Juovlaevangelium davvisámegillii

Ánne-Mággá Wigelius leser juleevangeliet fra Biibbal 2019

Hyrdene på marken ser et sterkt lys

Juovlaevangelium davvisámegillii

Guldal go Ánne-Mággá Wigelius lohká juovlaevangeliuma Biibbal 2019:s.
(Ánne-Mággá Wigelius leser juleevangeliet fra Biibbal 2019)

Jesusa riegádeapmi

Lukas 2,1–20

Les i nettbibelen.

1Daid beivviid keaisár Augustus attii gohččuma ahte oppa máilbmi galggai čálihuvvot olmmošlohkui. 2Dat lei vuosttaš čáliheapmi ja dáhpáhuvai dalle go Kvirinius lei Syria eatnanhearrán. 3Buohkat vulge čálihit iežaset olmmošlohkui, iešguhtege gávpogasas. 4Josef maid vulggii Galileas, Nasareta gávpogis, ja manai čálihit iežas olmmošlohkui Judeai, Davida gávpogii Betlehemii, danne go son lei Davida viesu ja soga olmmoš. 5Son vulggii dohko oktan Mariain gii lei lohpiduvvon sutnje áhkkán ja lei máná vuostá. 6Go soai leigga doppe, de dievai Maria riegádahttináigi, 7ja son riegádahtii bártnis, vuosttašriegádeaddji. Son giesai máná ja bijai su krubbái, dasgo sudnuide ii lean sadji guosseviesus. 8Dan guovllus ledje oapmegeahččit guođoheamen ealuset ihkku. 9Fáhkkestaga sin ovddas čuoččui Hearrá eŋgel, ja Hearrá hearvásvuohta báittii sin birra, ja sii suorganedje sakka. 10Muhto eŋgel celkkii sidjiide: “Allet bala! Mun buvttán didjiide stuorra illusága, ilu oppa álbmogii. 11Didjiide lea odne riegádan Beasti Davida gávpogis. Son lea Kristus, Hearrá. 12Dát lea didjiide mearkan: Dii gávdnabehtet máná gissojuvvon ja veallámin kruppás.” 13Ja dallánaga eŋgela luhtte lei almmálaš veaga eatnatvuohta mii máinnui Ipmila: 14“Gudni lehkos Ipmilii allagasas ja ráfi eatnama alde olbmuide geaid Ipmil ráhkista.” 15Go eŋgelat ledje mannan sin luhtte albmái, de oapmegeahččit dadje guhtet guoibmáseaset: “Vulgot Betlehemii geahččat dan mii lea dáhpáhuvvan ja maid Hearrá midjiide almmuhii.” 16Sii vulge hoahpus ja gávdne Maria ja Josefa ja mánáža mii veallái kruppás. 17Go sii oidne máná, de sii muitaledje buot mii lei celkojuvvon sidjiide máná birra. 18Buohkat geat dan gulle, ovddošedje dan maid oapmegeahččit muitaledje. 19Muhto Maria vurkii váibmosis buot mii lei dáhpáhuvvan, ja guorahalai dan. 20Oapmegeahččit máhcce ruoktot ja máidno ja rámidedje Ipmila buot das maid ledje gullan ja oaidnán. Visot lei nugo sidjiide lei celkojuvvon.