Jåhhan volverimmie

Prievieh tjïjhtje åålmegidie

Prievie Efesosese

¹ Tjaelieh Efesosen åålmegen eengkelasse: Naemhtie dïhte jeahta gie syhtjegidie åelkies gïetesne steereminie, gie tjïjhtje tjoevkejuelkiej gaskesne vaadtsehtjeminie: ² Daajram guktie datne barkeminie jïh baaverdeminie jïh man gaarsjehke leah jïh guktie ih bahhas almetjh gaarsjelh. Datne gïehtjedamme dejtie gïeh jiehtieh apostelh maaje eah leah. Datne guarkeme dah slognestæjjine leah. ³ Datne gaarsjehke jïh jïjnjem gaarsjelamme mov gaavhtan. Ih leah aajhpehtovveme.

⁴ Daan gielhtie datnem laajhtam: datne dov voestes gieriesvoetem laahpeme. ⁵ Mujhtieh gusnie datne aerebe lih jïh jarkelh jïh darjoeh dam maam aerebe darjoejih! Jis ih jarkelh, dellie båatam jïh dov tjoevkejuelkiem vaaltam. ⁶ Datnem hov garmerdem juktie datne Nikodemosen almetji dahkojde væssjohth guktie manne dejtie væssjohtem.

⁷ Datne gie govlh, goltelh dellie maam Voejkene åålmegidie jeahta! Dïhte gie vitnie, dam baajem jieleden moereste byöpmedidh, moereste mij Jupmelen Paradijsesne tjåadtjoeminie.

Prievie Smyrnase

⁸ Tjaelieh Smyrnan åålmegen eengkelasse:

Naemhtie dïhte soptseste gie voestes jïh minngemes, dïhte gie jaameme jïh jealajamme: ⁹ Manne dov vaejvide daajram, jïh man giefie leah – mohte ræjhkoes leah. Jïh manne daajram guktie dah gïeh jiehtieh sijjieh juvdeladtjh, datnem nïerredehtieh. Dah eah leah juvdeladtjh, mohte Satanen synagoge. ¹⁰ Aellieh båetije vaejveste bïllh! Bahha edtja muvhtide dijjeste faangkegåatan beelhkedh guktie galkede gïehtjelovvedh jïh luhkie biejjieh vaejviedidh. Årroeh jaahkoles jaememen raajan, jïh dellie manne jieleden vitneme-vïerem dutnjien vadtam.

¹¹ Datne gie govlh, goltelh maam Voejkene åålmegidie jeahta! Dïhte gie vitnie, ij galkh mubpien aejkien jaemedh.