Maŋimuš áiggiid olbmot
1 Don fertet diehtit ahte maŋimuš beivviid bohtet váttis áiggit. 2 Dalle olbmot ráhkistit dušše iežaset ja ruđa, leat rábmát ja čeavlát, sii hiddjidit ja leat jeagoheamit vánhemiiddáseaset. Sii leat giitemeahttumat, ipmilmeahttumat, 3 ráhkismeahttumat ja soahpameahttumat, bahádallit, veahkaválddálaččat, goavit, buori vašuheaddjit, 4 behtolaččat, skuniheamit ja goarggastallit. Sii ráhkistit návddašemiid eambbo go Ipmila. 5 Sis lea gal ipmilbalolašvuođa hápmi, muhto sii biehttalit oskku fámu. Jorgal eret dakkár olbmuin! 6 Sii njáhket ruovttuide ja fillejit nissoniid geaid suttut losidahttet ja máŋggalágan anistumit dolvvodit, 7 ja geat álo leat miehtásat ođđa oahpaide, muhto eai goassege dovddiit duohtavuođa. 8 Nugo Jannes ja Jambres nággiiga Mosesa vuostá, nu dát olbmotge nággejit duohtavuođa vuostá. Sin árvvoštallannákca lea billašuvvan, sin osku ii gierdda geahččalusa. 9 Muhto dat ii menestuva sidjiide, dasgo sin jierpmehisvuohta šaddá buohkaide almmusin, nugo maiddái doid mielahisvuohta šattai.
Apostal ovdagovvan
10 Muhto don leat čuvvon mu oahpahusa, mu vádjolusa, mu viggamuša, mu oskku, mu guhkesmielalašvuođa, mu ráhkisvuođa ja mu gierdavašvuođa 11 dain doarrádallojumiin ja gillámušain maid mun vásihin Antiokias, Ikonionis ja Lystras. Makkár doarrádallojumiid mun lean gierdan! Ja buot dain Hearrá lea mu gádjon. 12 Muhto buohkat geat dáhttot eallit vuoigatlaččat Kristus Jesusis, šaddet doarrádallojuvvot. 13 Bahás olbmot ja beahttit ovdánit bahábussii, sii fillejit ja fillehallet. 14 Muhto biso don das maid leat oahppan. Donhan leat das vissis. Muitte geat du oahpaheaddjit leat leamaš, 15 ja don leat juo mánnávuođa rájes dovdan bassi čállagiid. Dat máhttet addit dutnje viisodaga, nu ahte don bestojuvvot oskku bokte Kristus Jesusii. 16 Juohke čála maid Ipmila Vuoigŋa lea duddjon, lea ávkkálaš oahpahussan, cuiggodussan, neavvan ja bagadussan eallimii mii dohkke Ipmilii. 17 Dalle Ipmila olmmoš šaddá ollisin ja dohkálažžan buot buriid daguide.