Lávlut
1 David ja tempelbálvalusa jođiheaddjit mearridedje Asafa, Hemana ja Jedutuna bártniid čuojahit profehtalaš lihkahusain lyra, hárppa ja symbálaid. Dás logahallojuvvojit dat olbmát geat biddjojuvvojedje dan bálvalussii.
2 Asafa bártniin Sakkur, Josef, Netanja ja Asarela. Sin jođihii Asaf gii profehtalaš lihkahusain čuojahii gonagasa rávvagiid mielde.
3 Jedutuna guhtta bártni ledje Gedalja, Jisri, Jesaja, Šimi, Hašabja ja Mattitja. Sin jođihii sin áhčči Jedutun gii profehtalaš lihkahusain čuojahii lyra ja máinnui ja rámidii Hearrá.
4 Hemana bártnit ledje Bukkia, Mattanja, Ussiel, Šubael, Jerimot, Hananja, Hanani, Eliata, Giddalti, Romamti Eser, Jošbekaša, Malloti, Hotir ja Mahasiot. 5 Sii buohkat ledje Hemana, gonagasa oaidni, bártnit. Sutnje Ipmil lei lohpidan stuorra fámu, ja dan dihte son attii sutnje njealljenuppelohkái bártni ja golbma nieidda. 6 Sin jođihii sin áhčči, go sii doaimmahedje bálvalusa Hearrá viesus lávlumiin ja čuojahemiin symbálaid, hárppaid ja lyraid gonagasa rávvagiid mielde.
7 Ovttas fulkkiideasetguin geat buohkat ledje oahpahuvvon lávlut Hearrá gudnin, sii ledje oktiibuot guoktečuođigávccilogigávcci. 8 Sii buohkat, sihke nuorat ja boarrásat, sihke meaštárat ja álggahallit, vuorbádedje iežas bálvalusvuoru.
9 Vuosttaš vuorbi bođii Josefii gii lei Asafa sogas, su bártniide ja fulkkiide, oktiibuot guoktenuppelohkásii. Nubbin šattai Gedalja oktan bártniidisguin ja fulkkiidisguin, oktiibuot guoktenuppelohkái. 10 Goalmmádin šattai Sakkur oktan bártniidisguin ja fulkkiidisguin, oktiibuot guoktenuppelohkái. 11 Njealját vuorbi bođii Jisrii, su bártniide ja fulkkiide, oktiibuot guoktenuppelohkásii. 12 Viđádin šattai Netanja oktan bártniidisguin ja fulkkiidisguin, oktiibuot guoktenuppelohkái. 13 Guđádin šattai Bukkia oktan bártniidisguin ja fulkkiidisguin, oktiibuot guoktenuppelohkái. 14 Čihččedin šattai Jesarela oktan bártniidisguin ja fulkkiidisguin, oktiibuot guoktenuppelohkái. 15 Gávccádin šattai Jesaja oktan bártniidisguin ja fulkkiidisguin, oktiibuot guoktenuppelohkái. 16 Ovccádin šattai Mattanja oktan bártniidisguin ja fulkkiidisguin, oktiibuot guoktenuppelohkái. 17 Logádin šattai Šimi oktan bártniidisguin ja fulkkiidisguin, oktiibuot guoktenuppelohkái. 18 Oktanuppelogádin šattai Asarel oktan bártniidisguin ja fulkkiidisguin, oktiibuot guoktenuppelohkái. 19 Guoktenuppelogát vuorbi bođii Hašabjai, su bártniide ja fulkkiide, oktiibuot guoktenuppelohkásii. 20 Golbmanuppelogádin šattai Šubael oktan bártniidisguin ja fulkkiidisguin, oktiibuot guoktenuppelohkái. 21 Njealljenuppelogádin šattai Mattitja oktan bártniidisguin ja fulkkiidisguin, oktiibuot guoktenuppelohkái. 22 Vihttanuppelogát vuorbi bođii Jerimotii, su bártniide ja fulkkiide, oktiibuot guoktenuppelohkásii. 23 Guhttanuppelogát vuorbi bođii Hananjai su bártniide ja fulkkiide, oktiibuot guoktenuppelohkásii. 24 Čiežanuppelogát vuorbi bođii Jošbekašai, su bártniide ja fulkkiide, oktiibuot guoktenuppelohkásii. 25 Gávccinuppelogát vuorbi bođii Hananii, su bártniide ja fulkkiide, oktiibuot guoktenuppelohkásii. 26 Ovccinuppelogát vuorbi bođii Mallotii, su bártniide ja fulkkiide, oktiibuot guoktenuppelohkásii. 27 Guoktelogát vuorbi bođii Eliatai, su bártniide ja fulkkiide, oktiibuot guoktenuppelohkásii. 28 Guoktelogivuosttaš vuorbi bođii Hotirii, su bártniide ja fulkkiide, oktiibuot guoktenuppelohkásii. 29 Guokteloginubbi vuorbi bođii Giddaltii, su bártniide ja fulkkiide, oktiibuot guoktenuppelohkásii. 30 Guoktelogigoalmmát vuorbi bođii Mahasiotii, su bártniide ja fulkkiide, oktiibuot guoktenuppelohkásii. 31 Guokteloginjealját vuorbi bođii Romamti Eserii, su bártniide ja fulkkiide, oktiibuot guoktenuppelohkásii.