Haman duššá
1 Gonagas ja Haman bođiiga dronnet Estera guossemállásiidda. 2 Go soai leigga juhkamin viinni, de gonagas jearai fas Esteris: “Maid don siđat, dronnet Ester? Mii lea du átnumuš? Vaikko bivddášit beali mu riikkas, de don oaččut dan.” 3 Dronnet Ester vástidii: “Jos mun lean du miela mielde, gonagas, ja jos dat orru du mielas buorre, de atte munnje mu heakka go mun sávan, ja suova mu álbmoga eallit, danin go dan mun ánun. 4 Mun ja mu álbmot leat vuvdojuvvon duššadeapmái, sorbmái ja heavahussii. Jos mii velá livččiimet vuvdojuvvon šlávvan, de mun in livčče jietnadan maidege, danin go dalle min áŧestus ii livčče leamaš mihkkege dakkáriid mainna livččii dárbbašan vuorjat gonagasa.”
5 Dalle gonagas Xerxes jearai dronnet Esteris: “Gii arvá dahkat dakkáriid? Gos son lea?” 6 Ester vástidii: “Dat vuostálasti ja vašálaš lea duot bahás Haman!” Dalle Haman suorganii, ja son doarggistišgođii gonagasa ja dronnega ovddas. 7 Gonagas čuožžilii moaris gaskan viidnejuhkama ja manai šloahta gilvvagárdái, muhto Haman bázii dasa rohkadallat dronnet Estera seastit su heakka, dasgo son ipmirdii ahte gonagas lei juo mearridan su vuorbbi.
8 Go gonagas máhcai šloahta gilvvagárddis dan sálii gos guossemállásat dollojuvvojedje, de Haman lei bálkestahttán gopmut dan beaŋkka badjel man alde Ester lei čohkkámin. Dalle gonagas dajai: “Áiggutgo don velá dahkat veahkaválddi dronnegii, go mun ieš lean dás!” Illá gonagas lei geargan dadjamis dán, go bálvaleaddjit juo gokče Hamana ámadaju. 9 Harbona, okta dain hoavvaolbmáin geat bálvaledje gonagasa, dajai: “Hamana viesu guoras lea harcamuorra, vihttalogi állana alu. Dan Haman divttii cegget Mordekaja várás, gii oktii dagai gonagassii stuorra bálvalusa.” Dalle gonagas dajai: “Harccastehket su dasa!” 10 Easkka go Haman lei harccastuvvon harcamurrii maid son ieš lei diktán cegget Mordekaja várás, de lotkkodii gonagasa moarri.