1Go hellodatbeaivi bođii, de sii ledje buohkat čoahkis. 2Fáhkkestaga gullui almmis šuvva dego livččii boahtán garra bieggaspálli, ja dat devddii oppa dan viesu gos sii ledje čohkkámin. 3Sii oidne dego dollanjuokčamiid mat juohkásedje ja luoitádedje iešguđege ala. 4Bassi Vuoigŋa devddii sin buohkaid, ja sii sárdnugohte sierra gielaiguin dan maid Vuoigŋa attii sidjiide sárdnut. 5Jerusalemis ásse ipmilbalolaš juvddálaččat geat ledje boahtán dohko buot álbmogiin mat leat almmi vuolde. 6Go dát jietna gullui, de dasa čohkiidii ollu olmmoš, ja buohkat šadde ipmašii, dasgo iešguhtege gulai sin sárdnumin iežas gillii. 7Sii jerre ovddošemiin: “Almma dát geat sárdnot, leat galilealaččat? 8Mo mii dalle gullat sin sárdnumin dan eatnama giela gosa iešguhtege mis lea riegádan? 9Mii partialaččat ja medialaččat ja elamlaččat, mii geat leat boahtán deike Mesopotamias, Judeas ja Kappadokias, Pontosis ja Asias, 10Frygias ja Pamfylias, Egyptas ja Libya guovlluin Kyrene lahka, mii geat leat boahtán deike Romas, 11sihke juvddálaččat ja dakkárat geat leat jorgalan juvddálaš oskui, mii leat kretalaččat ja arábialaččat – ja mii buohkat gullat sin muitaleamen Ipmila stuorra daguid iežamet gillii.” 12Buohkat ledje hirpmástuvvan ja ráđehuvvan ja jerre guhtet guoimmisteaset: “Miison dát lea?” 13Muhto earrásat bilkidedje: “Sii leat juhkan njálgga viinni ja leat gárremiin.” 14Dalle Peter loaiddastii ovdan oktan dainna oktanuppelohkásiin. Son sárdnugođii alla jienain:“Juvddálaččat, dii buohkat geat ássabehtet Jerusalemis, guldalehket mu sániid! 15Eai dát olbmát leat gárremiin nugo dii navdibehtet, dálhan lea easkka iđit, beaivvi goalmmát diibmu. 16Muhto dát lea dat mii lea celkojuvvon profehta Joela bokte: 17Maŋimuš beivviid, cealká Ipmil, mun golggahan Vuoigŋan buot olbmuide. Din bártnit ja nieiddat profehtastallet, din nuorra olbmát oidnet oainnáhusaid ja din vuorrasat niegadit nieguid. 18Maiddái bálvaleddjiidan ja bálvaleaddjinissoniiddán badjelii mun golggahan Vuoigŋan daid beivviid, ja sii profehtastallet. 19Mun čájehan oavdduid badjin almmis ja mearkkaid vuollin eatnama alde: Vara, dola ja suovvasoicca. 20Beaivváš šaddá seavdnjadin ja mánnu varran, ovdal go boahtá Hearrá beaivi, stuoris ja hearvái. 21Muhto juohkehaš gii čuorvu Hearrá nama, bestojuvvo. 22Israellaččat, gullet dáid sániid: Jesus nasaretlaš lei olmmái gean Ipmil lei válljen didjiide ja duođaštii dan fámolaš daguiguin, oavdduiguin ja mearkkaiguin, maid Ipmil dagai din gaskkas Jesusa bokte, nugo dii ieža diehtibehtet. 23Dát Jesus addojuvvui din gihtii, nugo Ipmil lei ovddalgihtii áigon ja diehtán. Dii divttiidet olbmáid geat eai dovdda Ipmila lága, russiinávlet ja goddit su. 24Muhto Ipmil čovddii su jápmima bákčasiin ja čuoččáldahtii su jábmiid luhtte, dasgo jápmin ii nagodan doallat su gitta. 25David cealká su birra: Mun anán álelassii čalmmiidan ovddas Hearrá, son lea mu olgeš bealde, aman suoibut. 26Danin mu váibmu illuda ja mu njuovčča ávvuda, ja velá mu rumašge vuoiŋŋasta doaivvus, 27dasgo don it guođe mu sielu jábmiidáibmui itge divtte iežat bassi bálvaleaddji oaidnit guohcageami. 28Don leat oahpahan mu dovdat eallima geainnu. Don deavddát mu iluin muođuidat ovddas. 29Vieljat, diktet mu dadjat didjiide roahkkadit ahte min máttaráhčči David lea jápmán ja hávdáduvvon, ja su hávdi lea min luhtte velá otná beaivvige. 30Muhto David lei profehta, ja Ipmil lei váliin lohpidan bidjat Davida truvdnui muhtuma su nális. 31David diđii dan ja oinnii ovddalgihtii juo Messiasa bajásčuožžileami. Dan son oaivvildii go dajai ahte Hearrá ii guođe su jábmiidáibmui iige su rumaš guohcat. 32Dán Jesusa Ipmil lea čuoččáldahttán jábmiid luhtte; mii buohkat leat dan duođašteaddjit. 33Go son lea aliduvvon Ipmila olgeš gieđa beallái ja váldán vuostá Bassi Vuoiŋŋa nugo Áhčči lei lohpidan, de son lea golggahan dan, nugo dii dál oaidnibehtet ja gullabehtet. 34David ieš ii mannan albmái. Son ieš cealká: Hearrá celkkii mu hearrái: Čohkán mu olgeš gieđa beallái 35dassážii go mun bijan du vašálaččaid du julggiid vuolušin. 36Dihtos nappo vissásit oppa Israela álbmot: Ipmil lea dahkan Jesusa Hearrán ja Messiasin, dán Jesusa gean dii russiinávliidet.” 37Go sii dan gulle, de dat čuzii sin váibmui, ja sii jerre Peteris ja eará apostaliin: “Vieljat, maid mii galgat dahkat?” 38Peter vástidii: “Jorgalehket, ja iešguhtege dis diktos iežas gásttašuvvot Jesus Kristusa nammii, vai din suttut addojuvvojit didjiide ándagassii. Dalle dii oažžubehtet attáldahkan Bassi Vuoiŋŋa. 39Dát lohpádus lea addojuvvon didjiide ja din mánáide ja buohkaide geat leat guhkkin eret, nu olusiidda go Hearrá Ipmileamet rávká.” 40Maiddái ollu eará sániiguin Peter nannosit duođaštii sidjiide ja ávžžuhii sin: “Diktet iežadet bestojuvvot dán gážžáris buolvvas.” 41Dat geat válde vuostá su sáni, gásttašuvvojedje, ja nu sin joavku lassánii dan beaivvi lahka golbmaduhát olbmuin.

Les i nettbibelen