Eahkedismállásat

Olgun lei seavdnjat, muhto siste lei čuovgat.
Ginttalčuovggat bulle beavdde alde.
“Dál mii galgat ávvudit”, dajai Jesus.
Sii borre ovttas beassášmállásiid,
lávlo ja loktejedje cerkkiideaset.

De válddi Jesus láibbi.
Son giittii, doadjalii dan ja attii bihtá guhtiide.
Sii doivo son áiggui dadjat:
Dát galgá muittuhit din dan láibbi mii láibojuvvui hoahpus.
Láibbi maid min álbmot galggai borrat dan ija go ledje gergosat vuolgit
eret Egypta šlávvavuođas.
Muhto son ii dadjan nu. Son dajai baicce:
«Dát lea mu rumaš. Mun attán dan din ovddas.»

De son loktii geara mas lei viidni.
Son rohkadalai ja attii juohkehažžii vehá jugestit.
Sii doivo son áiggui dadjat:
Dát galgá muittuhit din lábbá vara mii njuvvojuvvui,
dan vara mii sihkkojuvvui uksabealláide mearkan,
vai jápmin manai meattá daid viesuid dan ija go
álbmot vulggii eret Egyptas.
Muhto son ii dadjan nu. Son dajai baicce:
«Dát lea mu varra. Mun attán dan din ovddas.»

Máhttájeaddjit borre ja juhke.
Jesus rohkadalai sin ovddas ja dajai: «Orrot mu siste.».
Ja de sii gerge eahkedismállásiiguin.
Sii jáddadedje gintaliid ja manne olggos fárrolaga. Lei idja.

Last ned gratis fargeleggingsark

Loga muitalusa Biibbalis

26Go sii ledje boradeamen, de Jesus válddii láibbi, giittii, doadjalii, attii dan máhttájeddjiidasas ja celkkii: “Váldet ja borret, dát lea mu rumaš.” 27De son válddii geara, giittii Ipmila, attii sidjiide ja celkkii: “Juhket dás, dii buohkat. 28Dát lea mu varra, lihtu varra mii golggahuvvo eatnagiid ovddas suttuid ándagassii addojupmin. 29Mun cealkkán didjiide: Mun in šat máistte viidnemuora šaddosa ovdal go dan beaivvi go jugan ođđa viinni dinguin Áhččán riikkas.”

Les i nettbibelen

1Hearrá celkkii Mosesii ja Aronii Egyptas: 2“Dát mánnu galgá leat din mánuin vuosttamuš. Dat galgá leat didjiide jagi vuosttaš mánnu. 3Cealki oppa Israela searvegoddái: Dán mánu logát beaivvi juohke dáluisit galgá váldit lábbá dahje gihci, ovtta lábbá dahje gihci ain bearraša ja viesu nammii. 4Jos bearaš lea ilá unni borrat oppa ealli, de dáluisit galgá váldit ealli ovttas lagamus siidaguimmiinis olbmuid logu mielde. Dii galgabehtet dan vuođul meroštallat man ollu iešguhtege borrá. 5Ealli galgá leat almmá vigi haga, jahkásaš varis, láppis dahje gihcci. 6Atnet dan áimmuin dán mánu njealljenuppelogát beaivvi rádjái, ja de oppa Israela searvegotti čoagganeapmi galgá njuovvat dan eahkedisveaigin. 7Váldet dan vara ja sihkkot dan uksastoalppuide ja uksabielkái dain viesuin main sii borret lábbá. 8Borret bierggu dan seammá ija, basset dan dolas ja borret dan oktan suvrutkeahtes láibbiin ja rihča urtasiiguin. 9Ehpet oaččo borrat das maidege njuoskkasin dahje čázis vuššojuvvon, muhto galgabehtet bassit dan dolas oktan oivviin, julggiiguin ja siskilušaiguin. 10Ehpet oaččo guođđit das maidege iđedassii; jos mihkkege báhcá iđedassii, de dat galgá boldojuvvot. 11Go dii lehpet boradeamen, de dis galgá leat gákti boahkánastojuvvon, gápmagat juolggis ja soabbi gieđas, ja dii galgabehtet boradit hoahpus. Dat leat Hearrá beassážat. 12Dan ija mun jođán miehtá Egypta ja gottán Egyptas juohke vuosttašriegádeaddji, sihke olbmuid ja elliid vuosttašriegádeddjiid, ja mun dubmen buot Egypta ipmiliid. Mun lean Hearrá. 13Varra galgá leat mearkan dain viesuin main dii lehpet. Go mun oainnán vara, de mun manan meaddel, iige duššadeaddji časkkástat deaivva din, go mun časkkán Egypta. 14Dát beaivi galgá leat didjiide muitobeaivi. Dollet dan Hearrá bassin. Atnet dan agálaš ásahussan buolvvas bulvii.

Les i nettbibelen