Juovlaevangeliuma

Roma keaisár gohčui
buohkaid čálihit iežaset olmmošlohkui
dan báikkis gos sin sohka lei eret.
Son dáhtui diehtit man olu olbmuid badjel son ráđđii.
Ja oallugat ferteje vuolgit mátkkoštit.

Jovsset ja Márjá leigga manname Betleheibmii.
Soai bággehalaiga vuolgit dohko.
Márjjá čoavji lei stuoris ja lossat,
son galggai fargga riegádahttit.
Jovsset veahkehii su nu bures go sáhtii.
Go soai viimmát bođiiga Betleheibmii,
de doppe ii lean vejolaš gávdnat idjadansaji.

“Moai ferteje beassat sisa muhtin sadjái”, dajai Josef,
“ii son sáhte riegádahttit olgun ihkku!”
Soai oaččuiga saji muhtin stáljas,
áseniid ja vuovssáid orrunsajis.

Dan ija riegádii mánná.
Son bárggádii iežas vuosttaš bárgganasa
ja nohkai gallás Márjjá sallii.
Son bijai su kruppá sisa.

Guohtoneatnamiin báittii čuovga.
Dat lei eŋgel gii suoŋardii nu šearradit
ahte guođoheaddji geat ledje sávzzaid guođoheame,
ballágohte. Muhto eŋgel celkkii sidjiide:
“Allet bala! Odne lea beasti riegádan!
Son veallá kruppá siste.”

Ja fáhkkestaga ihte dievva eŋgeljovkkožat
mat čuvgeje almmi ja máidno Ipmila:
“Gudni lehkos Ipmilii allagasas
ja ráfi eatnama alde olbmuide geaid Ipmil ráhkista.”

Go eŋgelat jávke, de doapmaledje guođoheaddjit vuolgit.
Sii gávdne Márjjá ja Jovsseha ja dan unna mánáža kruppá siste.
Sii muitaledje dan mii lei meahcis dáhpáhuvvan.

Buot lei nu mot eŋgelat ledje muitalan.
De vulge guođoheaddjit fas iluin stálja luhtte ruoktot,
ja sii lávlo – sii maid.

Márjá vurkii váibmosis buot dan mii lei daddjon,
ja jurddašii dan birra.
Ja Jovsset govččai biktasiinnis su ja máná.

Viečča nuvttá ivdnenárkkaid iežat mašiidnii

Loga muitalusa Biibbalis

1Daid beivviid keaisár Augustus attii gohččuma ahte oppa máilbmi galggai čálihuvvot olmmošlohkui. 2Dat lei vuosttaš čáliheapmi ja dáhpáhuvai dalle go Kvirinius lei Syria eatnanhearrán. 3Buohkat vulge čálihit iežaset olmmošlohkui, iešguhtege gávpogasas. 4Josef maid vulggii Galileas, Nasareta gávpogis, ja manai čálihit iežas olmmošlohkui Judeai, Davida gávpogii Betlehemii, danne go son lei Davida viesu ja soga olmmoš. 5Son vulggii dohko oktan Mariain gii lei lohpiduvvon sutnje áhkkán ja lei máná vuostá. 6Go soai leigga doppe, de dievai Maria riegádahttináigi, 7ja son riegádahtii bártnis, vuosttašriegádeaddji. Son giesai máná ja bijai su krubbái, dasgo sudnuide ii lean sadji guosseviesus. 8Dan guovllus ledje oapmegeahččit guođoheamen ealuset ihkku. 9Fáhkkestaga sin ovddas čuoččui Hearrá eŋgel, ja Hearrá hearvásvuohta báittii sin birra, ja sii suorganedje sakka. 10Muhto eŋgel celkkii sidjiide: “Allet bala! Mun buvttán didjiide stuorra illusága, ilu oppa álbmogii. 11Didjiide lea odne riegádan Beasti Davida gávpogis. Son lea Kristus, Hearrá. 12Dát lea didjiide mearkan: Dii gávdnabehtet máná gissojuvvon ja veallámin kruppás.” 13Ja dallánaga eŋgela luhtte lei almmálaš veaga eatnatvuohta mii máinnui Ipmila: 14“Gudni lehkos Ipmilii allagasas ja ráfi eatnama alde olbmuide geaid Ipmil ráhkista.” 15Go eŋgelat ledje mannan sin luhtte albmái, de oapmegeahččit dadje guhtet guoibmáseaset: “Vulgot Betlehemii geahččat dan mii lea dáhpáhuvvan ja maid Hearrá midjiide almmuhii.” 16Sii vulge hoahpus ja gávdne Maria ja Josefa ja mánáža mii veallái kruppás. 17Go sii oidne máná, de sii muitaledje buot mii lei celkojuvvon sidjiide máná birra. 18Buohkat geat dan gulle, ovddošedje dan maid oapmegeahččit muitaledje. 19Muhto Maria vurkii váibmosis buot mii lei dáhpáhuvvan, ja guorahalai dan. 20Oapmegeahččit máhcce ruoktot ja máidno ja rámidedje Ipmila buot das maid ledje gullan ja oaidnán. Visot lei nugo sidjiide lei celkojuvvon.

Les i nettbibelen