Israela vuoitolávlla
1 Dalle Moses ja israellaččat lávlo Hearrái dán máidnunlávlaga:
Mun lávllun Hearrái,
son lea stuoris ja allat;
heasttaid ja olbmáid
son suhppii merrii.
2 Hearrá lea mu givrodat ja fápmu,
son gájui mu.
Son lea mu Ipmil,
su mun máinnun,
son lea mu áhči Ipmil,
su gudnin mun lávllun.
3 Hearrá lea soahteolmmái,
Hearrá lea su namma.
4 Farao soahtevovnnaid
ja soahteveaga
son suhppii merrii,
su válljoolbmát
heavvanedje Ruksesmerrii.
5 Čiekŋalasat gokče sin,
sii vudjo čiekŋalassii dego geađggit.
6 Du olgeš giehta, Hearrá,
imašlaš ja gievra,
du olgeš giehta, Hearrá,
cuvke vašálačča.
7 Allatvuođastat don časkkát
vuostálastiidat.
Don divttát iežat moari buollit,
dat loaktá sin dego oalggaid.
8 Don bossot, ja čáhci čoagganii,
bárut čužžo čopman,
čiekŋalasa rávnnjit stirdo
gasku meara.
9 Vašálaš dajai:
“Mun doarridan ja jovssan sin,
mun juogán sállaša
ja duhtadan iežan hálu.
Mun rohtten miehkkán,
mun duššadan sin.”
10 Don bosádit vuoiŋŋanasainat,
ja áhpi govččai sin,
veagalaš čáziide
sii vudjo dego ladju.
11 Hearrá, gii lea du láhkásaš
ipmiliid gaskkas?
Gii lea nugo don,
hearvásmahttojuvvon ja bassi,
máidnojuvvon
hirbmatlaš daguidat dihte,
don guhte dagat ovddolaš daguid?
12 Don geigejit olgeš gieđa,
ja eanan njielastii sin.
13 Oskkáldasvuođastat
don oahpistit álbmoga
maid ledjet lonistan,
fámuinat don láidejit dan
bassi ássanbáikásat.
14 Álbmogat doarggistedje
go gulle dan,
Filistea ássit dohppehalle ballui.
15 Dalle Edoma oaivámuččat
suorganedje,
Moaba veagalaččat doarggistedje,
buot Kanaana ássit
roahppánedje balus.
16 Sii suorganedje ja šadde ballui,
du gieđa fámus sii jávohuvve
dego geađgi,
dan botta go du álbmot,
Hearrá, lea mannan meaddel,
dan botta go álbmot
maid leat alccesat vuoitán,
lea mannan meaddel.
17 Don doalvvut sin gosa sii galget,
don gilvvát sin dan várrái
mii lea du opmodat,
dan báikái maid don, Hearrá,
leat dahkan iežat ássanbáikin,
bassibáikái maid du gieđat
leat vuođđudan.
18 Hearrá lea gonagas
álo ja agálaččat!
19 Go farao heasttat, su soahtevovnnat ja vovdnaolbmát ledje mannan merrii, de Hearrá máhcahii čáziid sin ala, muhto israellaččat manne goikása mielde meara rastá.
20 Profehtanisson Mirjam, Arona oabbá, válddii rumbbu gihtii, ja buot nissonat čuvvo su, derpe rumbbuid ja dánso.
21 Mirjam jođihii lávlaga:
Lávlot Hearrái,
son lea stuoris ja allat,
heasttaid ja olbmáid
son suhppii merrii!
Vádjoleapmi meahcis álgá
22 Moses doalvvui israellaččaid Ruksesmearas Šura meahccái. Go sii ledje vádjolan doppe golbma beaivvi eaige lean gávdnan čázi, 23 de sii bohte Marai, muhto sii eai sáhttán juhkat Mara čázi, go dat lei rihča. Dan dihte dat báiki gohčoduvvui Maran. 24 Álbmot nimmorii Mosesa vuostá ja dajai: “Maid mii dál juhkat?” 25 Moses čuorvvui Hearrá, ja Hearrá čájehii sutnje muorrabihtá. Dan son bálkestii čáhcái. Go son dagai nu, de čáhci šattai njálggisin. Doppe Hearrá attii álbmogii lága ja vuoigatvuođa, ja doppe son geahččalii sin. 26 Son celkkii: “Jos don guldalat dárkilit maid mun sártnun ja dagat dan mii lea riekta mu čalmmiin, doahttalat mu báhkkomiid ja doalat buot mu lágaid, de mun vealtadan du buot dain buozalvasain maiguin mun ráŋggáštin egyptalaččaid. Dasgo mun lean Hearrá, du buorideaddji.”
27 Dasto sii bohte Elimii. Doppe ledje guoktenuppelohkái čáhceádjaga ja čiežalogi pálbmamuora. Sii luoitaledje dohko čáhcegáddái.