Jeesuse reakede
1 Dej beeli keejsere Augustus stilli gaajhkh almetjh galkin almetjelåhkose tjaalasovvedh. 2 Daate voestes tjaalasovveme sjïdti gosse Kvirinios Syrian åvtehkinie. 3 Jïh gaajhkesh jïjtsh staaride vöölkin tjaalasovvedh.
4 Josef aaj Galilejeste, Nasareten staareste vöölki, Judejese Daviden staarese man nomme Bet-lehem, juktie Daviden gåeteste jïh boelveste lij. 5 Jïjtse faelhkienïejte Maarjine gie nåajsan, vöölki edtji tjaalasovvedh.
6 Gosse ligan desnie, biejjie bööti gosse galki baersieldidh, 7 jïh voestes baernemse reakadehti. Juktie dej ij naan gåetieluhpie, tjoeri maanam njåatsoestehtedh jïh kråbpose bïejedh.
8 Dan jïjjen naan ryöjnesjæjjah ealoem dajvesne ryöjnesjeminie. 9 Dellie Åejvien eengkele dej uvte tjåadtjoeminie jïh Åejvien hearlohkevoete dejtie tjoevkedi, jïh dah alvehtovvin. 10 Eengkele jeahta: «Aellede alvehtovvh! Mov lea saernie dijjese stoere aavoen bïjre, stoere aavoe gaajhkide almetjidie. 11 Daelie dijjen lutniestæjja Daviden staarese reakadamme. Dïhte Messija, Åejvie. 12 Daate dijjese væhta: Slïedtemaanam gaavnede, njåatsoestahteme jïh kråbposne vealan». 13 Jïh faahketji eengkelen luvnie, elmierïjhken foeve Jupmelem heevehti jïh jeehti:
14 «Earoe Jupmielasse, jallatjommesisnie,jïh raeffie eatnamasse,almetjidie giejstie Jupmele aavode.»15 Gosse eengkelh vihth alman vualkeme, ryöjnesjæjjah sinsætnan jeehtin: «Vaedtsebe amma Bet-lehemese vuejnedh maam Åejvie mijjese dååjrehtamme.» 16 Varki skodtin jïh Maarjam jïh Josefem gaavnin jïh slïedtemaanam kråbposne vealan. 17 Gosse dam vuajnajin, dellie soptsestin dam maam maanan bïjre govleme. 18 Gaajhkesh gïeh dam govlin, ryöjnesjæjjaj saerneste bååhperin. 19 Maarja gaajhkem dam jïjtse vaajmose vöörhki jïh ussjedalli. 20 Ryöjnesjæjjah bååstide vöölkin jïh Jupmelem earoehtin jïh heevehtin destie maam govleme jïh vuajneme: gaajhke nemhtie guktie jeahtasovveme lij.
Jeesusinie nommestehtieh
21 Gosse gaektsie biejjieh vaaseme jïh baerniem galkin bïjretjoehpestehtedh, dellie Jeesusinie nommestehtin guktie eengkele stilleme aerebe goh tjidtjebe nåajsan sjïdti.
Jeesuse teempelisnie
22 Gosse baersieldamme, galkin Mosen laaken mietie reejnesovvedh. Dellie Jeesusem Jerusalemese, Åejvien gåajkoe, guedtiejin. 23 Åejvien laakesne tjaalasovveme: Voestes baernie gïem nyjsenæjja baerselde, galka Åajvan aejliestovvedh. 24 Göökte duvvegh jallh göökte duvvegen tjovkh edtjin aaj buektedh jïh sjïeledidh nemhtie guktie Åejvien laakesne tjaalasovveme.
25 Jerusalemesne ålma man nomme Simeon gie rïektesvoetesne lij jïh Jupmelem golteli. Simeon Jisraelen soelkehtassem vuertieminie. Aejlies Voejkene dejnie lij. 26 Voejkene dïsse dååjrehtamme, idtji galkh jaememem vuejnedh aerebe goh Åejvien Messijam vuajneme. 27 Voejkene Simeonem teempelasse vaedtsiehti. Gosse eejhtegh Jeesusinie böötigan darjodh dam maam laakesne tjaalasovveme, 28 dellie Simeon maanam faarhman veelti jïh Jupmelem heevehti jïh jeehti:
Simeonen heevehtimmie
29 «Åejvie, baajh dellie dov deaneremraeffesne vuelkedh guktie dåajvoehtih.30 Juktie mov tjelmieh gorredimmiem vuajneme31 maam datne almetjidie illeme,
32 åavtoen tjoevkem jeatjah-jaahkoeladtjidejïh hearlohkevoetem dov Jisraelen almetjidie.»
33 Jeesusen aehtjieh tjidtjieh råvnasjigan destie mij maanan bïjre såårnesovveme. 34 Jïh Simeon dejtie bueriesjugniedi jïh tjidtjebe Maarjese jeehti: «Daan maanan gielhtie jïjnjesh Jisraelesne edtjieh slaamkedh jallh lutnjesovvedh. Væhtine edtja årrodh mij ræjtoem gååske – 35 jïh saejtie galka dov sealose tjihtedidh. Dellie jïjnjesi vaajmoen åssjalommesh bijjiebasse båetieh.»
36 Desnie aaj nåejties nyjsenæjja, Hanna Fanu-elen daktere, Asjeren maadtojste. Båeries lij. Gosse noere, tjïjhtje jaepieh pruvres lij 37 jïh dan mænngan aarpijinie sjïdti jïh daelie gaektsieluhkie-njieljien jaepien båeries. Idtji gåessie gænnah teempelen luvhtie vaedtsieh. Iktesth desnie Jupmelem jïjjh biejjieh dïenesje, fååstoe jïh rohkele. 38 Dellie Hanna aaj båata Jupmelem gijhtedh jïh heevehtidh. Maanan bïjre soptseste gaajhkesidie gïeh Jerusalemen gorredimmiem vuertieminie.
39 Gosse Josef jïh Maarja gaajhkem dorjeme mij laakesne tjaalasovveme, dellie hïejmesæjjan Nasareten gåajkoe, Galilejese jarkajin. 40 Baernie byjjeni, vieksiesvoetem jïh vijsiesvoetem åadtjoeji jïh Jupmelen faamoe dam dåeriedi.
Luhkiegöökte jaapetje Jeesuse teempelisnie
41 Jeesusen eejhtegh fïerhten påasken Jerusalemesne mïnnigan. 42 Gosse Jeesuse luhkiegöökten jaepien båeries, dellie bæjjese dahkoe mïnnin goh aerebe gosse bissiebiejjieh. 43 Bissiebiejjiej mænngan gosse gåatan edtjin vuelkedh, dellie eejhtegh idtjigan vueptesth baernie Jeesuse Jerusalemese baatseme. 44 Abpe biejjiem veedtsigan, vïenhtigan Jeesuse faarosne. Dellie easkah åehpies almetjistie jïh slïektijste dan mietie gihtjin. 45 Gosse idtjigan gaavnh, dellie Jerusalemese jarkajigan, Jeesusem desnie ohtsedidh. 46 Gosse golme biejjieh vaaseme, dellie teempelisnie gaavnigan, lohkehtæjjaj luvnie tjahkan golteleminie jïh gihtjeminie. 47 Gaajhkesh gïeh altemse govlin, råvnasjin dan vijsiesvoeteste jïh guktie vaestiedi. 48 Eejhtegh amma bååhperigan gosse dam vööjnigan, jïh tjidtjebe jeehti: «Maaneme, guktie meehtih naemhtie monnese darjodh? Månnoeh aahtjedh datnem ohtsedamme jïh straavveme.» 49 Jeesuse vaestede: «Mannasinie mannem ohtsedidien? Idtjiden daejrieh manne tjoerem daesnie mov aehtjien gåetesne årrodh?» 50 Idtjigan hov guarkah man bïjre soptsesti.
51 Dan mænngan dejtie bååstide Nasaretese dåeriedi, jïh eejhtegidie golteli. Tjidtjebe gaajhkem vaajmose vöörhki. 52 Jeesuse båarasåbpoe jïh væjsahkåbpoe sjïdti jïh Jupmelem jïh almetjidie geerjehti.