1 Mun lean oaidnán beaivváža vuolde bahá mii deaddá olbmo lossadit. 2 Ipmil addá olbmái riggodaga, opmodaga ja gudni, nu ahte sus ii leat mihkkege masa anistuvvat. Muhto Ipmil ii suova su návddašit dan, ja dan beassá návddašit vierroolmmoš. Dát lea duššálašvuohta ja bahás gillámuš.
3 Vaikko olmmái oččošii čuođi máná ja ealášii eatnat jagiid muhto ii gallánivčče buriiguin, man guhká dal juo elešge, iige oččoše oppa hávdádeamige, de mun dajan: Ovdaláigásaš ohki lea su lihkoleabbo. 4 Duššás dat boahtá ja seavdnjadassii manná, ja seavdnjadas gokčá dan nama, 5 ii dat leat oaidnán beaivváža iige diehtán maidege; muhto dat vuoiŋŋada buorebut go son. 6 Vaikko duot olmmái ealášii guovtte geardái duhát jagi, de son ii beasaše muosáhit ilu eallimisttis. Ja almma buohkat mannet ovttat sadjái?
7 Buot olbmo rahčamuš lea njálmmi várás,
almmatge dan anistupmi
ii goassege duhtaduvvo.
8 Mii buoretvuođaid lea viisás jalla ektui? Mii ávkkiid vártnuheapmái lea diehtit mo vádjolit rievttuid?
9 Buoret dat maid čalbmi oaidná
go dat maid hállu huovida.
Dátge lea duššálašvuohta ja biekka váinnuheapmi.
Lihkku ja lihkuhisvuohta
10 Buot mii lea, lea áigá juo ožžon nama, ja mii olmmoš lea, lea leamaš dovddus juo ovdal. Ii son sáhte mannat rievtti ovdii iežas gievrrabuin. 11 Mađe eambbo sánit, dađe eambbo duššálašvuohta. Mii ávkkiid das lea olbmui?
12 Gii diehtá mii olbmui lea ávkkálaš su oanehis ja duššálaš eallinbeivviid maid son golaha suoivana láhkái? Ja gii máhttá muitalit olbmui, mii boahtá su maŋŋil beaivváža vuolde?