjegearu
masa Láhka lei čállon, dan maid sii ledje ožžon Ipmilis.
Dievddut ja nissonat čužžo diibmoviissaid
ja guldaledje dan botta go báhppa das logai jitnosit.
Sii eai ipmirdan dan boares giela,
muhto muhtumat dulkojedje
ja čilgejedje dan mii lohkkojuvvui.
Go sii gulle ja ipmirdedje Lága, de buohkat čierrugohte.
Muhto báhppa dajai: «Sihkkot gatnjaliid!
Odne mii galgat ávvudit ja illudit.
Sáddejehket biepmu skeaŋkan sidjiide geain váilu!
Danin go dál mii leat duođai fas ollen ruoktut.»
Loga muitalusa Biibbalis
9Jojakin lei gávccinuppelotjahkásaš go šattai gonagassan, ja son ráđđii Jerusalemis golbma mánu ja logi beaivvi. Son dagai dan mii lea bahá Hearrá čalmmiin. 10Jahkemolsumis gonagas Nebukadnesar vieččahii su ja ollu Hearrá tempela divrras lihtiid Babylonii. Juda ja Jerusalema gonagassan son dagai Jojakina vielja Sidkia. 11Sidkia lei guoktelogiovttajahkásaš go šattai gonagassan, ja son ráđđii Jerusalemis oktanuppelohkái jagi. 12Son dagai dan mii lea bahá Hearrá, su Ipmila, čalmmiin iige vuollánan, vaikko profehta Jeremia sártnui sutnje, maid Hearrá lei gohččon. 13Sidkia maid stuimmáskii gonagas Nebukadnesara vuostá, vaikko lei Ipmila bokte vurdnon sutnje oskkáldasvuođa. Son lei gážžár ja buoššudii váimmus iige jorgalan Hearrá, Israela Ipmila, beallái. 14Maiddái buot álbmoga njunnošat, báhpat ja álbmot hilgo Hearrá, atnigohte eará álbmogiid fasttes vieruid ja dahke buhtismeahttumin Jerusalema tempela, maid Hearrá lei basuhan alccesis. 15Hearrá, sin áhčiid Ipmil, várrii sin eatnat gerddiid áirasiiddis bokte, danin go son dáhtui seastit iežas álbmoga ja viesu. 16Muhto olbmot bilkidedje Ipmila áirasiid, badjelgehčče su sániid ja hiddjidedje su profehtaid, dassá go Hearrá moarri álbmogasas šattai nu stuorisin ahte dat ii lean šat doalaheames. 17Dalle Hearrá divttii Babylonia gonagasa fallehit Juda ássiid. Nebukadnesar gottii sin nuorra olbmáid tempelis, son ii seastán nuorra olbmáid iige nieiddaid, ii vuorrasiid iige čurgesvuovttagiid. Buohkat addojuvvojedje Nebukadnesara gihtii. 18Ja buot tempela lihtiid, smávva ja stuorra lihtiid, tempela dávviriid ja gonagasa ja su oaivámuččaid dávviriid gonagas doalvvui Babylonii. 19Kaldealaččat bolde Ipmila tempela, gaiko Jerusalema muvrra, buolláhedje buot gávpoga ladniid ja duššadedje dan divrras dávviriid. 20Son doalvvui fáŋgan Babylonii dan bázahusa mii lei vealtan miehkis. Doppe sii ledje su ja su maŋisbohttiid šlávvan gitta dassážii go persialaš riika šattai – 21vai ollašuvašii Hearrá sátni maid Jeremia lei sárdnon – ja gitta dassážii go eanan lei duohpan doalakeahtes sabbahiiddis. Oppa áiggi go eanan lei ávdin, das lei sabbat, dassážii go čiežalogi jagi ledje vássán. 22Persia gonagasa Kyrosa vuosttaš ráđđenjagi Hearrá bijai Kyrosii jurdaga addit almmuhusa – vai ollašuvašii dat sátni maid Hearrá lei sárdnon Jeremia bokte – ja son gulahii miehtá riikkas, njálmmálaččat ja čálalaččat: 23“Ná cealká Kyros, Persia gonagas: Hearrá, almmi Ipmil, lea addán munnje buot eatnama riikkaid, ja son lea gohččon mu hukset alccesis viesu Jerusalemii Judas. Dii buohkat geat gullabehtet su álbmogii, galgabehtet vuolgit dohko. Vare Hearrá, din Ipmil, livččii dinguin!”
1Oppa álbmot čoagganii Čáhcepoartta šilljui. Sii dáhtto čáloahppavačča Esra viežžat girjegearu mas lei Mosesa láhka, man Hearrá lei addán Israelii. 2Báhppa Esra buvttii lága searvegotti ovdii. Das ledje olbmát ja nissonat, buohkat geat nagadedje ipmirdit maid gulle. Dalle lei čihččet mánu vuosttaš beaivi. 3Esra čuoččui Čáhcepoartta šiljus árra iđida rájes gitta gaskabeaivvi rádjái ja logai lága olbmáide ja nissoniidda ja buohkaide geat nagadedje áddet, ja buohkat guldaledje dárkilit mii láhkagirjjis daddjojuvvui. 4Esra, čáloahppavaš, čuoččui muorraaládasa alde mii lei ráhkaduvvon aiddo dán várás. Su olgeš bealde čužžo Mattitja, Šema, Anaja, Uria, Hilkia ja Maaseja ja su gurut bealdegis Pedaja, Mišael, Malkia, Hašum, Hašbaddana, Sakarja ja Mešullam. 5Esra rabastii girjegearu buohkaid oaidnut – son čuoččui badjeleappos go earát – ja go son rabastii dan, de oppa álbmot čuožžilii. 6Esra máinnui Hearrá, stuorra Ipmila, ja oppa álbmot bajidii gieđaid ja čuorvvui: “Amen, amen!” Sii čippostedje ja rohkadalle Hearrá eatnamii muođuid. 7Go álbmot fas lei čuožžilan, de levilaččat Ješua, Bani, Šerebja, Jamin, Akkub, Šabbetai, Hodia, Maaseja, Kelita, Asarja, Josabad, Hanan ja Pelaja čilgejedje dasa lága. 8Sii lohke Ipmila láhkagirjji, dulkojedje ja čilgejedje dan, nu ahte olbmot áddejedje dan mii lohkkojuvvui. 9Eatnanhearrá Nehemja, báhppa Esra, čáloahppavaš, ja levilaččat geat oahpahedje álbmoga, dadje sidjiide: “Dát beaivi lea basuhuvvon Hearrái, din Ipmilii. Allet moraš alletge čiero!” Dasgo buohkat čirro go gulle mii láhkii lei čállojuvvon. 10De Esra dajai sidjiide: “Mannet dál ruoktot, borret ávvubiepmu ja juhket njálgga viinni, ja addet daiddage geain ii leat mihkkege. Dát beaivihan lea basuhuvvon min Hearrái. Allet leage morrašis, dasgo illu man Hearrá addá lea din fápmu.” 11Levilaččat oadjudedje álbmoga ja dadje: “Lehket muosis, dát beaivi lea bassi. Allet moraš!” 12De buohkat vulge ruoktot borrat ja juhkat, ja sii adde attáldagaid ja dolle stuorra ávvudeami, dasgo sii ledje ádden dan mii sidjiide lei oahpahuvvon.