Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Salomo
Go gonagas David jámii, de su bárdni šattai gonagassan.
Su namma lei Salomo.
Muhtin ija Salomo niegadii ahte Ipmil dajai:
«Áno dan maid dáhtut, ja don oaččut dan!»
Niegus Salomo vástidii:
«Mun lean nuorra ja mus váilu hárjáneapmi.
In mun dieđe movt galgá stivret dán gonagasriikka.
Atte munnje viissisvuođa, vai sáhtán earuhit buori bahás!»
De Ipmil dajai: «Danin go jearat nu jierpámalaččat,
ja it sihtan guhkes eallima, riggodaga dahje gudni,
de attán dutnje sihke dan maid jerret ja dan maid it jearran.»
Salomo gullái.
Dat lei niehku,
muhto niehku šattai duohtan.
Olbmot bohte gonagasa lusa
vai son dubmešii sin gaskkas.
Sii luhtte ahte son dubmii jierpmálaččat.
Muhtin beaivve bohte guokte nissona.
Sudnos lei goappásge njuoratmánná mielde,
nubbi lei jápman ja nubbi eallime.
«Moai orro ovtta viesus,» soai muitaleigga.
«Moai oaččuime goappašagat máná.
Mannan ija jámii nubbi mánáin.
Dál moai diggojedne goabbá munnos
lea eadni dan mánnái mii eallá.
Movt dubme gonagas?»
Salomo gohčui: «Viečča sábela.»
Vávttat bukte gonagassii sábela.
Salomo dajai: «Čuohpa máná gii eallá guovtte sadjái
ja atte beali goappáge nissonii!»
De nubbe nisu čurvii: «Ii nu gal!
Ale gotte máná! Atte dan sutnje!»
Muhto nubbi nisson dajai: «Juo, dat lea vuoiggalaš.
Juoge máná guovtti sadjái, de ii leat munnos goappásge mánná.»
De dajai gonagas: «Atte dan ealli máná
nissonii gii áiggui su gádjut.
Son lea su eadni.»
Dat nuorra gonagas oaččui olu áktejupmi
miehtá riikka go lei nu viisát dubmen.
Muhto go gonagas šattai boarráseabbo,
de beroštišgođii Salomo eambbo riggodagas ja gudnis
dan sadjái go earuhit buori bahás.
Olbmot bohte guhkkin geahčadit su riggodagaid.
Son vuolláičálii ráfišiehtadusaid riikkaiguin das birra
go náitalii sin prinseassaiguin.
Loahpas sus ledje duhát eamida ja duhát ráfišiehtadusa.
Son rohkadalai iežas olgoriikalaš eamidiid ipmiliidda
ja vajálduhtii rohkadallat Israela Ipmilii.
Son huksehii stuora tempela Jerusalemii.
Muhto olbmot fertejedje máksit stuora vearuid gonagassii.
Go gonagas Salomo jámii, de šattai riikkas stuibmi,
ja gonagasriika juogaduvvui guovtti sadjái.
Loga muitalusa Biibbalis
12Dalle Salomo dajai: “Hearrá, don dáhtut ássat moskosis. 13Mun lean huksen dutnje ássansaji agálaš áigái.” 14Gonagas jorggihii álbmogii muođuid ja buressivdnidii oppa Israela searvegotti. Buohkat čužžo, 15ja Salomo celkkii: “Máidnojuvvon lehkos Hearrá, Israela Ipmil, gii gieđainis lea ollašuhttán dan maid son lohpidii áhččásan Davidii, go son celkkii sutnje: 16‘Dan rájes go mun bukten iežan álbmoga Israela Egyptas, de mun in leat válljen Israela čearddaid guovlluin gávpoga gosa huksejuvvošii tempel mu nama ássansadjin. Muhto dál mun lean válljen Jerusalema iežan nama ássansadjin, ja mun lean válljen Davida iežan álbmoga Israela ráđđejeaddjin.’ 17Mu áhčči David áiggui hukset tempela Hearrái, Israela Ipmilii. 18Muhto Hearrá celkkii sutnje: ‘Du áigumuš hukset munnje tempela lea buorre. 19Muhto tempela it dattetge hukse don, muhto du bárdni, du alimiid šaddu.’ 20Dál Hearrá lea ollašuhttán dan maid lohpidii. Mun lean čohkánan áhččán Davida maŋŋil Israela truvdnui, nugo Hearrá lea cealkán, ja mun lean huksen tempela Hearrái, Israela Ipmilii. 21Dohko mun lean dahkan saji árkii, man siste leat lihtu lágat, dan lihtu maid Hearrá dagai min áhčiiguin dalle go son buvttii sin Egyptas.” 22Salomo čuoččui Hearrá áltára guoras oppa Israela searvegotti ovddas. Son lebbii gieđaid almmi guvlui 23ja dajai: “Hearrá, Israela Ipmil! Ii leat du veardásaš ipmil, ii badjin almmis iige dáppe vuollin eatnama alde. Don bisuhat lihtu ja árkkálmasttát bálvaleddjiidat, go sii vádjolit olles váimmus du ovddas. 24Don leat ollašuhttán dan maid lohpidit bálvaleaddjásat Davidii, mu áhččái. Maid du njálbmi lea sárdnon, dan du giehta lea dahkan. 25Hearrá, Israela Ipmil, deavdde maiddái dan maid lohpidit bálvaleaddjásat Davidii, mu áhččái, go celket sutnje: ‘Álo čohkká du soga olmmái mu ovddas Israela truvnnus, jos du bártnit atnet váras dan geainnu man don leat vádjolan mu ovddas.’ 26Israela Ipmil, divtte nappo ollašuvvat dan maid lohpidit bálvaleaddjásat Davidii, mu áhččái. 27Muhto ásságo Ipmil duođaid eatnama alde? Albmi, velá almmiid almmitge eai gease du, mo dasto dát tempel maid mun lean huksen! 28Hearrá, mu Ipmil! Jorgal almmatge bálvaleaddját beallái ja gula mu vuollegis átnuma, go mun dál rohkadalan du ovddas. 29Ane čalmmiid ijatbeaivái rabasin dán viesu guvlui, dan báikki man birra leat cealkán: ‘Dás mu namma ássá.’ Gula maid du bálvaleaddji rohkadallá dán báikái čalmmiid. 30Gula du bálvaleaddji ja du álbmoga Israela átnumiid, go mii rohkadallat du dán báikái čalmmiid. Vare don gulašit daid ássansadjásat albmái, gulašit ja attášit ándagassii!