Esekiel

Kerubat

¹ Mun oidnen ahte kerubaid oivviid bajábealde lei gomuvuohta, ja dan badjelis oidnui juoga mii šlienjui dego safira ja lei oaidnit dego truvdnu. ² Hearrá celkkii dan olbmái gii lei gárvodan beallemasbiktasiid: “Mana kerubaid vuollái jorriid gaskii, váldde čorpmaid dievva hilaid kerubaid gaskkas ja biđge daid miehtá gávpoga.” Ja olmmái vulggii go mun geahčadin. ³ Kerubat čužžo tempela máttabealde, go olmmái manai daid gaskii. Balva devddii siskkit ovdašilju, ⁴ ja Hearrá hearvásvuohta badjánii kerubaid badjelis ja sirdásii tempela uvssa lusa. Balva devddii oppa tempela, ja Hearrá hearvásvuođa báitin devddii ovdašilju. ⁵ Kerubaid soajáid šuvva gullui gitta olggut ovdašilju rádjái, veagalažžan dego Buotveagalaš Ipmila jietna. ⁶ Go son gohčui olbmá gii lei gárvodan beallemasbiktasiid, váldit dola jorriid gaskkas, kerubaid gaskkas, de olmmái manai ja čuoččastii jorri báldii. ⁷ Keruba geigii gieđa dola guvlui mii lei buollimin kerubaid gaskkas, válddii ášu ja bijai dan dan olbmá čorpmaide gii lei gárvodan beallemasbiktasiid. Olmmái válddii dola ja vulggii. ⁸ Mun oidnen ahte kerubaid soajáid vuolde ledje dego olbmogieđat.

⁹ Mun oidnen ahte kerubaid bálddas ledje njeallje jorri, okta guđege keruba buohta, ja jorrit leđgo dego krysolihtta. ¹⁰ Buot njeallje ledje ovttalágánat, guđesge ledje dego guokte jorri ruossalassii. ¹¹ Dat máhtte johtit buot njealji guvlui, eaige dat dárbbašan jorggihit jođedettiin. Dat manne dohko man guvlui kerubaid ámadadju lei, eaige dat jorggihan manadettiin. ¹² Miehtá kerubaid rupmaša, sealggi, gieđaid ja soajáid ledje čalmmit, nu maiddái miehtá njealji jorri. ¹³ Mun gullen ahte jorrit gohčoduvvojedje namain “galgal”. ¹⁴ Guđege kerubas ledje njeallje ámadaju. Vuosttaš dain lei keruba ámadadju, nubbi olbmo ámadadju, goalmmát ledjona ámadadju ja njealját goaskima ámadadju. ¹⁵ Kerubat loktanedje áibmui. Dat ledje seammá heakkalaččat maid mun ledjen oaidnán Kebarjohkagáttis. ¹⁶ Go kerubat johte, de jorrit johte daid bálddas, ja go dat bajidedje soajáid vai besset loktanit áibmui, de jorrit bisso daid mielde. ¹⁷ Go kerubat orustedje, de orustedje jorritge, ja go kerubat loktanedje eatnamis, de loktanedje jorritge oktan daiguin, danne go heakkalaččaid vuoigŋa lei jorriin.

Hearrá hearvásvuohta vuolgá tempelis

¹⁸ Hearrá hearvásvuohta vulggii tempela uvssa luhtte ja bisánii kerubaid bajábeallái, ¹⁹ ja kerubat bajidedje soajáid ja loktanedje eatnamis. Mun oidnen go dat manne, ja jorrit loktanedje oktanaga daiguin. Dat bisánedje Hearrá tempela nuortapoartta uksaráiggi ovdii, ja daid bajábealde lei Israela Ipmila hearvásvuohta. ²⁰ Dat ledje seammá heakkalaččat maid mun ledjen oaidnán Israela Ipmila truvnnu vuolde Kebarjoga gáttis, ja mun ipmirdin ahte dat ledje kerubat. ²¹ Juohke ovttas ledje njeallje ámadaju ja njeallje soajá, ja soajáid vuolde ledje dego olbmogieđat. ²² Daid ámadajut ledje seammalágánat go dat ámadajut maid mun ledjen oaidnán Kebarjoga gáttis. Juohke okta dain manai dan guvlui gosa ámadaju lei.