Soahteveaga ja čearddaid oaivámuččat
1 Dás leat logahallojuvvon israellaččaid sohkaoaivámuččat, duháha- ja čuohtásaoaivámuččat ja hoavddat geat bálvaledje gonagasa ja atne fuola soahteveagajuhkosiin. Dát juhkosat bálvaledje vurrolagaid mánu ain hávil, ja guđege juhkosis ledje guokteloginjealljeduhát olbmá.
2 Vuosttaš juhkosa mii bálvalii vuosttaš mánus, jođihii Jišbaal, Sabdiela bárdni; su juhkosis ledje guokteloginjealljeduhát olbmá. 3 Son lei Peresa soga olmmoš, ja vuosttaš mánus son lei iežas juhkosis buot oaivámuččaid hoavda.
4 Ahoahlaš Dodai jođihii dan juhkosa mii bálvalii nuppi mánus; su juhkosis ledje guokteloginjealljeduhát olbmá, ja Miklot lei okta jođiheddjiin.
5 Benaja, bajimusbáhppa Jojada bárdni, jođihii dan juhkosa mii bálvalii goalmmát mánus; su juhkosis ledje guokteloginjealljeduhát olbmá. 6 Benaja lei okta dan golmmalogi soahtesáŋgáris. Go son šattai dan golbmalohkása oaivámužžan, de su juhkosa jođiheaddjin šattai su bárdni Ammisabad.
7 Njealjádin, njealját mánus, lei Asael, Joaba viellja, ja su maŋŋil su bárdni Sebadja; su juhkosis ledje guokteloginjealljeduhát olbmá.
8 Viđádin, viđát mánus, lei oaivámužžan Šamhut, Seraha soga olmmoš; su juhkosis ledje guokteloginjealljeduhát olbmá.
9 Guđádin, guđát mánus, lei tekoahlaš Ira, Ikkeša bárdni; su juhkosis ledje guokteloginjealljeduhát olbmá.
10 Čihččedin, čihččet mánus, lei peletlaš Heles, Efraima čeardda olmmoš; su juhkosis ledje guokteloginjealljeduhát olbmá.
11 Gávccádin, gávccát mánus, lei husalaš Sibbekai, Seraha soga olmmoš; su juhkosis ledje guokteloginjealljeduhát olbmá.
12 Ovccádin, ovccát mánus, lei anatotlaš Abieser, Benjamina čeardda olmmoš; su juhkosis ledje guokteloginjealljeduhát olbmá.
13 Logádin, logát mánus, lei netofalaš Mahrai, Seraha soga olmmoš; su juhkosis ledje guokteloginjealljeduhát olbmá.
14 Oktanuppelogádin, oktanuppelogát mánus, lei piratonlaš Benaja, Efraima čeardda olmmoš; su juhkosis ledje guokteloginjealljeduhát olbmá.
15 Guoktenuppelogádin, guoktenuppelogát mánus, lei netofalaš Heldai, Otniela soga olmmoš; su juhkosis ledje guokteloginjealljeduhát olbmá.
16 Israela čearddaid oaivámuččat: Rubena čeardda oaivámuš lei Elieser, Sikri bárdni, Simeona čeardda oaivámuš lei Šefatja, Maaka bárdni, 17 Levi čeardda oaivámuš lei Hašabja, Kemuela bárdni, Arona soga oaivámuš lei Sadok, 18 Juda čeardda oaivámuš lei Elihu, Davida viellja, Isaskara čeardda oaivámuš lei Omri, Mikaela bárdni, 19 Sebulona čeardda oaivámuš lei Jišmaja, Obadja bárdni, Naftali čeardda oaivámuš lei Jerimot, Asriela bárdni, 20 Efraima čeardda oaivámuš lei Hosea, Asasja bárdni, Manasse nuppi čeardabeale oaivámuš lei Joel, Pedaja bárdni, 21 Manasse nuppi čeardabeale oaivámuš, dan mii lei Gileadis, lei Jiddo, Sakarja bárdni, Benjamina čeardda oaivámuš lei Jaasiel, Abnera bárdni, 22 ja Dana čeardda oaivámuš lei Asarel, Jerohama bárdni. Dát ledje Israela čearddaid oaivámuččat.
23 David ii lohkan daid geat ledje vuollil guoktelogijahkásaččat; sii ledje eatnat, danin go Hearrá lei lohpidan dahkat israellaččaid eatnagin dego almmi násttit. 24 Joab, Seruja bárdni, lei gal álggahan lohkama, muhto ii ollašuhttán dan, danin go Ipmila moarri deaividii Israela. Dan dihte álbmoga olmmošlohku ii leat čállojuvvon gonagas Davida muitalusaid girjái.
25 Asmavet, Adiela bárdni, gozihii gonagasa vuorkkáid, ja Jonatan, Ussia bárdni, gozihii daid vuorkkáid mat ledje meahcis, gávpogiin, giliin ja ladnetoartnain. 26 Esri, Keluba bárdni, gozihii bealdobargiid, 27 ramalaš Šimi viidnegárddiid, šefamlaš Sabdi viidnevuorkkáid, 28 gederlaš Baal Hanan Šefela oliivamuoraid ja meahccefiikonmuoraid ja Joaš oljorádjosiid. 29 Saronlaš Šitrai gozihii stuorraomiid mat guhto Saronis, ja Šafat, Adlaja bárdni, stuorraomiid mat guhto legiin, 30 ismaellaš Obil kamelaid, meronotlaš Jehdeja áseniid 31 ja hagarlaš Jasis smávvaomiid. Sii buohkat ledje gonagas Davida opmodaga goziheaddjin.
32 Davida ráđđeaddin lei su áhči viellja Jonatan, jierpmálaš olmmái ja gonagasa čálli, ja gonagasa bártniid bagadeaddjin lei Jehiel, Hakmona bárdni. 33 Maiddái Ahitofel lei gonagasa ráđđeaddin, ja ereklaš Hušai lei gonagasa lagamus olmmái. 34 Ahitofela maŋŋil ráđđeaddin leigga Jojada, Benaja bárdni, ja Ebjatar. Gonagasa soahteveagaoaivámužžan lei Joab.