Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Jesus Pilatusa ovddas
Sii válde Jesusa gitta ihkku,
ja dolvo su bajimusbáhpa vissui.
Go šattai iđit, de sii dolvo su viidáseappot
romalaš eatnanhearrá Pontius Pilatusa lusa.
Bajimusbáhpat dadje Pilatusii ahte dát fáŋga ánssáša jápminduomu.
Pilatus jearahalai Jesusa.
Son jearai: «Leat go don juvddálaččaid gonagas?»
«Don dajat dan ieš», vástidii Jesus.
«Maid boastut leat don dahkan?» jearai Pilatus.
«Mun lean boahtán máilbmái
muitalit duohtavuođa birra» vástidii Jesus.
«Mii lea duohtavuohta?» jearai Pilatus.
De son manai olggos ja sártnui
sidjiide geat ledje su ladni olggobeallái čoagganan.
Son dajai sidjiide: «Mun láven juohke jagi beassážiid áigge
luoitit luovus ovtta fáŋgga.
Dán jagi beassebehtet dii válljet:
Goappá dáhttubehtet ahte mun galggan luoitit luovus?
Galggan go luoitit Barabbasa vai nasaretlačča Jesusa?»
Barabbas lei olmmošgoddi.
«Luoitte luovos Barabbasa!» čuorvvui olmmošjoavku.
«Maid mun dalle dagan
nasaretlaččain Jesusiin?»
Buohkat čurvo: «Russiinávle su!»
Pilatus oinnii ahte son ii sáhttan dahkat maidege.
De son basai gieđaidis čájehan dihte
ahte son lei vigiheapme dán jápmimii.
Pilatus luittii Barabbasa luovus,
ja gohčui soalddáhiid spihččet ja russiinávlet Jesusa.
Soalddáhat bárgidedje bastilis soađeslánjáin kruvnnu
ja cogge dan su oaivái.
Sii nuolahedje Jesusa ja bidje su olggiid ala rukseslágán oalgebiktasa,
mii čiegai vara maŋŋel spihččema.
«Dearvva, juvddálaččaid gonagas!» sii boagustedje
ja časke su amadadjui.
Go Pilatus oinnii movt soalddáhat ledje illástan Jesusa,
de son fas geahččalii oažžut olmmošálbmoga rievdadit oainnuset.
Son doalvvui Jesusa sin ovdii ja dajai:
«Gea dán olbmo!»
Muhto olmmošálbmot čuorvvui vel jitnoseappot:
«Russiinávle! Russiinávle!»
De válde soalddáhat Jesusa mielde ja
bággejedje su guoddit iežas ruossa
gitta dan báikai olggobealde gávpoga
gosa galggai russiinávlejuvvot.
Loga muitalusa Biibbalis
11Jesus dolvojuvvui eatnanhearrá ovdii. Eatnanhearrá jearai sus: “Leatgo don juvddálaččaid gonagas?” Jesus vástidii: “Don dajat dan ieš.” 12Ja go bajimusbáhpat ja vuorrasat sivahalle su, de son ii vástidan maidege. 13Dalle Pilatus jearai sus: “Itgo don gula man garrasit sii sivahallet du?” 14Muhto Jesus ii vástidan sánige, ja eatnanhearrá imaštalai sakka. 15Basiid áigge eatnanhearrá lávii luoitit luovus ovtta fáŋgga gean olmmošjoavku dáhtui. 16Dan áigge lei giddagasas muhtun beakkálmas fáŋga gean namma lei Barabbas. 17Pilatus jearai dain geat ledje čoagganan: “Goappá dáhttubehtet mu luoitit luovus? Luoittángo mun Barabbasa vai Jesusa, gii gohčoduvvo Messiasin?” 18Dasgo son diđii ahte sii gáđašvuođas ledje addán Jesusa su gihtii. 19Go Pilatus lei čohkkámin duopmárstuolus, de su áhkká bijai sutnje sáni: “Ale daga maidege dán vuoiggalaš olbmái. Dasgo mus lei surgadis niehku mannan ija su dihte.” 20Muhto bajimusbáhpat ja vuorrasat sártnuhedje olbmuid gáibidit Barabbasa luovus ja jápminduomu Jesusii. 21Eatnanhearrá jearai: “Goappá dii dáhttubehtet mu luoitit luovus?” Sii vástidedje: “Barabbasa.” 22Pilatus jearai: “Maid mun dalle dagan Jesusii, gii gohčoduvvo Messiasin?” Buohkat čurvo: “Russiinávle!” 23Pilatus jearai: “Maid baháid lea son dahkan?” Muhto sii čurvo ain jitnoseappot: “Russiinávle!” 24Go Pilatus oinnii ahte son ii sáhte dahkat maidege, ja ahte stuibmi ain vearránii, de son válddii čázi, basai gieđaid olbmuid oaidnut ja dajai: “Mun lean vigiheapme dán olbmá varrii. Dát lea din ášši.” 25Buohkat čurvo ovtta jitnii: “Bohtos su varra min ja min mánáid badjelii!” 26Dalle Pilatus luittii Barabbasa luovus, muhto Jesusa son spihččehii ja attii russiinávlejuvvot.