Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Samuel
Hanna ii ožžon máná.
Son manai Šilo tempelii ja rohkadalai:
«Hearrá, ale vajálduhte mu!
Divtte mu oažžut bártni,
de galgá son bálvalit du oba eallenagistis!»
Ipmil gulai Hanna rohkosa.
Ja ovdalgo jahki lei gollan, riegádahtii son bártnáža,
ja son oaččui nama Samuel.
Namma mearkkaša “Ipmil lea gullan”.
Go Samuel lei golbma jagi boaris,
válddii eadni su mielde Šiloi.
Son dajai: «Don galggat orrut dáppe tempelis,
muhto mun boađán ruovttoluotta du galledit.»
De son vulggii, ja Samuel bázii tempelii.
Son veahkehii dan boares báhpa.
Soai cahkkeheigga gintaliid dan čieža lámppát ginttaljuolgái.
Son ođii lihtuárkka guoras ja gozihii dan.
Muhtin jagit golle.
Ovtta ija gullái Samuel go Ipmil čuorvvui su.
Son lihkai ja viegai báhpa lusa.
«Dás mun lean», dajai son. «Don rávket mu.»
Muhto báhppa dajai: «In mun rávkan du.
Mana fas velledit.»
Samuel dagai nugo báhppa lei dadjan, ja nohkai.
De son gulai fas Ipmila jiena: «Samuel!»
Son čuožžilii ja manai báhpa lusa.
«Dás mun lean», dajai son. «Don rávket mu».
Muhto báhppa vástidii:
«In, mun in rávkan du, bártnážan.
Mana fas velledit».
Samuel manai fas seaŋgasis,
muhto dat seamma fas dáhpáhuvai.
Son gulai iežas nama, viegai báhpa lusa, ja dajai:
«Dás mun lean». De báhppa dan ipmirdii.
Son ipmirdii ahte dat lei Ipmil gii rávkkai bártnáža.
Báhppa dajai: «Mana velledit! Ja jus son fas rávká du,
de galggat vástidit: «Sártno, Hearrá, du bálvaleaddji gullá!»
Samuel manai fas velledit sadjásis.
De bođii Ipmil, čuoččahii su ovddabeallái
ja rávkkai nugo ovdal: «Samuel, Samuel!»
Ja Samuel vástidii: «Sártno, du bálvaleaddji gullá du!»
Ja Ipmil sártnui Samuelii ja bivddii su muitalit
viidáseappot dan maid Ipmil lei dadjan.
Samuel dagai dan.
Nu šattai son Ipmila profehta.
Son guldalii dárkilit Ipmil jiena olles iežas eallima
ja muitalii olbmuide maid Ipmil lei sutnje dadjan.
Loga muitalusa Biibbalis
1Nuorra Samuel bálvalii Hearrá Eli luhtte. Dan áigge Hearrá sártnui olbmuide hárve, ja oainnáhusat ledje uhccán. 2De oktii Eli lei veallámin sajistis. Son lei nu čalmmehuvvan ahte illá šat oinnii. 3Ipmila lámpá ii lean velá čáskaduvvon, ja Samuel lei veallámin Hearrá tempelis, gos Ipmila árka lei. 4Dalle Hearrá čuorvvui Samuela. Samuel vástidii: “Dás mun lean,” 5viegai Eli lusa ja dajai: “Dás mun lean; almma don rávket mu?” Muhto Eli vástidii: “In mun rávkan du. Mana fas veallánit.” De Samuel máhcai sadjásis. 6Hearrá čuorvvui ođđasis: “Samuel!” Samuel čuožžilii, manai Eli lusa ja dajai: “Dás mun lean; almma don rávket mu?” Muhto Eli vástidii: “Bártnážan, in mun rávkan du. Mana fas veallánit!” 7Samuel ii velá dovdan Hearrá, iige Hearrá lean velá sárdnon sutnje. 8De Hearrá čuorvvui Samuela goalmmát geardde. Samuel čuožžilii, manai Eli lusa ja dajai: “Dás mun lean; almma don rávket mu?” Dalle Eli ipmirdii ahte Hearrá lei čurvon bártnáža, 9ja son dajai Samuelii: “Mana fas veallánit. Jos muhtun vel čuorvu du, de vástit ná: Sártno, Hearrá, du bálvaleaddji gullá.” De Samuel manai fas veallánit sadjásis. 10Dalle Hearrá bođii, orustii su ovdii ja čuorvvui dego ovddit háviidge: “Samuel, Samuel!” Dalle Samuel vástidii: “Sártno, du bálvaleaddji gullá.” 11Hearrá celkkii Samuelii: “Mun dagan Israelis dakkár dagu ahte juohkehaččas gii dan gullá, goappašagat bealjit čudjet. 12Dan beaivvi mun dagan Elii ja su sohkii buot maid lean áitán dahkat. Buot ollašuvvá, álggu rájes gitta loahpa rádjái. 13Mun lean dieđihan sutnje ahte mu duopmu su soga vuostá bissu fámus agálaš áigái, dan vearredagu dihte maid son dagai go son ii ráŋgon bártniidis, vaikko diđii ahte soai badjelgeahčaiga mu. 14Dan dihte mun lean vurdnon ahte eai oaffarat eaige attáldagat goassege soabat Eli soga suddovealggi.” 15Samuel veallái sajistis iđida rádjái ja rabai de Hearrá viesu uvssaid. Son ii duostan muitalit Elii iežas oainnáhusa, 16muhto Eli rávkkai su: “Samuel, bártnážan!” “Dás mun lean,” Samuel vástidii. 17Eli jearai: “Maid son sártnui dutnje? Ale fal čiega dan mus. Ipmil ráŋggáštehkos du dál ja álo, jos don čiegat mus sánige buot das maid son sártnui dutnje.” 18Dalle Samuel muitalii sutnje buot iige čiehkan maidege, ja Eli dajai: “Son lea Hearrá. Son dahká maid atná buorrin.” 19Go Samuel stuorui, de Hearrá lei suinna ja divttii buot su sániid ollašuvvat. 20Nu oppa Israel, Dana rájes gitta Beer Šeba rádjái, oahpai diehtit ahte Samuelii lei oskkilduvvon doaibmat Hearrá profehtan. 21Hearrá almmustuvai ain Šilos ja almmuhii doppe sánis Samuelii.