1Das maŋŋil Moses ja Aron manaiga farao lusa ja dajaiga: “Ná cealká Hearrá, Israela Ipmil: Luoitte mu álbmoga vuolgit, vai sii besset doallat meahcis basiid mu gudnin.” 2Farao jearai: “Gii lea Hearrá? Galggašingo mun jeagadit su ja luoitit Israela vuolgit? Mun in dovdda Hearrá inge áiggo luoitit Israela vuolgit.” 3Soai vástideigga: “Hebrealaččaid Ipmil lea almmustuvvan midjiide. Divtte min mannat golmma beaivása duohkái meahccái oaffaruššat Hearrái, Ipmilasamet, vai son ii časkkáše min rohttudávddain iige mihkiin.” 4Muhto Egypta gonagas dajai sudnuide: “Manne doai, Moses ja Aron, hehttebeahtti álbmoga bargamis? Mannet bargat!” 5Ja farao dajai vel: “Dan álbmoga olbmot leat juo eanebut go eatnama iežas olbmot, ja doai dáhttubeahtti bissehit sin bargamis!” 6Seammá beaivvi farao cealkkihii fálddiide ja hoavddaide: 7“Allet atte šat álbmogii oalggaid tiilabargguid várás nugo ovdal. Sii galget ieža mannat čoaggit oalggaid. 8Bidjet sin dattetge ráhkadit seammá ollu tiillaid go ovdalge, alletge geahpet das maidege. Sii leat láikkit, danin sii huiket: Mii dáhttut mannat oaffaruššat Ipmilasamet! 9Olbmáid galgá bidjat garra bargui, vai sis lea dahkamuš galle, eaige sii astta guldalit giellásiid.” 10Fálddit ja hoavddat manne dadjat israellaččaide: “Farao cealká ahte son ii atte šat didjiide oalggaid. 11Dii fertebehtet ieža háhkat alcceseattet oalggaid, muhto beaivebarggu tiillaid lohku ii oaččo geahppánit.” 12Nu álbmot bieđganii miehtá Egypta čoaggit oalggaid tiillaid várás. 13Muhto fálddit gevrejedje sin ja dadje: “Ollašuhttet beaivebargguideattet nugo dallege go oaččuidet oalggaid.” 14Israellaččaid iežaset hoavddat geaid farao fálddit ledje bidjan jođihit sin, cápmáhalle. Fálddit dadje sidjiide: “Manne dii ehpet leat ikte ehpetge odne dahkan seammá ollu tiillaid go ovdal?” 15Dalle israellaččaid hoavddat manne váidalit faraoi ja dadje: “Manne don meannudat ná bálvaleddjiidatguin? 16Oalggaid mii eat oaččo, muhto almmatge midjiide daddjojuvvo ahte galgat dahkat tiillaid. Du bálvaleaddjit cápmáhallet, vaikko dii lehpet sivalaččat.” 17Muhto farao dajai: “Láikkit dii lehpet, láikkit! Aiddo danin dii bivdibehtet beassat oaffaruššat Hearrái! 18Mannet dállánaga bargat! Oalggaid dii ehpet oaččo, muhto tiillaid dii galgabehtet gerget seammá ollu go ovdalge.” 19De israellaččaid hoavddat ipmirdedje ahte sii ledje bahás bárttis, go sidjiide daddjojuvvui ahte sii eai oaččo geahpedit beaivebarggu tiilalogu. 20Go sii vulge farao luhtte, de sii deive Arona ja Mosesa geat leigga vuordimin sin. 21Sii dadje sudnuide: “Vare Hearrá mávssahivččii dudnuide ja dubmešii dudno, danin go dat lea dudno sivva ahte farao ja su hoavvaolbmát eai šat gierdda min. Doai leahppi addán sin gihtii miehki mainna sii goddet min.” 22Dalle Moses jorgalii fas Hearrá beallái ja dajai: “Hearrá, manin don dagahat lihkuhisvuođa dán álbmogii? Manin don vuolggahit mu? 23Dan rájes go mun mannen farao lusa sárdnut du nammii, de son lea meannudan bahás dáinna álbmogiin, itge don eisege leat gádjon iežat álbmoga.” 1Hearrá celkkii Mosesii: “Dál don beasat oaidnit maid mun dagan faraoi: Mu gievrras giehta bágge su luoitit israellaččaid vuolgit, son njulgestaga ádjá sin eret iežas eatnamis.” 2Ipmil sártnui Mosesii: “Mun lean Hearrá. 3Mun almmustuvven Abrahamii, Isakii ja Jakobii Buotveagalaš Ipmilin, muhto iežan nama Hearrá mun in almmuhan sidjiide. 4Mun dahken maiddái lihtu singuin ja lohpidin addit sidjiide Kanaana, dan eatnama gos sii ásse vierisin. 5Dál mun lean gullan israellaččaid šuohkáhusaid, go egyptalaččat atnet sin šlávvan, ja mun lean muitán iežan lihtu. 6Cealkke dan dihte israellaččaide: Mun lean Hearrá, mun doalvvun din eret Egypta bággobarggus ja beasttán din šlávvavuođas. Mun luoittán din friddjan geigejuvvon gieđain ja stuorra ráŋggáštusaiguin. 7Mun válddán din iežan álbmogin ja lean din Ipmil, ja dii beassabehtet dovdat ahte mun lean Hearrá, din Ipmil, gii doalvvun din eret Egypta bággobarggus. 8Mun doalvvun din dan eatnamii maid mun vurdnon addit Abrahamii, Isakii ja Jakobii. Mun attán dan didjiide árbin ja opmodahkan. Mun lean Hearrá.” 9Dán Moses sártnui israellaččaide, muhto garra barggu dihte sii eai nagodan guldalit su. 10Dalle Hearrá sártnui Mosesii: 11“Mana dadjat faraoi, Egypta gonagassii, ahte son galgá luoitit israellaččaid vuolgit eatnamis.” 12Moses vástidii Hearrái: “Israellaččat eai guldal mu. Mo dasto farao guldalivččii mu? Munhan illá máhtán rabastit njálmmige.” 13Muhto Hearrá gohčui Mosesa ja Arona mannat israellaččaid lusa ja farao, Egypta gonagasa, lusa ja doalvut israellaččaid eret Egypta eatnamis. 14Dát ledje guđege soga oaivámuččat: Rubena, Israela vuosttašriegádeaddji, bártnit ledje Henok, Pallu, Hesron ja Karmi. Dát ledje Rubena čeardda bearrašat. 15Simeona bártnit ledje Jemuel, Jamin, Ohad, Jakin, Sohar ja Saul, gean eadni lei kanaanlaš nisson. Dát ledje Simeon čeardda bearrašat. 16Dát ledje Levi bártnit agi mielde logahallojuvvon: Geršon, Kehat ja Merari. Levi elii čuođigolbmalogičieža jagi. 17Geršona náli olbmot ledje Libni ja Šimi ja sudno bearrašat. 18Kehata bártnit ledje Amram, Jishar, Hebron ja Ussiel. Kehat elii čuođigolbmalogigolbma jagi. 19Merari bártnit ledje Mahli ja Muši. Dát ledje Levi čeardda sogat agi mielde logahallojuvvon. 20Amram válddii áhkkán siesás Jokebeda gii riegádahtii sutnje Arona ja Mosesa. Amram elii čuođigolbmalogičieža jagi. 21Jishara bártnit ledje Korah, Nefeg ja Sikri. 22Ussiela bártnit ledje Mišael, Elsafan ja Sitri. 23Aron válddii áhkkán Elišeba, Amminadaba nieidda, Nahšona oappá. Elišeba riegádahtii sutnje Nadaba, Abihu, Elasara ja Itamara. 24Koraha bártnit ledje Assir, Elkana ja Abiasaf. Dát ledje korahlaččaid bearrašat. 25Arona bárdni Elasar válddii áhkkán ovtta Putiela nieiddain, gii riegádahtii sutnje Pinehasa. Dát ledje levilaččaid sogaid oaivámuččat logahallojuvvon bearrašiid mielde. 26Aron ja Moses leigga dat geaidda Hearrá celkkii: “Doalvu israellaččaid eret Egyptas veagaid mielde.” 27Aiddo dát guovttos, Moses ja Aron, sártnuiga faraoi, Egypta gonagassii, ahte israellaččat galget luitojuvvot eret eatnamis. 28Ná Hearrá sártnui Mosesii Egyptas: 29“Mun lean Hearrá. Cealkke faraoi, Egypta gonagassii, buot maid mun sártnun dutnje.” 30Muhto Moses vástidii Hearrái: “Munhan illá máhtán rabastit njálmmige. Mo dasto farao guldalivččii mu?” 1Hearrá sártnui Mosesii: “Mun bijan du ipmilin faraoi, ja du viellja Aron šaddá du profehtan. 2Don galggat sárdnut Aronii buot maid mun gohčun, ja du viellja Aron galgá sárdnut dan faraoi, vai son luoittášii israellaččaid vuolgit eatnamis. 3Muhto mun buoššudan farao váimmu, iige son guldal dudno, vaikko mun dagan Egyptas máŋga mearkka ja oavddu. 4Mun lokten gieđa Egypta vuostá ja doalvvun iežan soahteveagaid, iežan álbmoga, israellaččaid, eret Egyptas stuorra ráŋggáštusduomuiguin. 5Go mun geigen gieđa Egypta vuostá ja doalvvun israellaččaid doppe eret, de egyptalaččat ipmirdit ahte mun lean Hearrá.” 6Moses ja Aron dagaiga nugo Hearrá lei gohččon. 7Moses lei gávccilogijahkásaš ja Aron gávccilogigolmmajahkásaš go soai sártnuiga faraoi. 8Hearrá sártnui Mosesii ja Aronii: 9“Go farao sárdnu dudnuide ja gohčču dahkat muhtun oavddu, de cealkke dalle Aronii: ‘Váldde soappát ja bálkes dan farao ovdii, de dat nuppástuvvá stuorra gearpmašin.’” 10Nu Moses ja Aron manaiga farao lusa ja dagaiga nugo Hearrá lei gohččon. Aron bálkestii soappi farao ja su hoavvaolbmáid ovdii, ja dat nuppástuvai gearpmašin. 11Dalle farao rávkkai lusas iežas eatnama viisáid ja noiddiid, ja Egypta diehttit dahke seammá ládje čiegus goansttaideasetguin: 12Iešguhtege sis bálkestii soappis eatnamii, ja dat nuppástuvve gearpmašin. Muhto Arona soabbi njielai sin soppiid. 13Farao buoššudii váimmus iige guldalan sudno, nugo Hearrá lei sárdnon. 14Hearrá sártnui Mosesii: “Farao váibmu lea gážžár. Son biehttala luoitimis álbmoga vuolgit. 15Mana farao lusa árrat iđedis go son lea mannamin eatnogáddái. Mana su ovddal ja váldde mielde soappi mii nuppástuvai gearpmašin. 16Cealkke sutnje: Hearrá, hebrealaččaid Ipmil, vuolggahii mu du lusa bivdit ahte don luoittát su álbmoga bálvalit su meahcis. Muhto dán rádjái don it leat doahttalan. 17Danin Hearrá cealká: Dát čájeha dutnje ahte mun lean Hearrá. Go mun časkkán Nileanu čázi dáinna soppiin mii mus lea gieđas, de čáhci nuppástuvvá varran. 18Nileanu guolit jápmet ja eatnu háisugoahtá, nu ahte egyptalaččat eai sáhte juhkat dan čázi.” 19Hearrá sártnui vel Mosesii: “Gohčo Arona váldit soappis ja geiget dan Egypta čáziid badjel, dan jogaid, kanálaid ja ládduid badjel, buot daid báikkiid badjel maidda lea čoggon čáhci. Dalle čáhci nuppástuvvá varran, ja varra lea oppa Egyptas, velá muorralihtiin ja geađgeruhkuinge.” 20Moses ja Aron dagaiga nugo Hearrá lei gohččon. Aron geigii soappis ja časkkii dainna Nileanu čázi farao ja su hoavvaolbmáid oaidnut, ja buot čáhci nuppástuvai varran. 21Guolit jápme ja eatnu háisugođii, nu ahte egyptalaččat eai sáhttán juhkat dan čázi. Varra lei juohke sajis Egyptas. 22Muhto Egypta diehttit dahke seammá láhkái čiegus goansttaideasetguin. Farao váibmu bisui gážžárin, iige son guldalan Mosesa ja Arona, nugo Hearrá lei sárdnon. 23Farao vulggii ruoktot šloahttasis iige beroštan dán oavddusge. 24Muhto egyptalaččat šadde roggat Nileanu gáddeguorain juhkančázi, danin go eanu čázi sii eai sáhttán juhkat. 25Čieža beaivvi golle das go Hearrá lei časkán Nileanu. 1Dalle Hearrá sártnui Mosesii: “Mana farao lusa ja cealkke sutnje: Ná cealká Hearrá: Luoitte mu álbmoga vuolgit, vai sii besset bálvalit mu. 2Jos don biehttalat luoitimis álbmoga, de mun divttán cubbuid váivvidit oppa du eatnama. 3Eanus guđaidit cubbot, ja dat gorgŋot goikásii ja čákŋet du šlohttii, du oađđingámmárii ja du seŋgii, du hoavvaolbmáid ja du álbmoga viesuide, du eatnama buot láibunuvnnaide ja dáigegáriide. 4Cubbot šaddet du ja du álbmoga ja buot du hoavvaolbmáid giksin.” 5Hearrá sártnui Mosesii: “Gohčo Arona geiget soappis jogaid, kanálaid ja ládduid badjel ja čuoččáldahttit cubbuid Egypta giksin.” 6De Aron geigii soappis Egypta čáziid badjel, ja cubbot bohte goikásii ja gokče oppa Egypta. 7Muhto diehttit dahke seammá láhkái čiegus goansttaideasetguin ja čuoččáldahtte cubbuid Egyptii. 8Dalle farao rávkkai Mosesa ja Arona lusas ja dajai: “Rohkadalli Hearrá váldit eret cubbuid givssideames mu ja mu álbmoga, de mun luoittán dudno álbmoga oaffaruššat Hearrái.” 9Moses dajai faraoi: “Don oaččut almmuhit mearreáiggi. Mun rohkadalan du, du hoavvaolbmáid ja du álbmoga ovddas, ja mearreáiggis cubbot jávket givssideames du ja dán eatnama viesuid, ja dat báhcet dušše Niletnui.” 10Farao vástidii: “Ihttin.” Moses dajai: “Šaddos nugo leat dadjan, vai dieđášit ahte ii leat oktage Hearrá, min Ipmila, veardásaš. 11Cubbot gáidet eret du viesuin, du hoavvaolbmáid ja du álbmoga luhtte, ja dušše Niletnui báhcet vel cubbot.” 12Moses ja Aron manaiga eret farao luhtte, ja Moses rohkadalai ja ánui Hearrá váldit eret cubbuid maid son lei bidjan farao giksin. 13Hearrá dagai nugo Moses ánui, ja cubbot jápme viesuide, šiljuide ja bealdduide. 14Dat čoggojuvvojedje guhpán, ja oppa eanan háisugođii. 15Muhto go farao oinnii ahte giksi lei vássán, de son buoššudii váimmus iige guldalan sudno, nugo Hearrá lei cealkán. 16Hearrá sártnui Mosesii: “Gohčo Arona geiget soappi ja časkit eatnama, de dan gavjjas šaddet čuoikkat oppa Egyptii.” 17Soai dagaiga nu. Aron geigii gieđa ja časkkii soppiinis eatnama, ja čuoikkat givssidišgohte olbmuid ja omiid. Eatnama gavja šattai čuoikan oppa Egyptas. 18Diehttit geahččaledje maiddái dahkat čuoikkaid čiegus goansttaideasetguin, muhto eai máhttán. Ja go čuoikkat givssidedje olbmuid ja omiid, 19de diehttit dadje faraoi: “Dát lea Ipmila suorbma.” Muhto farao buoššudii váimmus iige guldalan Mosesa ja Arona, nugo Hearrá lei cealkán. 20Hearrá sártnui Mosesii: “Mana árrat iđedis farao ovddal go son lea mannamin Nileanu gáddái, ja cealkke sutnje: Ná cealká Hearrá: Luoitte mu álbmoga vuolgit, vai sii besset bálvalit mu. 21Jos don it luoitte mu álbmoga, de mun vuolggahan čurotmođiid váivvidit du, du hoavvaolbmáid ja du álbmoga, nu ahte Egypta viesuid ja eatnama dievva leat čurohat. 22Muhto mun várjalan Gosena gos mu álbmot ássá, nu ahte dohko dat eai boađe. Dalle don ipmirdat ahte mun, Hearrá, lean dán eatnamis. 23Mun dagan erohusa iežan álbmoga ja du álbmoga gaskii. Ihttin dát mearka šaddá.” 24Ja Hearrá dagai nu. Suhkkes čurotmoađit bohte farao šlohttii, su hoavvaolbmáid viesuide ja oppa Egyptii, ja čurohat váivvidedje issorasat oppa eatnama. 25Dalle farao rávkkai lusas Mosesa ja Arona ja dajai: “Mannet ja oaffaruššet Ipmilasadet dáppe Egyptas.” 26Muhto Moses vástidii: “Nie ii heive dahkat, danne go dalle go mii oaffaruššat Hearrái, Ipmilasamet, de egyptalaččat anášedje min oaffara fastin. Jos mii sin oaidnut oaffaruššat oaffara maid sii fasttášit, de sii geađgádit min. 27Mii mannat meahccái golmma beaivása duohkái oaffaruššat Hearrái, Ipmilasamet, nugo son gohčču min.” 28De farao dajai: “Mun divttán din mannat meahccái, vai beassabehtet oaffaruššat Hearrái, Ipmilasadet. Allet fal mana menddo guhkás. Rohkadallet maiddái mu ovddas!” 29Moses dajai: “Dalán go mun lean vuolgán du luhtte, de mun rohkadalan Hearrá, ja ihttin čurohat jávket áŧesteames du, farao, du hoavvaolbmáid ja álbmoga. Ale fal šat beahte min, muhto luoitte min álbmoga mannat oaffaruššat Hearrái.” 30Moses vulggii farao luhtte ja rohkadalai Hearrá. 31Hearrá dagai nugo Moses lei átnon, ja jávkadii čurohiid áŧesteames farao, su hoavvaolbmáid ja su álbmoga, nu ahte ii báhcán ii oktage čurot. 32Muhto farao buoššudii váimmus dán hávege, iige luoitán álbmoga vuolgit. 1Hearrá sártnui Mosesii: “Mana farao lusa ja cealkke sutnje: Ná cealká Hearrá, hebrealaččaid Ipmil: Luoitte mu álbmoga vuolgit, vai sii besset bálvalit mu. 2Jos don biehttalat luoitimis sin ja ain doaladat sin, 3de Hearrá časká garra rohttudávddain du omiid mat leat giettis, heasttaid, áseniid, kamelaid, stuorraomiid ja smávvaomiid. 4Muhto Hearrá dahká erohusa israellaččaid ja egyptalaččaid omiid gaskkas, iige israellaččaid omiin jáme ii oktage. 5Hearrá lea mearridan áiggi ja lea dadjan ahte ihttin son dahká dan dán eatnamis.” 6Maŋit beaivvi Hearrá dagai nugo lei sárdnon. Buot egyptalaččaid oamit jápme, muhto israellaččaid omiin ii jápmán ii oktage. 7Go farao gulaskuttai ášši, de son bođii diehtit ahte ii oktage israellaččaid omiin lean jápmán. Muhto farao buoššudii váimmus, iige son luoitán álbmoga. 8Hearrá sártnui Mosesii ja Aronii: “Váldi uvnnas čorpma dievva gieba, ja Moses galgá bohrralahttit dan áibmui farao ovddas. 9Dalle giehpa bieđgana gavjan miehtá oppa Egypta, ja das šaddet siedjabuhkkot olbmuide ja omiide oppa Egypta eatnamis.” 10Soai válddiiga gieba uvnnas, ja go soai čuoččuiga farao ovddas, de Moses bohrralahtii gieba áibmui, ja olbmuide ja omiide ihte siedjabuhkkot. 11Diehttit eai sáhttán loaiddastit Mosesa ovdii buhkkuid geažil, dasgo buhkkot ledje dihttiin ja eará egyptalaččain. 12Muhto Hearrá buoššudii farao váimmu, iige farao guldalan Mosesa ja Arona, nugo Hearrá lei cealkán Mosesii. 13Hearrá sártnui Mosesii: “Mana árrat iđedis farao lusa ja cealkke sutnje: Ná cealká Hearrá, hebrealaččaid Ipmil: Luoitte mu álbmoga vuolgit, vai sii besset bálvalit mu. 14Dán háve mun divttán buot mu givssiid deaividit du, du hoavvaolbmáid ja du álbmoga, vai don ipmirdivččet ahte máilmmis ii leat oktage mu veardásaš. 15Mun livččen juo ovdal sáhttán geiget gieđa ja časkit du ja du álbmoga rohttudávddain, nu ahte dii livččiidet ollásit sihkkasan eatnama alde. 16Muhto mun lean seastán du, vai beasan čájehit dutnje iežan fámu ja vai mu namma beaggá miehtá máilmmi. 17Muhto jos don ain hehttet mu álbmoga vuolgimis, 18de ihttin dán muttos mun divttán čuorpmastit garrasit, iige Egyptas leat leamaš dakkár dálki goassege dan rájes go Egypta vuođđuduvvui, gitta dán beaivvi rádjái. 19Gohčo dál bidjat suodjái omiidat ja buot mii dus lea olgun. Buot olbmot ja eallit mat leat olgun ja mat eai leat biddjojuvvon suodjái, jápmet go čuorpmasta.” 20Dat farao hoavvaolbmát geat balle Hearrá sánis, bidje bálvaleddjiideaset ja omiideaset suodjái, 21muhto dat geat eai beroštan Hearrá sánis, dikte bálvaleddjiideaset ja omiideaset orrut giettis. 22Hearrá sártnui Mosesii: “Geige gieđa almmi guvlui, de čuorpmastišgoahtá oppa Egyptas olbmuid, omiid ja šattuid ala.” 23Moses geigii soappis almmi guvlui, ja Hearrá divttii boahtit bajána ja čuorbmasiid, ja álddagasat časke eatnamii. Hearrá divttii čuorpmastit miehtá Egypta, 24ja álddagasat šleđgo čuorbmasiid gaskkas. Čuorpmasdálki lei nu garas ahte dakkára ii oktage lean muosáhan Egyptas dan rájes go olbmot ásse dohko. 25Čuorbmasat njeide Egyptas eatnamii buot mii lei olgun, sihke olbmuid ja omiid. Dat duššadedje buot eatnama šattuid ja dodje vel muoraidge. 26Dušše Gosenis gos israellaččat ásse, ii čuorpmastan. 27Farao rávkkai lusas Mosesa ja Arona ja dajai sudnuide: “Dán háve mun lean suddudan. Hearrá lea vuoigadis, ja mun ja mu álbmot leat sivalaččat. 28Rohkadalli Hearrá, dál mii leat ožžon Ipmila bajándálkki ja čuorpmasteami galle. Mun luoittán din mannat. Dii ehpet dárbbaš leat šat dáppe.” 29Moses dajai sutnje: “Go mun vuolggán dán gávpogis, de mun lokten gieđaid ja rohkadalan Hearrá. Dalle baján heaitá jullamis iige šat čuorpmas, ja das don ipmirdat ahte eanan gullá Hearrái. 30Muhto mun dieđán ahte it don eaige du hoavvaolbmát veláge bala Hearrás, Ipmilis.” 31Beallemas ja bivgi lei duššan, danin go bivggis ledje juo gordneoaivvit ja beallemasas diehpit, 32muhto nisut ja spealttat eai lean duššan, dainna go dat láddet maŋŋelis. 33Moses vulggii farao luhtte, manai olggos gávpogis ja loktii gieđaid Hearrá guvlui. Dalle heittii jullamis ja čuorpmasteames, iige arvi šat šoallan. 34Muhto go farao oinnii ahte lei heaitán arvimis, čuorpmasteames ja jullamis, de son suddudii ain ja buoššudii váimmus, son oktan hoavvaolbmáidisguin. 35Farao buoššudii ain váimmus iige luoitán israellaččaid, nugo Hearrá lei sárdnon Mosesa bokte. 1Hearrá celkkii Mosesii: “Mana farao lusa, danin go mun lean buoššudan farao ja su hoavvaolbmáid váimmu, vai beasan dahkat dáid oavdduid sin oaidnut, 2ja vai don sáhtát muitalit iežat mánáide ja mánáid mánáide man garrasit mun meannudin egyptalaččaiguin ja makkár oavdduid mun dahken sin gaskkas. Dalle dii ipmirdehpet ahte mun lean Hearrá.” 3Moses ja Aron manaiga farao lusa ja dajaiga sutnje: “Ná cealká Hearrá, hebrealaččaid Ipmil: Man guhká don biehttalat vuolláneames munnje? Luoitte mu álbmoga vuolgit, vai sii besset bálvalit mu. 4Jos don biehttalat luoitimis mu álbmoga, de ihttin mun divttán rásselohkuid boahtit du eatnamii. 5Dat gokčet eatnama nu ahte eanan ii sáhte oidnojuvvot. Dat borret bázahusaid mat seilo čuorpmasdálkkis, ja dat borret velá buot muoraidge mat šaddet din eatnamis. 6Dat devdet du šloahta ja du hoavvaolbmáid viesuid ja buot eará egyptalaččaid viesuid. Dakkára eai du áhčit eaige máttaráhčit leat oaidnán dan beaivvi rájes go sii ásse dán eatnamii, gitta otná rádjái.” De Moses jorggihii ja vulggii farao luhtte. 7Farao hoavvaolbmát dadje faraoi: “Man guhká dát olmmái galgá leat midjiide giellan? Luoitte Israela olbmáid bálvalit Hearrá, iežaset ipmila. Itgo don veláge ipmir ahte muđui Egypta duššá?” 8Dalle Moses ja Aron vižžojuvvuiga farao lusa, ja farao dajai sudnuide: “Mannet ja bálvalehket Hearrá, ipmileattet. Muhto geat mannet?” 9Moses vástidii: “Mii mannat buohkat, sihke nuorat ja boarrásat. Mii mannat oktan bártniideametguin ja nieiddaideametguin, smávvaomiideametguin ja stuorraomiideametguin, danin go mii doallat basiid Hearrá gudnin.” 10Muhto farao dajai sidjiide: “Vissásit Hearrá livččii dinguin jos mun luoittášin din ja din áhkáid ja mánáid vuolgit! Dies oaidná ahte dis leat bahás áigumušat. 11Dies ii šatta mihkkege, muhto mannet dii olbmát bálvalit Hearrá, danhan dii lehpet gáibidange.” Ja soai áddjojuvvuiga eret farao luhtte. 12Hearrá celkkii Mosesii: “Geige gieđa Egypta badjel ja gohčo rásselohkuid boahtit eatnamii. Dat borret buot eatnama šattuid, buot maid čuorbmasat leat bázahan.” 13Moses geigii soappis Egypta badjel, ja Hearrá divttii nuortabiekka bossut badjel eatnama geažos dan beaivvi ja ija. Go iđit šattai, de nuortabiegga lei buktán rásselohkuid. 14Dat lávde oppa Egyptii ja seivo suhkkes moahtin miehtá oppa eatnama. Dakkár rásselohkkoeatnatvuohta ii leat goassege leamaš ovdal iige goassege šatta maŋŋil. 15Dat gokče eatnama nu ahte dat šattai čáhppadin. Dat borre buot mii šattai eatnamis, ja buot šaddosiid mat ledje báhcán muoraide čuorpmasteami maŋŋá. Ii gostege oppa Egyptas lean šat ruonas, ii muorain iige eatnamis. 16Farao gohčui hoahpus rávkat lusas Mosesa ja Arona ja dajai: “Mun lean suddudan Hearrá, dudno Ipmila, vuostá ja dudno vuostá. 17Addi goit munnje mu suttu ándagassii vel dán háve ja rohkadalli Hearrá, Ipmileatte, vai son jorgalivččii mus eret dán issoras ráŋggáštusa.” 18Moses vulggii farao luhtte ja rohkadalai Hearrá, 19ja Hearrá jorgalii biekka garra orjješbieggan, mii doalvvui rásselohkuid eret ja suhppii daid Ruksesmerrii. Ii báhcán oktage rásselohkku buot Egypta rájiid sisa. 20Muhto Hearrá buoššudii farao váimmu, iige farao luoitán israellaččaid vuolgit. 21Hearrá celkkii Mosesii: “Geige gieđa almmi guvlui, de Egyptii šaddá dakkár seavdnjadas ahte dan sáhttá gieđain duohtadit.” 22Moses geigii gieđa almmi guvlui, ja Egyptii šattai suhkkes seavdnjadas golmma beaivái. 23Olbmot eai oaidnán guhtet guimmiideaset eaige sáhttán mannat gosage golmma beaivái, muhto israellaččaid ássanguovlluin lei čuovgat. 24Farao rávkkai Mosesa lusas ja dajai: “Mannet bálvalit Hearrá. Dušše smávvaoamit ja stuorraoamit galget báhcit. Maiddái din áhkát ja mánát ožžot vuolgit dinguin.” 25Moses vástidii: “Vaikko don ieš attášit midjiide elliid njuovvanoaffarin ja boaldinoaffarin Hearrái, min Ipmilii, 26de min oamit galget maid boahtit min mielde, deike ii oaččo báhcit ii gazzage. Mii váldit omiin dan maid oaffaruššat Hearrái, Ipmilasamet. Mii eat iežage dieđe makkár oaffariiguin mii bálvalit Hearrá, ovdal go leat ollen dohko.” 27Muhto Hearrá buoššudii farao váimmu, iige farao dáhtton luoitit israellaččaid. 28Farao dajai Mosesii: “Mana eret, alege šat boađe mu čalmmiid ovdii. Jos mun vel oktii oainnán du, de don jámát!” 29Moses vástidii: “Don leat vuoigadis. Mun in šat goassege boađe du čalmmiid ovdii.” 1Hearrá celkkii Mosesii: “Vel ovtta givssi mun divttán deaividit farao ja egyptalaččaid. Das maŋŋil son luoitá din vuolgit. Ja go son luoitá din, de son ádjá din buohkaid dáppe eret. 2Cealkke dál álbmogii ahte juohke olmmái ja nisson galgá bivdit ránnjástis silbalihtiid ja gollelihtiid.” 3Hearrá lei dahkan egyptalaččaid miehtemielalažžan israellaččaide, ja farao hoavvaolbmát ja Egypta álbmot atne Mosesa alla árvvus. 4Moses celkkii faraoi: “Ná cealká Hearrá: Gaskaija áigge mun manan Egypta čađa, 5ja dalle Egyptas jápmet buot vuosttašriegádeaddjit, farao vuosttašriegádeaddji rájes gii čohkká truvnnus, gitta šlávvanissona vuosttašriegádeaddji rádjái gii čohkká giehtamillu duohken. Buot omiid vuosttašriegádeaddjit maid jápmet. 6Ja oppa Egypta eatnama deavdá stuorra bárgun, man lágáš ii leat leamaš ovdal iige šatta šat maŋŋil. 7Muhto ii beanage hara israellaččaide, ii olbmuide iige omiide. Das dii ipmirdehpet ahte Hearrá dahká erohusa Egypta ja Israela gaskkas. 8Dalle buot du hoavvaolbmát bohtet mu lusa, gopmirdit mu ovdii ja rohkadallet mu vuolgit eret din luhtte ja doalvut eret oppa iežan álbmoga. Dalle mun vuolggán.” Ja Moses vulggii moaris farao luhtte. 9Hearrá celkkii Mosesii: “Farao ii guldal dudno. Dat dáhpáhuvvá vai mun beasan dahkat eatnat ipmašiid Egypta eatnamis.” 10Moses ja Aron dagaiga buot dáid ipmašiid farao ovddas, muhto Hearrá lei buoššudan farao váimmu, nu ahte son ii luoitán israellaččaid vuolgit eatnamis. 1Hearrá celkkii Mosesii ja Aronii Egyptas: 2“Dát mánnu galgá leat din mánuin vuosttamuš. Dat galgá leat didjiide jagi vuosttaš mánnu. 3Cealki oppa Israela searvegoddái: Dán mánu logát beaivvi juohke dáluisit galgá váldit lábbá dahje gihci, ovtta lábbá dahje gihci ain bearraša ja viesu nammii. 4Jos bearaš lea ilá unni borrat oppa ealli, de dáluisit galgá váldit ealli ovttas lagamus siidaguimmiinis olbmuid logu mielde. Dii galgabehtet dan vuođul meroštallat man ollu iešguhtege borrá. 5Ealli galgá leat almmá vigi haga, jahkásaš varis, láppis dahje gihcci. 6Atnet dan áimmuin dán mánu njealljenuppelogát beaivvi rádjái, ja de oppa Israela searvegotti čoagganeapmi galgá njuovvat dan eahkedisveaigin. 7Váldet dan vara ja sihkkot dan uksastoalppuide ja uksabielkái dain viesuin main sii borret lábbá. 8Borret bierggu dan seammá ija, basset dan dolas ja borret dan oktan suvrutkeahtes láibbiin ja rihča urtasiiguin. 9Ehpet oaččo borrat das maidege njuoskkasin dahje čázis vuššojuvvon, muhto galgabehtet bassit dan dolas oktan oivviin, julggiiguin ja siskilušaiguin. 10Ehpet oaččo guođđit das maidege iđedassii; jos mihkkege báhcá iđedassii, de dat galgá boldojuvvot. 11Go dii lehpet boradeamen, de dis galgá leat gákti boahkánastojuvvon, gápmagat juolggis ja soabbi gieđas, ja dii galgabehtet boradit hoahpus. Dat leat Hearrá beassážat. 12Dan ija mun jođán miehtá Egypta ja gottán Egyptas juohke vuosttašriegádeaddji, sihke olbmuid ja elliid vuosttašriegádeddjiid, ja mun dubmen buot Egypta ipmiliid. Mun lean Hearrá. 13Varra galgá leat mearkan dain viesuin main dii lehpet. Go mun oainnán vara, de mun manan meaddel, iige duššadeaddji časkkástat deaivva din, go mun časkkán Egypta. 14Dát beaivi galgá leat didjiide muitobeaivi. Dollet dan Hearrá bassin. Atnet dan agálaš ásahussan buolvvas bulvii. 15Čieža beaivvi dii galgabehtet borrat suvrutkeahtes láibbi, ja juo vuosttaš beaivvi dii galgabehtet jávkadit suvrradáiggi viesuineattet. Juohkehaš gii borrá suvruduvvon láibbi dan čieža beaivvis, galgá jávkaduvvot Israelis. 16Vuosttaš beaivvi dii galgabehtet doallat bassi čoagganeami, ja nu maiddái čihččet beaivvi. Daid beivviid ehpet oaččo bargat maidege; dušše dan maid iešguhtege borrá, oažžubehtet ráhkadit. 17Dii galgabehtet doallat suvrutkeahtes láibbi basiid, danne go aiddo dan beaivvi mun dolvon din soahteveagaid eret Egyptas. Danin dát beaivi galgá dollojuvvot ávvubeaivin, ja dat galgá leat agálaš ásahus buolvvas bulvii. 18Vuosttaš mánu njealljenuppelogát beaivvi eahkeda rájes dii galgabehtet borrat suvrutkeahtes láibbi gitta dan mánu guoktelogivuosttaš beaivvi eahkeda rádjái. 19Čieža beaivái ii suvrradáigi oaččo leat din viesuin. Juohkehaš gii borrá suvruduvvon láibbi, galgá jávkaduvvot Israela searvegottis, lehkos son dal vieris dahje eatnamis riegádan olmmoš. 20Dii ehpet oaččo borrat maidege suvrásiid; dii galgabehtet borrat suvrutkeahtes láibbi dain báikkiin gos ain ásažehpet.” 21Moses rávkkai lusas buot Israela vuorrasiid ja dajai sidjiide: “Mannet viežžat lábbá guđege bearrašii ja njuvvet dan beassášoaffarin. 22Váldet dasto isopgihpu ja buonjostehket dan varas mii lea lihtis, ja sihkkot vara uksabielkái ja guktui uksastoalppuide. Ii oktage dis oaččo mannat uvssas olggos ovdal iđida. 23Hearrá manná Egypta čađa ja časká egyptalaččaid, muhto go son oaidná vara uksastoalppuin ja uksabielkkás, de son manná dan uvssa meaddel iige divtte duššadeaddji boahtit din viesuide goddit din. 24Dát galgá leat agálaš ásahus didjiide ja din mánáide. 25Ja go dii ollebehtet dan eatnamii maid Hearrá addá didjiide lohpádusas mielde, de galgabehtet doallat dán vieru. 26Go din mánát jerret dis: Maid dát vierru mearkkaša? 27de galgabehtet vástidit: Dát lea beassášoaffar Hearrái; go son gottii egyptalaččaid, de son manai israellaččaid viesuid meaddel ja sesttii min ruovttuid.” Dalle álbmot luoitádii eatnamii ja rohkadalai. 28Israellaččat vulge das ja dahke aiddo nugo Hearrá lei gohččon Mosesa ja Arona. 29Gaskaija áigge Hearrá sorbmii Egyptas buot vuosttašriegádeddjiid, farao vuosttašriegádeaddji rájes gii čohkká truvnnus, gitta fáŋgga vuosttašriegádeaddji rádjái gii čohkká giddagasas, ja buot omiid vuosttašriegádeddjiid. 30Go farao, su hoavvaolbmát ja buot egyptalaččat dan ija oidne mii dáhpáhuvai, de šattai Egyptas garra bárgun, danin go ii lean oktage viessu mas ii lean jábmi. 31Farao rávkkai ihkku lusas Mosesa ja Arona ja dajai: “Vulget eret mu álbmoga gaskkas, doai ieža ja buot israellaččat, ja mannet bálvalit Hearrá, nugo lehpet bivdán! 32Váldet maid smávvaomiid ja stuorraomiid mielde ja mannet! Ja go dál vuolgibehtet, de buressivdnidehket maiddái mu!” 33Egyptalaččat hoahpuhedje israellaččaid vuolgit eret eatnamis, danne go sii jurddašedje: “Muđui mii buohkat jápmit.” 34Dalle israellaččat válde mielddiset láibungáriid siste dáiggi mii ii lean vel suvron, gisse gáriid biktasiid sisa ja gudde daid oalggi alde. 35Israellaččat ledje dahkan nugo Moses lei gohččon: Sii ledje bivdán egyptalaččain silbalihtiid ja gollelihtiid ja biktasiid. 36Ja Hearrá lei dahkan egyptalaččaid miehtemielalažžan israellaččaide, nu ahte sii ožžo maid bivde. Ná israellaččat válde sállaša egyptalaččain. 37Israellaččat vulge johtui Ramsesis Sukkota guvlui. Sii ledje birrasii guhttačuođiduhát vázzi olbmá, earret nissoniid ja mánáid. 38Sii válde mielddiset smávvaomiid ja stuorraomiid, hui stuorra ealu. Sin fárrui vulge maid ollu buotlágán olbmot. 39Dan dáiggis maid sii bukte Egyptas, sii ráhkadedje suvrutkeahtes gáhkuid, danne go sii ledje áddjojuvvon eret Egyptas ovdal go dáigi lei geargan suvrut, eaige sii lean ráhkadan alcceseaset velá niesttige. 40Israellaččat ledje ássan Egyptas njeallječuođigolbmalogi jagi. 41Aiddo dan beaivvi go njeallječuođigolbmalogi jagi ledje nohkan, de buot Hearrá soahtevegat johttájedje eret Egyptas. 42Dan ija Hearrá gozii vai beassá doalvut sin eret Egyptas; dat lea Hearrái basuhuvvon idja, ja dan ija buot israellaččat galget gohcit buolvvas bulvii. 43Hearrá celkkii Mosesii ja Aronii: “Dát ásahus guoská beassášlábbái: Ii oktage vierroeatnamiid olmmoš oaččo borrat dan, 44muhto juohke šlávva gii lea ostojuvvon ruđain, oažžu dan borrat, jos son lea vuos birračuhppojuvvon. 45Ii oktage vieris gii lea ássamin muhtin áiggi din luhtte, iige oktage beaivebálkkolaš oaččo borrat dan. 46Lábbá galgá borrat ovttahat viesus. Bierggu ii oaččo doalvut viesus olggos, iige ovttage dávtti oaččo doadjit. 47Oppa Israela searvegoddi galgá dahkat nu. 48Jos du luhtte ássá muhtun vieris gii hálida doallat beassážiid Hearrá gudnin, de buot su dálu olbmábealle galgá birračuhppojuvvot. Dalle son sáhttá boahtit doallat beassážiid, ja son adnojuvvo eatnamis riegádan olmmožin. Muhto ii oktage birračuohpakeahtes olmmoš oaččo borrat beassášlábbá. 49Oktat láhka galgá leat eatnamis riegádan olbmui ja vierrásii gii ássá din gaskkas.” 50Israellaččat dahke nu. Sii dahke buot nugo Hearrá lei gohččon Mosesa ja Arona. 51Ja aiddo dan beaivvi Hearrá doalvvui oppa israellaččaid joavkku eret Egyptas.

Les i nettbibelen