Bures!
Vállje linnjás muitalusa, ja de bláđe vulos lohkat ja gullat dan.
Giellaválljemis badjin, olgeš bealde, sáhtát válljet giela.
Jesus sárdnida
Jesus manai várrái ja čohkkedii.
Máhttájeaddjit čuvvo su ja čoagganedje su birra.
Sin maŋis bohte olu olbmot,
ja sii lassánedje ain eambbo dan botta go son sárdnidii.
Jesus dajai: «Gehččet almmi lottiide.
Eai dat moraš heakkaset dihte.
Ipmil addá daidda dan maid sii dárbbašit.”
Son cuigii liđiide ja dajai:
«Gea, man čábbát dat leat,
ii velá Salomoge buot hearvásvuođainis lean
gárvvohuvvon nugo okta dain!
Jus Ipmil ná gárvvoha gietti rásiid nu fiidnát
ja biebmá lottiid,
de almmá son gárvvoha ja biebmá dinge?
Allet moraš.»
Jesus jotkkii: «Go dii rohkadallabehtet,
de allet dušše ane bođu sániid
Ipmil Áhčči diehtá maid dii dárbbašehpet.
Rohkadallet baicce ná:
Áhččámet, don guhte leat almmis!
Basuhuvvos du namma.
Bohtos du riika.
Šaddos du dáhttu,
mot almmis nu maiddái eatnama alde.
Atte midjiide odne min beaivválaš láibbi.
Ja atte midjiide min suttuid ándagassii,
nugo miige ándagassii addit min velggolaččaidasamet.
Ale doalvvo min geahččalussii,
muhto beastte min bahás eret.
Dasgo du lea riika ja fápmu ja gudni agálašvuhtii.
Amen.»
Son geahčái olmmoščorragii ja dajai sidjiide:
«Buot maid dii dáhttubehtet olbmuid dahkat didjiide,
dan dahket diigis sidjiide.»
Ja loahpas son muitalii sidjiide dán historjjá:
«Juohkehaš gii gullá daid mu sániid ja dahká daid mielde,
lea dego jierpmálaš olmmái gii huksii viesus bávtti ala.
Ráššoarvi šoallagođii, jogat dulve
ja riđđu čuzii vissui.
Muhto dat ii gahččan, danne go dat lei huksejuvvon bávtti ala.
Ja juohkehaš gii gullá dáid mu sániid muhto ii daga daid mielde,
lea dego jierpmehis olmmái gii huksii viesus sáddo ala.
Ráššoarvi šoallagođii, jogat dulve
ja riđđu čuzii vissui,
ja dat gáhčai ja bieđganii visot.
Go Jesus lei geargan sárdnumis,
de son njiejai váris.
Olles olmmoščora čuovvolii su.
Loga muitalusa Biibbalis
1Go Jesus oinnii daid ollu olbmuid, de son manai várrái. Son čohkánii, ja máhttájeaddjit bohte su lusa. 2De son sárdnugođii ja oahpahii sin ná: 3Ávdugasat leat vuoiŋŋasteaset geafit, dasgo almmi riika lea sin. 4Ávdugasat dat geat moraštit, dasgo sii ožžot jeđđehusa. 5Ávdugasat leat vuollegaččat, dasgo sii árbejit eatnama. 6Ávdugasat dat geat nelgot ja goiket vanhurskkisvuođa maŋŋái, dasgo sii gallehuvvojit. 7Ávdugasat dat geat leat váibmoláđđásat, dasgo sii ožžot váibmoláđisvuođa. 8Ávdugasat leat buhtisváimmogat, dasgo sii besset oaidnit Ipmila. 9Ávdugasat dat geat duddjojit ráfi, dasgo sii gohčoduvvojit Ipmila mánnán. 10Ávdugasat dat geat doarrádallojuvvojit vanhurskkisvuođa dihte, dasgo almmi riika lea sin. 11Ávdugasat lehpet dii go olbmot bilkidit ja doarrádallet din mu dihte, gielistit ja sárdnot bahá din birra juohke láhkái. 12Illudehket ja ávvudehket, dasgo din bálká almmis lea stuoris. Nu sii doarrádalle profehtaidge ovdal din.