Abraham ja Isak

Abram lej vuorastuvvam, ittjij ga Saraj mánájt oattjo.
Huoman de Jubmel javlaj: “Dån sjatta moatte vierrega áhttjen.
Dát rájes le Abraham – moaddása áhttje.
Saraja namman le Sara – gånågisáj ieddne.
Vájalda muv milta – åro ållåsin gájkan dahkamuhánit!”

Jage gallin, valla de gåjt sjattaj,
gåktu Jubmel lej jáhttám.
Saras tjoajvve stuoroj, ja sån ávos tjajmaj.
Gå bárnne riegádij, de suvva Isakin nabdij.
Namma le “tjajmme”.
Bárnásj stuoroj gájkaj ávvon.

Avta biejve gåjt Jubmel gähttjalij Abrahamav.
Jubmel javlaj: “Abraham! Isakav válde fáronit,
bárnev, gesi le nåv gierrum,
maná Moria ednamijda munji värrodittjat,
bárnát ane värrolibban!”

Abrahamaj lej dát sjievnnjis idja.
Huoman maŋep ideda oasnáv noadodij,
fáronis váldij dållåmuorajt ja biebmojt, dievnárijt, ja bárnes.
Goalmát biejve ájttsin várev, gåsi ledjin mannamin.

Fáronis bajás váldij dåssju dållåmuorajt ja Isakav.
Guovtu váttsatjijga, ja Isak moalgedij:
“Áhttjám, gånnås le munnu värrolibba?”
“Jubmel lippav gávnná”, vásstedij Abraham.
Guovtu de várráj badjánijga.

Baddjen Abraham tsieggij álltárav,
dållåmuorajt hårrij ja gájkav gárvedij.
Ájnat ittjij val de värrolibba ide.

De Isakav álltárij viellidahtij.
Bárnev, gesi lej nåv gierrum, viellidahtij muoraj nali,
nijbev bajedij ja ierijt gehtjaj. Gárves lej dal.
De Jubmela ieŋŋgil tjuorvvij: “Hiejte!
Ale majdik bárnnásit dagá!”

Ja de Abraham birrasis gehtjadijn
ájtsaj ham de viertsav, mij lej biesstagij gitta snårrum.
Biejajga viertsav muoraj nali, värrodijga ja båldijga.

De vaden Jubmela ieŋŋgil tjuorvvij:
“Gå dávva dahki ja ittji nádo muvva ájnna bárnát válldemis,
de duvva boanndán buorissjivnnedav.
Duv máddo sjaddá nástij valljen.
Gå dal muvva le jegadam,
de gájkka álmmuga dujna buorissjivnnjáduvvi.”

De Abraham ja Isak vuolgijga.
Dievnárijgum ja oasnájn gávnadijga
ja sijddaj Sara lusi máhtsajga.
Dåppen giehttun ådåsa niejdda lej riegádam
berraha lunna Nahora stádan.
Niejdda lej Rebekka.
“Boahtte ájgge le ham tjielgas, Isak”,
javlaj Sara bárnnásis måjåda.

Mosesa vuostasj girje guoktalågevuostasj ja guoktalågenuppát låhkusis