Viđát Mosesgirji

Álgošaddu ja logádasat

¹ Go lehpet boahtán dan eatnamii maid Hearrá, din Ipmil, addá didjiide opmodahkan, ja go lehpet váldán dan oapmineattet ja ássan dohko, ² de váldet álgošattuid das maid rádjabehtet dan eatnamis, eatnamis maid Hearrá, din Ipmil, lea addán didjiide. Bidjet daid veaddelihttái ja mannet dan báikái maid Hearrá, din Ipmil, lea válljen namas ássanbáikin. ³ Mannet dan báhpa lusa gii dan áiggi lea bálvalusas, ja dadjet sutnje: “Odne mun duođaštan Hearrá, du Ipmila, muođuid ovddas ahte lean ollen dan eatnamii maid son vuordnumiin lohpidii min áhčiide addit midjiide.” ⁴ Báhppa galgá váldit vuostá veaddelihti ja bidjat dan Hearrá áltára ovdii.

⁵ Celket dasto Hearrá, Ipmileattet, muođuid ovddas: “Mu áhčči lei heađálaš aramealaš gii uhca jovkkošiinnis fárrii Egyptii ja ásai dohko vierisin, ja son šattai doppe fámolaš, gievrras ja stuorra álbmogin. ⁶ Muhto egyptalaččat meannudedje minguin bahás, sorde min ja bidje min garra bargui. ⁷ Dalle mii čuorvvuimet Hearrái, áhčiideamet Ipmilii, ja son gulai min čuorvasiid ja oinnii min heađi, váivvi ja áŧestusa. ⁸ Hearrá buvttii min Egyptas gievrras ja bajiduvvon gieđain ja hirbmatlaš fámuin, mearkkaiguin ja oavdduiguin. ⁹ Son buvttii min dán báikái ja attii midjiide dán eatnama mas golgá mielki ja honnet. ¹⁰ Dál mun lean buktán dán eatnama álgošattuid maid don, Hearrá, addet munnje.”

Bidjet gore Hearrá, Ipmileattet, muođuid ovdii ja luoitádehket rohkadallat su. ¹¹ Illudehket buot dan buori dihte maid Hearrá, din Ipmil, lea addán didjiide ja din bearrašiidda. Maiddái levilaččat ja vierrásat geat ásset din gaskkas, ožžot illudit ovttas dinguin.

¹² Juohke goalmmát jagi, logádasaid jagi, dii galgabehtet addit logádasaid buot šattuin levilaččaide ja vierrásiidda, oarbásiidda ja leaskkaide. Go lehpet dahkan dan ja buohkat din gávpogiin leat beassan borrat gallás, ¹³ de celket Hearrá, Ipmileattet, muođuid ovddas: “Mun lean dál buktán viesustan buot mii lei basuhuvvon Hearrái, ja addán dan levilaččaide, vierrásiidda, oarbásiidda ja leaskkaide, aiddo nugo don leat gohččon mu dahkat. Mun in leat rihkkon inge vajáldahttán ovttage du báhkkomiin. ¹⁴ Mun in leat borran maidege logádasain go mus lei moraš, in leat guoskan daidda go ledjen buhtismeahttun inge leat addán dain maidege jábmiide. Mun lean leamaš gulolaš Hearrái, Ipmilasan, mun lean dahkan buot maid don leat gohččon mu dahkat. ¹⁵ Geahča vulos almmis, bassi ássanbáikkistat, ja buressivdnit iežat álbmoga Israela ja eatnama maid leat addán midjiide, nugo don vuordnumiin lohpidit min áhčiide, dán eatnama mas golgá mielki ja honnet.”

Hearrá ja Israela lihttu

¹⁶ Dán beaivvi Hearrá, din Ipmil, gohčču din doallat dáid lágaid ja njuolggadusaid. Dollet daid oskkáldasat oppa váimmus ja oppa sielus. ¹⁷ Dii lehpet odne duođaštan ahte Hearrá lea din Ipmil ja ahte dii áigubehtet vádjolit su geainnuid ja doallat su lágaid, báhkkomiid ja njuolggadusaid ja gullat su jiena. ¹⁸ Hearrá lea odne cealkán ahte dii lehpet su mávssolaš opmodat, nugo son lea didjiide lohpidan. Dollet buot su báhkkomiid, ¹⁹ ja son alida din badjel buot eará álbmogiid maid lea sivdnidan, vai dii rámidivččiidet su ja buvttášeiddet sutnje beakkálmasvuođa ja gudni. Dalle dii lehpet su bassi álbmot, nugo Hearrá lea lohpidan.