Jošafat bihtá vašálaččainis
1 Muhtin áiggi geažes moablaččat ja ammonlaččat ja ovttas singuin muhtun meunlaččat soahttájedje Jošafatiin. 2 Jošafatii muitaluvvui: “Meara duohken Edomis lea boahtimin stuorra soahteveahka du vuostá. Dat lea juo Haseson Tamaris.” Haseson Tamar lea seammá go En-Gedi. 3 Dalle gonagas ballái ja jorgalii Hearrá beallái ja gulahii fásttu oppa Judai. 4 Juda olbmot čoagganedje jearrat neavvaga Hearrás. Buot Juda gávpogiin olbmot bohte rohkadallat Hearrá.
5 Jošafat čuoččastii Juda ja Jerusalema ássiid ovdii geat ledje čoagganan Hearrá tempela ođđa ovdašilljui, 6 ja dajai: “Hearrá, min áhčiid Ipmil! Don leat Ipmil gii ásat almmis ja ráđđet buot máilmmi riikkaid. Du gieđas lea fápmu ja váldi, iige oktage sáhte bihtit dus. 7 Don, min Ipmil, ádjet dán eatnama ássiid eret álbmogat Israela ovddas, ja addet dan agálaš áigái ustibat Abrahama nállái. 8 Dán eatnamii sii ásse, ja deike sii huksejedje du nama várás tempela, ja sii dadje: 9 ‘Jos min deaivida lihkuhisvuohta, ráŋggášteaddji miehkki, rohttudávda dahje nealgi, de mii čuoččastit dán tempela ovdii, du ovdii, danne go dát tempel lea du nama ássansadji. Du mii čuorvut heađisteamet, ja don gulat ja veahkehat min.’ 10 Dál deike leat boahtimin ammonlaččat, moablaččat ja Seirváriid olbmot. Don it suovvan israellaččaid mannat sin eatnamiid čađa dalle go ledje boahtimin Egyptas, muhto israellaččat garve sin eatnamiid eaige duššadan sin. 11 Dál sii áigot mávssahit midjiide nu ahte vigget ádjit min eret du iežat eatnamis maid don leat addán midjiide opmodahkan. 12 Min Ipmil, ráŋggáš don sin! Mii eat biđe dan stuorra soahteveagas mii falleha min, eatge dieđe maid galggašii dahkat. Dutnje mii geahččat.”
13 Oppa Juda álbmot čuoččui Hearrá muođuid ovddas, velá sin nissonat ja mánážatge. 14 Dalle Hearrá vuoigŋa devddii levilaš Jahasiela, go son lei čuožžumin gasku čoakkalmasa. Son lei Asafa soga olmmoš, Sakarja bárdni; su áddjá lei Benaja, su áhčči Jeiel ja su Mattanja. 15 Jahasiel dajai: “Gullet, oppa Juda álbmot, Jerusalema ássit ja gonagas Jošafat! Ná cealká didjiide Hearrá: Allet suorgan alletge bala dan stuorra soahteveagas, danne go dát soahti ii leat din, muhto Ipmila. 16 Mannet sin vuostá ihttin! Sii bohtet bajás Sisa vieltti, ja dii gávnnadehpet singuin dan ávžži gierragis mii lea Jeruela meahci ravddas. 17 Muhto allet soahttá. Čužžot fal jaska ja gehččet, mo Hearrá veahkeha din. Juda ja Jerusalema ássit, allet suorgan alletge bala, muhto mannet ihttin sin vuostá! Hearrá lea dinguin.” 18 Dalle Jošafat gopmirdii muođut eatnamii, ja maiddái buot Juda ja Jerusalema ássit luoitádedje eatnamii Hearrá muođuid ovdii rohkadallat su, 19 ja levilaččat Kehata sogas, Koraha maŋisboahttit, čuožžiledje ja máidno Hearrá, Israela Ipmila, hui alla jienain.
20 Árrat maŋit iđida sii vulge Tekoa meahci guvlui. Go sii ledje vuolgimin, de Jošafat loaiddastii ovdan ja dajai: “Gullet mu, Juda álbmot ja Jerusalema ássit! Luhttet Hearrái, Ipmilasadet, dalle ii oktage biđe dis. Luhttet su profehtaide, dalle didjiide geavvá bures.” 21 Go son lei ráđđádallan álbmogiin, de son bijai soahteveaga ovddabeallái lávluid geat bassi čikŋabiktasat gárvun galge máidnut Hearrá ja lávlut: “Giitet Hearrá, su árbmugasvuohta bistá agálaččat!”
22 Go lávlut ávvudišgohte ja máidnugohte Hearrá, de Hearrá moivii ammonlaččaid, moablaččaid ja Seirváriid olbmuid geat ledje vuolgán soahtat Judain, nu ahte sii vuoittáhalle. 23 Ammonlaččat ja moablaččat fallehedje Seirváriid olbmáid ja goddigohte sin. Go sii ledje duššadan Seira olbmuid, de sii goddigohte guhtet guimmiideaset. 24 Go Juda soahteolbmát bohte várddobáikái meahcceravdii ja gehčče vašálaččaid soahteveaga guvlui, de sii oidne doppe dušše gahččan olbmuid. Ii oktage lean beassan báhtui. 25 Jošafat ja su olbmát vulge rievidit ja gávdne hui ollu omiid, biergasiid, biktasiid ja divrras gálvvuid. Sii ožžo nu ollu sállaša ahte eai nagodan fievrridit dan eret. Rievideapmi bisttii golbma beaivvi, nu stuoris lei sálaš. 26 Njealját beaivvi sii čoagganedje Máidnunleahkái ja máidno doppe Hearrá. Dan dihte dat báiki gohčoduvvui Máidnunleahkin, ja danin dat gohčoduvvo veláge.
27 Juda ja Jerusalema olbmát máhcce, Jošafat njunnošis, Jerusalemii illudemiin ja ávvudemiin, danne go Hearrá lei časkán sin vašálaččaid. 28 Sii bohte Jerusalemii ja Hearrá tempelii, ja hárppat, lyrat ja dorvvet čudje. 29 Buot riikkat dohppehalle ballui go dat gulle, mo Hearrá lei soahtan Israela vašálaččaiguin. 30 Jošafata riikkas lei dál muossi, ja su Ipmil attii sutnje ráfi juohke guovllus.
31 Nu Jošafat ráđđii Juda. Son lei golbmalogiviđajahkásaš go šattai gonagassan, ja son ráđđii Jerusalemis guoktelogivihtta jagi. Su eadni lei Asuba, Šilhi nieida. 32 Jošafat vádjolii áhčis Asa luottaid iige spiehkastan dain, muhto dagai dan mii lei riekta Hearrá čalmmiin. 33 Dattetge oaffarbáikkit eai jávkaduvvon, iige álbmot vel bálvalan olles váimmus áhčiideaset Ipmila.
34 Mii muđui lea muitalit Jošafata áiggi dáhpáhusain, vuosttamuččas maŋimužžii, lea čállojuvvon Jehu, Hanani bártni, muitalussii mii lea váldojuvvon Israela gonagasaid muitalusaid girjái.
35 Maŋŋelis Juda gonagas Jošafat searvadii Israela gonagasain Ahasjain, vaikko Ahasja elii ipmilmeahttumit. 36 Jošafat searvadii suinna hukset skiippaid mat borjjastivčče Taršišii. Skiippat huksejuvvojedje Esjon-Geberis. 37 Dalle marešalaš Elieser, Dodava bárdni, einnostii Jošafatii: “Danin go don leat searvadan Ahasjain, de Hearrá cuvke dan maid leat huksen.” Ja skiippat cuovkanedje eaige ollen Taršišii.