Logi báhkkoma

Israellaččat ledje vánddardan sáttomeahcis golbma mánu.
Go ollejedje Sinai vári vuollái, de sii luoitaledje.
Moses manai Sinai várrái hupmat Ipmiliin.

Vári nalde dajai Ipmil Mosesii:
«Muitte movt mun gádjon din.
Mun áiggun dinguin dahkat lihtu.
Jus dii doallabehtet mu báhkkomiid,
de galgá din álbmot leat mávssolaš ja bassi.»

Moses njiejai váris vulos álbmoga lusa ja sárdnidii sidjiide.
Álbmot dajai: «Mii áigut čuovvut Hearrá.»
De iđii suhkkes balva vári nala,
dat álttagastti ja bajánastti, várri doarggistii,
ja alla dorvečuodjan gullui.

Buohkat doarggistedje balus,
sii balle ahte jápmit.
«Ale sártno midjiide, Ipmil!» sii čurvo.
«Sártno minguin Mosesa bokte!»
dan botta go Moses manai balvva lagaibuidda.

Son oaččui Ipmilis dan logi báhkkoma.
Ipmil celkkii:
«Eai dus galggat leat eará ipmilat go mun.
It don galgga atnit Hearrá, du Ipmilat, nama duššálažžan.
Don galggat atnit vuoiŋŋastanbeaivvi bassin.
Don galggat gudnejahttit du áhčát ja du eatnát, vai bures dutnje geavvá.
It don galgga goddit.
It don galgga rihkkut náittusdili.
It don galgga suoládit.
It don galgga gielistit.
It don galgga anistuvvat lagamuččat opmodaga.
It don galgga anistuvvat lagamuččat beallelačča, bálvvá, oami dahje
maidege mii gullá du lagamužžii.»

Moses njiejai váris.
Son muitalii sidjiide maid Ipmil lei lohkan.
Go olbmot gulle báhkkomiid, de sii gopmirdedje.
Sii dadje: «Buot maid Ipmil lea cealkán, mii dahkat.»

Loga muitalusa Biibbalis

1Goalmmát mánočalbmebeaivvi das maŋŋil go israellaččat ledje vuolgán Egyptas, sii bohte Sinaimeahccái. 2Sii johttájedje Refidimis, ja go sii ledje boahtán Sinaimeahccái, de sii luoitaledje dohko. Sii luoitaledje vári vuollái. 3Moses goarkŋui Ipmila lusa, ja Hearrá sártnui sutnje vári alde: “Ná galggat cealkit Jakoba sohkii ja almmuhit Israela álbmogii: 4Dii lehpet ieža oaidnán maid mun dahken egyptalaččaide, ja mo mun goaskima soajáiguin lean guoddán din ja buktán din deike iežan lusa. 5Jos dii dál gullabehtet mu ja doallabehtet mu lihtu, de dii lehpet mu iehčan mávssolaš opmodat ovdalii buot álbmogiid, dasgo oppa eanan gullá munnje. 6Ja dii galgabehtet leat munnje báhpaid riika ja bassi álbmot. Dán don galggat sárdnut israellaččaide.” 7Go Moses lei máhccan, de son rávkkai čoahkkái álbmoga vuorrasiid ja muitalii sidjiide maid Hearrá lei gohččon su dadjat. 8Ja oppa álbmot vástidii ovtta jitnii: “Mii dahkat buot maid Hearrá lea sárdnon.” Moses doalvvui álbmoga vástádusa Hearrái. 9Hearrá celkkii Mosesii: “Mun boađán du lusa suhkkes balvvas, vai álbmot gullá mu sárdnumin duinna, ja danne luohttá dutnje álo.” Go Moses lei muitalan Hearrái álbmoga vástádusa, 10de Hearrá celkkii Mosesii: “Mana álbmoga lusa ja gohčo buohkaid basuhit iežaset odne ja ihttin ja bassat biktasiiddiset. 11Sii galget leat gárvásat goalmmát beaivái, danne go goalmmát beaivvi Hearrá njiedjá Sinaivárrái oppa álbmoga oaidnut. 12Bija vári birra ráji ja várre álbmoga goargŋumis dohko dahje oppa guoskamisge várrái. Juohkehaš gii guoská várrái, galgá ráŋggáštuvvot jápmimiin. 13Ii oktage giehta oaččo guoskat sutnje: Su galgá geađgádit dahje báhčit. Leažžá dal ealli dahje olmmoš, dat ii oaččo báhcit heggii. Go dorve gullo čuodjamin, de olbmot ožžot goargŋut várrái.” 14Moses njiejai váris álbmoga lusa. Son basuhii israellaččaid, ja sii basse maid biktasiiddiset. 15De Moses dajai álbmogii: “Lehket gárvásat goalmmát beaivái. Ii oktage oaččo guoskat nissonii.” 16Go šattai iđit goalmmát beaivvi, de baján gullui ja álddagasat časke. Suhkkes balva luoitádii vári badjelii ja gullui hui garra dorvečuodjan. Buohkat geat ledje siiddas, doarggistedje balus. 17De Moses doalvvui álbmoga siiddas olggos Ipmila ovddal, ja sii bisánedje vári vuollái. 18Oppa Sinaivárri lei suovvan, danin go Hearrá njiejai várrái dolas. Suovva badjánii dego báhkka uvnnas, ja oppa várri doarggistii sakka. 19Dorvečuodjan lassánii ahte lassánii, Moses sártnui, ja Ipmil vástidii sutnje jitnosii. 20Go Hearrá lei loaiddastan Sinaivári čohkkii, de son gohčui lusas Mosesa, ja Moses goarkŋui dohko. 21Hearrá celkkii Mosesii: “Njieja váris ja várre álbmoga amaset bahkket Hearrá lahka ja viggat oaidnit su, dasgo muđui eatnagat sis jápmet. 22Maiddái báhpat geat muđui ožžot lahkanit Hearrái, galget basuhit iežaset, vai Hearrá ii duššadivčče sin.” 23Moses celkkii Hearrái: “Álbmot ii oaččo goargŋut Sinaivárrái, danne go don leat várren min ja gohččot mu bidjat ráji vári birra ja gulahit vári bassin.” 24De Hearrá celkkii sutnje: “Njieja váris ja máhca deike fas oktan Aroniin! Muhto báhpat ja álbmot eai oaččo bahkket Hearrá lusa, vai son ii časkkáše sin.” 25Moses njiejai váris muitalit dán álbmogii. 1Ipmil sártnui buot dán: 2“Mun lean Hearrá, du Ipmil, gii bukten du Egyptas, šlávvaviesus. 3Dus eai oaččo leat eará ipmilat go mun. 4Don it oaččo dahkat alccesat ipmilgova itge makkárge hámi das mii lea badjin almmis, it das mii lea vuollin eatnama alde itge das mii lea čáziin eatnama vuolde. 5Don it oaččo rohkadallat daid itge bálvalit daid, danne go mun, Hearrá, du Ipmil, lean áŋgiris Ipmil, gii mávssahan áhčiid vearredaguid mánáide gitta goalmmát ja njealját bulvii daidda geat vašuhit mu, 6muhto árkkálmasttán duháhiid go sii ráhkistit mu ja dollet mu báhkkomiid. 7Don it oaččo cealkit duššás Hearrá, Ipmilat, nama, dasgo Hearrá ii loga sivaheapmin dan gii cealká duššás su nama. 8Ane muittus sabbatbeaivvi nu ahte don basuhat dan. 9Guhtta beaivvi don galggat bargat ja doaimmahit buot bargguidat, 10muhto čihččet beaivi lea Hearrá, du Ipmila, sabbat. Dalle don it oaččo bargat maidege, it don iige du bárdni iige du nieida, ii du šlávva iige du šlávvanisson, eai du oamit iige vieris gii ássá du gávpogiin. 11Dasgo guđa beaivvis Hearrá dagai almmi ja eatnama ja meara ja buot mii dain lea, muhto čihččet beaivvi son vuoiŋŋastii. Dan dihte Hearrá lea buressivdnidan sabbatbeaivvi ja basuhan dan. 12Gudnejahte áhčát ja eatnát, vai oaččut eallit guhká dan eatnamis maid Hearrá, du Ipmil, addá dutnje. 13Don it oaččo goddit. 14Don it oaččo rihkkut náittosdili. 15Don it oaččo suoládit. 16Don it oaččo cealkit vearreduođaštusa lagamuččat vuostá. 17Don it oaččo anistuvvat lagamuččat vissui. Don it oaččo anistuvvat lagamuččat áhkkái, it su šlávvii itge su šlávvanissonii, it su vuoksái itge su ásenii itge masage mii gullá du lagamužžii.”

Les i nettbibelen