Jeremia teempelisnie soptseste
1 Daah baakoeh Jeremiase Åejvien luvhtie böötin:
2 Tjöödtjehth Åejvien gåetien valkeldh-oksen uvte. Desnie galkh reegkes gïeline håalodh: Juda, goltelh Åejvien baakojde, goltelidie dijjieh gïeh oksen tjïrrh tjaangede Åejviem heevehtidh. 3 Naemhtie Åejvie Sebaot, Jisraelen Jupmele, jeahta: Bueriedehtede dijjen jieliemidie jïh dåemiedimmide, jïh dellie baajem dijjem daennie sijjesne årrodh. 4 Aellede leajhtedh faelskies baakojde: «Daesnie Åejvien teempele, Åejvien teempele, Åejvien teempele!» 5 Jis dijjieh jïjtjemdh jieliemidie jïh dåemiedimmide bueriedehtede, jis dijjieh rïekteslaakan sinsætnan dåemiedidie, 6 jis idie noerhkh ammes almetjidie gïeh båateme juhtien, dejtie gïeh aehtjehth leah jïh aarpijidie, jis idie skåltohts vïrrem daan sæjjan gårkastehth, jis idie jeatjah jupmelh heevehth guktie jïjtjemdh leajmoedidie, 7 dellie baajem dijjem daennie sijjesne årrodh, daennie eatnamisnie maam dej beeli dijjen maadtojde vedtiejim guktie ihkuve aajkan maehtieh desnie årrodh.