Isaskara sohka
1 Isaskara njeallje bártni ledje Tola, Pua, Jašub ja Šimron. 2 Tola bártnit ledje Ussi, Refaja, Jeriel, Jahmai, Jibsam ja Samuel. Sii ledje bearrašiiddiset oaivámuččat ja jálus soahteolbmát. Davida áigge sin lohku lei guoktelogiguokteduhát guhttačuođi. 3 Ussi bárdni lei Jisrahja, ja su bártnitgis Mikael, Obadja, Joel ja Jiššia. Dát viđas ledje buohkat bearrašiiddiset oaivámuččat. 4 Sohkalogahallamiid mielde sin sogain ledje golbmalogiguhttaduhát soahteolbmá; sis ledje oainnat ollu áhkát ja mánát. 5 Maiddái eará isaskarlaččat ledje jálus soahteolbmát. Sohkalogahallamiin sii ledje oktiibuot gávccilogičiežaduhát olbmá.
6 Benjamina golbma bártni ledje Bela, Beker ja Jediael. 7 Bela bártnit ledje Esbon, Ussi, Ussiel, Jerimot ja Iri; dát viđas ledje bearrašiiddiset oaivámuččat ja jálus soahteolbmát. Sohkalogahallamiin sii ledje guoktelogiguokteduhát golbmaloginjeallje olbmá. 8 Bekera bártnit ledje Semira, Joaš, Elieser, Eljoenai, Omri, Jeremot, Abia, Anatot ja Alemet. Buot dát ledje Bekera bártnit, 9 bearrašiiddiset oaivámuččat ja jálus soahteolbmát. Sohkalogahallamiid mielde sii ledje guoktelogiguokteduhát guoktečuođi olbmá. 10 Jediaela bárdni lei Bilhan, ja Bilhana bártnit ledje Jeuš, Benjamin, Ehud, Kenaana, Setan, Taršiš ja Ahišahar. 11 Buot dát Jediaela bártnit ledje bearrašiiddiset oaivámuččat ja jálus soahteolbmát. Sin nális ledje čiežanuppelohkáiduhát guoktečuođi soahteolbmá. 12 Šufam ja Hufam ledje Ira bártnit, ja Hušim lei Ahera bárdni.
13 Naftali bártnit ledje Jahasiel, Guni, Jeser ja Šallum. Sii ledje Bilha nális.
14 Manasse bártnit geaid su aramealaš liigeáhkká riegádahtii, ledje Asriel ja Makir gii šattai Gileada áhččin. 15 Makir válddii áhkkán Hufama ja Šufama oappá gean namma lei Maaka. Makira nubbi bárdni lei Selofhad, geasa riegádedje dušše nieiddat. 16 Maaka, Makira áhkká, riegádahtii bártni ja gohčodii su Perešin; Pereša vielja namma lei Šereš, ja su bártnit ledje Ulam ja Rekem. 17 Ulama bárdni lei Bedan. Dát lei Gileada, Makira bártni, Manasse áddjuba, nálli. 18 Su oabbá Hammoleket riegádahtii Išhoda, Abiesera ja Mahla. 19 Šemida bártnit ledje Ahjan, Šekem, Likhi ja Aniam.
20 Efraima bárdni lei Šutelah, su bárdni Bered, su Tahat, su Elada, su Tahat, 21 su Sabad ja su Šutelah. Efraima bártnit ledje maiddái Eser ja Elad. Soai gottáhalaiga muhtun gatlaš olbmáide geat ledje riegádan dan eatnamis, go soai leigga vuolgán rievidit sin omiid. 22 Sudno áhčči Efraim moraštii bártnisguoktá guhká, ja su fuolkkit bohte jeđđet su. 23 De son fas veallái áhkáinis gii šattai áhpeheapmin ja riegádahtii bártni. Efraim bijai bárdnái namman Beria, dainna go son lei riegádan su bearraša lihkuhisvuođa áigge. 24 Su nieida lei Šeera gii huksii Vuolit ja Bajit Bet-Horona ja Ussen Šeera. 25 Beria bárdni lei Refah, su Rešef, su Telah, su Tahan, 26 su Ladan, su Ammihud, su Elišama, 27 su Nun ja su Josua. 28 Sin opmodagat ja ássanbáikkit ledje Betel ja dan birasbáikkit, nuortan Naaran, oarjin Geser ja dan birasbáikkit ja vel Sikem ja dan birasbáikkit gitta Aja ja dan birasbáikkiid rádjái. 29 Manasse čearda hálddašii Bet-Šeana, Taanaka, Megiddo ja Dora ja buot daid birasbáikkiid. Dáin gávpogiin ásai Josefa, Israela bártni, nálli.
30 Ašera bártnit ledje Jimna, Jišva, Jišvi ja Beria. Sin oabbá lei Serah. 31 Beria bártnit ledje Heber ja Malkiel gii šattai Birsajita áhččin. 32 Heber sahkanahtii Jafleta, Šemera ja Hotama. Sin oabbá lei Šua. 33 Jafleta bártnit ledje Pasak, Bimhal ja Ašvat. 34 Šemera bártnit ledje Rohga, Hubba ja Aram. 35 Su vielja Hotama bártnit ledje Sofah, Jimna, Šeleš ja Amal. 36 Sofaha bártnit ledje Suah, Harnefer, Šual, Beri, Jimra, 37 Beser, Hod, Šamma, Šilša, Jitran ja Beera. 38 Jetera bártnit ledje Jefunne, Pispa ja Ara. 39 Ulla bártnit ledje Arah, Hanniel ja Risja. 40 Buot dát ledje Ašera nális, bearrašiiddiset oaivámuččat, jálus válljosoahteolbmát, njunnošat oaivámuččaid gaskkas. Sohkalogahallamiid mielde Ašera čearddas ledje guoktelogiguhttaduhát soahteolbmá.