Ávžžuhusat
1 Mun lean boahtimin dál goalmmát geardde din lusa. Juohke ášši galgá nannejuvvot guovtti dahje golmma duođašteaddji sániin. 2 Go mun ledjen din luhtte nuppe geardde, de mun nevvon sin geat ledje suddudan, ja dál go lean eret, mun neavvun sihke sin ja buot earáid: Go mun boađán, de in seastte din. 3 Dasgo dii gáibidehpet duođaštusa das ahte Kristus sárdnu mu bokte. Son ii leat vuoimmeheapme din vuostá, muhto čájeha iežas fámu din luhtte. 4 Son lei headju go russiinávlejuvvui, muhto Ipmila fámus son eallá. Mii leat maiddái heajut su siste, muhto mii eallit suinna din gaskkas Ipmila fámus.
5 Guorahallet iežadet, leago dis osku, geahččalehket iežadet! Ehpetgo dovdda ahte Jesus Kristus lea dis? Jos ehpet, de dii ehpet ceavzze geahččalusas. 6 Mun sávan ahte dii šaddabehtet fuobmát ahte mii leat ceavzán geahččalusas. 7 Mii rohkadallat Ipmila ahte dii ehpet dagaše maidege baháid, eat dan dihte go mii ieža livččiimet dohkálaččat, muhto vai dii dagašeiddet buriid. De oažžu orrut dego mii eat livčče ceavzán geahččalusas. 8 Dasgo mii eat sáhte dahkat maidege duohtavuođa vuostá, muhto dušše duohtavuođa beale. 9 Mii illudit go mii leat heajut ja dii lehpet gievrrat. Aiddo dan mii rohkadallat ahte dii šattašeiddet ollisin. 10 Danne mun čálán dál juo, vai in dalle go lean boahtán diehko dárbbašivčče atnit dan válddi maid Hearrá lea addán munnje. Munhan galggan dainna ráhkadit inge gaikkodit.
Dearvvuođat
11 Maŋimustá, vieljažiiddán: Illudehket, váldet vuostá rávvagiid ja ávžžuhusaid ja lehket ovttamielagat ja soabalaččat, de ráhkisvuođa ja ráfi Ipmil lea dinguin. 12 Dearvvahallet guhtet guimmiideattet bassi cummáin. Buot bassi olbmot celket didjiide dearvvuođaid.
13 Hearrá Jesus Kristusa árbmu, Ipmila ráhkisvuohta ja Bassi Vuoiŋŋa servvolašvuohta lehkos dinguin buohkaiguin!