1 Gehččet man stuorra ráhkisvuođa Áhčči lea midjiide čájehan: Mii beassat gohčoduvvot Ipmila mánnán, ja su mánát mii maid leat. Máilbmi ii dovdda min, danne go dat ii dovdda su. 2 Ráhkkásiiddán, dál mii leat Ipmila mánát, muhto ii leat velá boahtán albmosii manin mii šaddat. Dan mii diehtit ahte go son almmustuvvá, de mii šaddat su láhkásažžan, danne go mii beassat oaidnit su dakkárin go son lea. 3 Juohkehaš gii bidjá dán doaivvu Kristusii, buhtista iežas, nugo son lea buhtis.
4 Juohkehaš gii sudduda, rihkku maiddái lága, danin go suddu lea Ipmila lága rihkkun. 5 Dii diehtibehtet ahte son almmustuvai vai son váldá eret min suttuid, ja su siste ii leat suddu. 6 Gii bissu su siste, ii suddut. Dat gii sudduda ii leat oaidnán su iige dovdda su.
7 Mánážiiddán, allos oktage din čádjidahtto. Dat gii dahká Ipmila dáhtu, lea vanhurskkis, nugo Kristus lea vanhurskkis. 8 Dat gii sudduda lea beargalaga mánná, danne go beargalat lea suddudan álggu rájes. Muhto aiddo danin Ipmila Bárdni bođii máilbmái, vai son dahká duššin beargalaga daguid.
9 Ii oktage gii lea riegádan Ipmilis, suddut, danin go Ipmila gilvagat bissot su siste. Son ii sáhte suddudit, danin go son lea riegádan Ipmilis. 10 Dan láhkái šaddá almmusin geat leat Ipmila mánát ja geat beargalaga mánát: Dat gii bargá vuoigatmeahttumit, ii gula Ipmilii, iige dat gii ii ráhkis vieljas.
Vieljalaš ráhkisvuohta
11 Dát lea dat sáhka maid lehpet gullan álggu rájes: Mii galgat ráhkistit guhtet guimmiideamet. 12 Mii eat oaččo leat dego Kain, Bahá mánná, gii gottii vieljas. Manne son gottii vieljas? Danne go su dagut ledje bahát, muhto su vielja dagut ledje vuoigatlaččat.
13 Vieljažiiddán, allet ovddoš jos máilbmi din vašuha. 14 Mii ráhkistit vieljaideamet, ja das mii diehtit ahte leat sirdojuvvon jápmimis eallimii. Dat gii ii ráhkis vieljas, bissu jápmima válddis. 15 Juohkehaš gii vašuha vieljas, lea sorbmejeaddji, ja dii diehtibehtet ahte ii ovttage olmmošgoddis leat agálaš eallin iežas siste. 16 Das mii leat oahppan dovdat ráhkisvuohta, go Jesus attii heakkas min ovddas. Maiddái mii leat geatnegasat addit heaggamet vieljaideamet ovddas. 17 Jos muhtun geas lea buot maid son dán máilmmis dárbbaša, oaidná vieljas gillámin váilli, muhto dahppá sus váimmu, mo dalle Ipmila ráhkisvuohta bissu su siste?
18 Mánážiiddán, allot ráhkistehko guoros sániiguin, muhto daguiguin ja duohtavuođas. 19 Dalle mii ipmirdit ahte duohtavuođa lea mis, ja mii sáhttit su ovddas oadjudit iežamet váimmu, 20 jos dat min sivaha. Ipmil lea stuorit go min váibmu ja diehtá buot.
21 Ráhkkásiiddán, jos min váibmu ii min sivat, de mii sáhttit roahkkadit lahkonit Ipmilii. 22 Ja maid ihkinassii mii átnut, dan mii oažžut sus, danne go mii doallat su báhkkomiid ja dahkat dan mii lea su miela mielde.
23 Dát lea su báhkkon: Mii galgat oskut su Bárdnái Jesus Kristusii ja ráhkistit guhtet guimmiideamet, nugo son lea min gohččon. 24 Gii doallá Ipmila báhkkomiid, dat bissu Ipmila siste, ja Ipmil bissu su siste. Ja ahte son bissu min siste, dan mii diehtit Vuoiŋŋas gean son lea addán midjiide.