Sivdnadus

Álggos Ipmil sivdniidii almmi ja eatnama.

Muhto miestagat eai lean vel,

eaige makkárge rásit lean šaddan,

dasgo Ipmil ii lean vel diktán arvit eatnamii,

iige lean vel olmmoš gii sáhtii bargat eatnamiin.

Dalle rahpasii okta čáhcegáldu.

Ipmil hábmii olbmo eatnama muolddus

ja bosádii eallivuoiŋŋanasa su njunnái.

Ipmil gilvvii gilvvagárddi olbmui,

dievva liđiiguin, muoraiguin ja šattuiguin

ja joga mii golggai meattá, buhtis ja čielggas.

Son bijai olbmo gilvit gilvvagárddi,

ja gáhttet dan vai visot šaddá nu movt galgá.

Ipmil dajai olbmui:

«Stoaga ja illut nu olu go nagodat!

Bora vaikko makkár gilvvagárddi muorain,

earret ovtta muoras

- dan muoras mii addá dieđu buoris ja bahás.

Jus don das borat, de don jámát.»

Olmmoš stoagai gilvvagárddis olles beaivvi,

son borai ja vuoiŋŋastii seaivvus muoraid vuolde.

Muhto son lei áibbas akto máilmmis.

«Don it galgga leat okto,» dajai Ipmil.

«Don oaččut guoimmi mii lea du láhkásaš.»


De Ipmil hábmii buot elliid vuovddis ja váris,

ja buot lottiit mat rámskot ja girdet

ja njoammuid ja njealljejuolggat elliid.

Sii bohte olbmo ovdii muoladettiin, meahkumiin, ruovgamiin ja cihrademiin,

ja olmmoš bijai buot dáid iešguđetlágán elliide namaid.


Muhto olmmoš lei liikká iežas láhkásis okto.

«Buorre idja,» dajai Ipmil, ja olmmoš velledii nohkkat.

Ipmil válddii sus erttetdávtti

ja hábmii das čáppa sivdnádusa.

Son bovttii olbmo ja dajai:

«Gea, dá lea nisu, du guoibmi, dál don ii leat šat okto!"

De olmmoš dollii su gihtii.

Dat lei linis ja heivii juste su iežas gihtii.

Ja soai vázzáiga viidaseappot fárrolaga gilvvagárddis.

Loga muitalusa Biibbalis

4Dát lea muitalus das mo albmi ja eanan sivdniduvvui. Dalle go Hearrá Ipmil dagai almmi ja eatnama, 5de ii lean eatnama alde vel mihkkege miestagiid, iige mihkkege rásiid lean šaddan, dasgo Hearrá Ipmil ii lean diktán arvit eatnamii, iige olmmoš lean vel bargamin eatnama. 6Muhto čáhci vuožui eatnamis ja láktadii eananbajildasa. 7Dalle Hearrá Ipmil hábmii olbmo eatnama muolddas ja bosádii su njunnái eallinvuoiŋŋanasa, ja olmmoš šattai ealli siellun. 8Hearrá Ipmil gilvvii gilvvagárddi nuorttas, Edenii, ja dohko son bijai olbmo gean lei hábmen. 9Hearrá Ipmil šaddadii eatnamis buotlágán muoraid mat ledje čábbát oaidnit ja maid šaddosat ledje buorit borrat, ja gasku gilvvagárddi son šaddadii eallima muora ja dieđu muora buori ja bahá hárrái. 10Edenis golggiidii johka mii láktadii gilvvagárddi, ja dat juohkásii doppe njealljin suorgin. 11Vuosttamučča namma lea Pišon. Dat golgá oppa Havila eatnama birra, gos lea golli, 12ja dan eatnama golli lea buorre. Doppe lea maiddái suovasgáhčči ja onyksgeađgi. 13Nuppi joga namma lea Gihon. Dat golgá birra oppa Kuša eatnama. 14Goalmmát joga namma lea Hiddekel, ja dat golgá Assura nuorttabeale. Njealját johka lea Eufrat. 15Hearrá Ipmil bijai olbmo Edena gilvvagárdái bargat ja gáhttet dan. 16Ja Hearrá Ipmil rávvii olbmo ná: “Don oaččut roahkka borrat buot gilvvagárddi muorain. 17Dušše dan muoras mii addá dieđu buoris ja bahás, don it oaččo borrat, dasgo dan beaivvi go don das borat, de don jámát.” 18Hearrá Ipmil celkkii: “Olbmui ii leat buorre leat okto. Mun dagan sutnje guoimmi gii sáhttá leat sutnje veahkkin.” 19Ja Hearrá Ipmil hábmii muolddas buot fuođđuid ja buot almmi lottiid ja buvttii daid olbmo lusa, vai beassá oaidnit manin son daid gohčoda. Ja nugo olmmoš gohčodii guđege ealli, nu dat šattai navdojuvvot. 20Olmmoš attii namaid buot šibihiidda, buot almmi lottiide ja buot meahcielliide. Muhto olbmui ii gávdnon heivvolaš guoibmi gii lei su láhkásaš. 21Dalle Hearrá Ipmil oađđáhii olbmo losses nahkáriidda, ja go son lei oađđimin, de Ipmil válddii ovtta su erttetdávttiin ja devddii dan saji oččiin. 22Hearrá Ipmil dagai dán erttetdávttis nissona ja buvttii su olbmá lusa. 23Dalle olmmái celkkii: “Dát lea dal dákti mu dávttiin ja oažži mu oaččis. Nissonin son galgá gohčoduvvot, olbmás son lea váldojuvvon.” 24Dan dihte olmmái guođđá áhčis ja eatnis ja eallá áhkáinis, ja soai šaddaba oktan oažžin. 25Olmmái ja nisson leigga goappašagat álás, eabage soai heahpanaddan.

Les i nettbibelen