Viđát Mosesgirji

Gielddos moraštanmeanut

¹ Dii lehpet Hearrá, Ipmileattet, mánát. Go lehpet morašteamen jábmi, de ehpet oaččo nádjat iežadet liikki ehpetge ráhket oaivvi. ² Diihan lehpet Hearrái, Ipmilasadet, basuhuvvon álbmot, ja Hearrá lea válljen din mávssolaš opmodahkanis ovdalii buot eará máilmmi álbmogiid.

Buhtis ja buhtismeahttun eallit

³ Allet bora maidege mii lea fasttášahtti. ⁴ Dát leat dat njealjejuolggat eallit maid oažžubehtet borrat: Vuoksá, sávza ja gáica, ⁵ sarvva, gasella, ruoigu, báktebohkká, meahcivuoksá, antilohpa, meahcisávza ⁶ ja buot eará njealjejuolggat eallit main leat guovttesuorat guohpirat ja mat smirezastet. Daid elliid dii oažžubehtet borrat. ⁷ Muhto dáid elliid dii ehpet oaččo borrat, vaikko dat smirezastet dahje vaikko dain leat guovttesuorat guohpirat: Kamela, njoammil ja báktemievri, danne go dat gal smirezastet muhto dain eai leat guohpirat. Daid dii galgabehtet atnit buhtismeahttumin. ⁸ Buhtismeahttumin galgabehtet atnit maiddái spiinni mas gal leat guovttesuorat guohpirat muhto mii ii smirezastte. Dii ehpet oaččo borrat daid elliid bierggu ehpetge guoskat daid jápma gorudiidda.

⁹ Dii oažžubehtet borrat buot čáhceelliid main leat veavssit ja čuopmasat, ¹⁰ muhto ehpet dakkáriid main eai leat veavssit eaige čuopmasat; daid dii galgabehtet atnit buhtismeahttumin.

¹¹ Dii oažžubehtet borrat buot buhtis lottiid, ¹² muhto dát leat dakkárat maid ehpet oaččo borrat: Goaskin, čuonjáráhtogoaskin, skávžáráhtogoaskin, ¹³ suorrehávka ja buot eará hávkkat, ¹⁴ buot garjálottit, ¹⁵ struhcca, skuolfi, skávli ja buot fállit, ¹⁶ cihceskuolfi, lidnu ja bealljeloađgu, ¹⁷ pelikána, čiekčá ja skárfa, ¹⁸ stoarka ja buot háigirat, vuoktaloddi ja náhkkesoadjá.

¹⁹ Buot smávva soajálaččaid dii galgabehtet atnit buhtismeahttumin; daid dii ehpet oaččo borrat. ²⁰ Buot buhtis soajálaččaid dii gal oažžubehtet borrat.

²¹ Dii ehpet oaččo borrat ieš jápmán ealli. Addet dan borramuššan vierrásii gii ássá din gávpogiin, dahje vuvdet olgoeatnama olbmui. Dii lehpet Hearrái, Ipmilasadet, basuhuvvon álbmot.

Allet vuošša gihci eatnis mielkkis.

Logádasláhka

²² Bidjet jagis jahkái sierranassii logádasaid buot šattusteattet, buot das mii šaddá din bealdduin. ²³ Dii galgabehtet borrat gortni, viinni ja oljju logádasaid ja stuorraomiideattet ja smávvaomiideattet vuosttašriegádeddjiid Hearrá, Ipmilat, muođuid ovddas dan báikkis maid son vállje namas ássanbáikin. Nu dii oahppabehtet ballat álo Hearrás, Ipmilisttádet. ²⁴ Muhto jos mátki lea guhkki, nu ahte dii ehpet veaje guoddit dohko dan mainna Hearrá, din Ipmil, lea buressivdnidan din, danne go dii ássabehtet guhkkin dan báikkis maid Hearrá, din Ipmil, lea válljen namas ássanbáikin, ²⁵ de vuvdet buot ja dolvot ruđaid dan báikái maid Hearrá, din Ipmil, vállje. ²⁶ Doppe dii sáhttibehtet oastit maid dáhttubehtet, gusaid ja sávzzaid, viinni ja vuollaga, buot masa háliduvvabehtet. Dollet dasto mállásiid Hearrá, Ipmileattet, muođuid ovddas, ja illudehket oktan bearrašiinnádet. ²⁷ Don it oaččo vajáldahttit levilaččaid du gávpogiin, danin go sis ii leat oassi iige opmodat nugo dis.

²⁸ Juohke goalmmát jagi dii galgabehtet buktit logádasaid jagi šattus gávpogiidda ja bidjat daid vuorkái. ²⁹ De besset boahtit ja boradit gallás sihke levilaččat geat eai leat ožžon oasi eaige opmodaga nugo dii, ja vierrásat, oarbásat ja leaskkat geat ásset din gávpogiin. Dalle Hearrá, din Ipmil, buressivdnida din buot das maid dahkabehtet.