Nubbi Muitalusaid girji

Jošafat Juda gonagassan

¹ Asa maŋŋil gonagassan šattai su bárdni Jošafat. Son nannii iežas saji Israela vuostá. ² Son bijai soahteolbmáid buot Juda ladnegávpogiidda ja oaivámuččaid Judai ja daidda Efraima gávpogiidda maid su áhčči Asa lei váldán. ³ Hearrá lei Jošafatiin, danne go son vádjolii seammá geainnu maid su áhčči álggus lei vádjolan. Son ii bálvalan Baal-ipmiliid, ⁴ muhto bálvalii áhčis Ipmila ja doalai su báhkkomiid iige dahkan nugo israellaččat. ⁵ Hearrá nanosmahtii Jošafata gonagasválddi. Juda olbmot bukte sutnje attáldagaid, ja son oaččui stuorra riggodaga ja gudni. ⁶ Roahkkadit son vádjolii Hearrá geainnu, ja son jávkadii Judas oaffarbáikkiid ja Ašera-čuolddaid.

⁷ Goalmmát ráđđenjagistis Jošafat vuolggahii muhtun stuorráidis Juda gávpogiidda oahpahit. Sii ledje Ben-Hajil, Obadja, Sakarja, Netanel ja Mika. ⁸ Ovttas singuin son vuolggahii levilaččaid Šemaja, Netanja, Sebadja, Asaela, Šemiramota, Jonatana, Adonia ja Tobia, ja velá báhpaid Elišama ja Jorama. ⁹ Go sii oahpahedje Judas, de sis lei mielde Hearrá láhkagirji. Sii johte buot Juda gávpogiin ja oahpahedje álbmoga.

¹⁰ Juda birasálbmogiin šattai dakkár Hearrá ballu ahte dat eai duostan soahtat Jošafatiin. ¹¹ Filistalaččat bukte Jošafatii attáldagaid ja vearrun silbba. Arabialaččat bukte sutnje smávvaomiid, čiežaduhát čiežačuođi viercca ja čiežaduhát čiežačuođi bohká. ¹² Jošafat šattai ain fámoleabbon, ja son huksii Judai ladniid ja vuorkágávpogiid. ¹³ Sus ledje jođus stuorra ladnebarggut Juda gávpogiin, ja Jerusalemis sus lei jálus soahteveahka ¹⁴ mii lei ordnejuvvon juhkosiidda sogaid mielde. Judas ledje alimus oaivámužžan Adna geas ledje golbmačuođiduhát soahteolbmá, ¹⁵ Johanan geas ledje guoktečuođigávccilogiduhát soahteolbmá, ¹⁶ ja Amasja, Sikri bárdni, gii bálvalii Hearrá eaktodáhtolaččat guovttečuođiduhát soahteolbmá oaivámužžan. ¹⁷ Benjamina čearddas lei Eljada, rohkkes soahteolmmái. Sus ledje guoktečuođiduhát olbmá geaid vearjun lei dávgi ja galba. ¹⁸ Su lassin lei Josabad geas ledje čuođigávccilogiduhát olbmá gearggusin soahtat. ¹⁹ Ná ollu gonagasa bálvalusas ledje soahteolbmát, ja dasa lassin vel dat geaid gonagas lei bidjan ladnegávpogiidda miehtá Juda.