Bigodimgoahte

Gå Israela vierrek Egyptas vuolgij,
de Jubmel sijáv gäjnon lájddij.
Åvdånisá biejvijt balvvatjuolldan váttsij,
ijájt gis dållåtjuolldan buolij.

Israela vierrek åjdåmiehtsen vájaldij ja luojttalimgådijn åroj.
Akti Moses hålaj: “Muddo le dal.
Tsieggijup Jubmelij goadev,
ájlis lanjáv, gånnå suvva iejvvijup.
Jubmel le muvva bagádam, gåktu dahkap.”

De åbbå álmmuk vattáldagájt buvtij.
Ájlis goadev sihtin tjábbodit.

Moses bargadahtij dájddárav Besalelav.
Dájddárav moattes doarjjun.
Gårrun loavddagav ruoppsisbájnuk náhkijs.
Akasiamuoras fiellojt tsieggijin.
Muhtema gådin tjáppes åvddågåbttjåsijt purpuvrris lájgijs,
gånnå ledjin såjak gerubaj gåvå.

Lihttoárkav de dájddár dagáj akasiamuoras,
dan låhkev gålles guovtijn gerubajn,
ja árkkuj biejaj låge budá gierggeskierrojt.
Gietjasuoregis gintaljuolgev aj dagáj tjielgga gålles.

Vähkkálakkoj Mosesijn de álmmuk goadev tsieggij,
ja dan birra gådeduvvam loavddagijt tsieggijin.
Lanjáv loavddagij ja goade gaskan nabddin åvddåladnjan,
ja danna lej värrodimálltár, gånnå dållå agev buolij.

Gå ledjin gájkav ållim, de álmmuk ávvusij.
Vuorddin galla, mij de luluj dáhpáduvvat.
De vuojnnin balvvatjuoldav, mij lej sijáv lájddim,
lávvamin goahtáj ja davva dievddemin.
Guojmme guojmmáj javlaj: “Gehtja, Jubmel årru mijá lunna!”

Agev balva låptijdattijn goades,
de álmmuk mannulagáv jårkij.
Valla balva årodijn sajenis de báhtsin dasák.
Jubmela balvva lej bigodimgoade bajelt biejvijt,
ijájt gis dållån bájtij,
åbbå mannulagá ájgev.

Mosesa nuppát girje gålmmålågegoalmát gitta nielljalågåt låhkusis