Esekiel

¹ Olmmái doalvvui mu sisa tempelhállii. Son mihtidii uksabealláid, ja dat ledje goabbáge guhtta állana gasu. Nu gassagat ledje uksabeallát. ² Uksaráigi lei logi állana govddu ja seainnit dan goappáge bealde ledje vihtta állana govddu. Son mihtidii tempelhálla, ja dat lei njealljelogi állana guhku ja guoktelogi állana govddu.

³ Son manai siskkimuš latnjii ja mihtidii uksabealláid, ja dat ledje guokte állana gasu. Uksaráigi lei guhtta állana ja seainnit dan goappáge bealde čieža állana govddu. ⁴ Son mihtidii lanja mii lei tempelhálla siskkobealde, ja dat lei guoktelogi állana guhku ja guoktelogi állana govddu. Son dajai munnje: “Dát lea basimus boaššu.”

⁵ Son mihtidii tempela seainni, ja dat lei guhtta állana asu. Gilgahuksehus oppa tempela birra lei njeallje állana govddu. ⁶ Gilgahuksehusa lanjat ledje golmma gearddis. Oalgelanjaid seainni mielde tempela vuostá ledje steallit giddenráiggiid sadjái; tempela seainnis eai ožžon leat giddenráiggit. ⁷ Lokta mas ledje oalgelanjat, govddui bajás guvlui. Tempelis lei nappo lokta bajás guvlui ja dan birra. Mađe badjeleappos lokta lei tempela vuostá, dađe govddit dat lei. Vuolimus gearddis sáhtii goargŋut bajimus geardái gaskkamus gearddi čađa. ⁸ Mun oidnen ahte tempel lei aládasa alde. Oalgelanjaid muvravuođđu lei olles stákku asu, guhtta állana. ⁹ Oalgeviesu olgoseaidni lei vihtta állana asu. Gáhta tempela oalgelanjaid ¹⁰ ja gámmáriid gaskkas tempela goappáge bealde lei guoktelogi állana govddu. ¹¹ Oalgeviesus ledje uvssat gáhta guvlui, okta davás guvlui ja okta lulás guvlui. Stealli gáhta guoras lei vihtta állana govddu.

Oarjjabeale visti

¹² Visti mii lei rabas šilju guoras dan oarjjabealde, lei čiežalogi állana govddu, ja dan seainnit ledje vihtta állana asu. Vistti guhkkodat lei ovccilogi állana. ¹³ Olmmái mihtidii tempela, ja dat lei čuođi állana guhku. Rabas šillju oktanaga visttiin ja dan seinniiguin lei čuođi állana guhku. ¹⁴ Tempela nuorttabeale ovdaseaidni oktanaga rabas šiljuin lei čuođi állana. ¹⁵ Rabas šilju duogábealde olmmái mihtidii vistti guhkkodaga ja dan goappáge beale stelliid, ja guhkkodat lei oktiibuot čuođi állana.

Tempela siski

Tempela siskkit oasis ja ovdalanjas ¹⁶ lei rohpi. Ihkkoniin lei čeargalas ja golmmadásat gárpmat. Buot seinniin lei muorraskoađas láhttis gitta ihkkoniid rádjái, main ledje luŋkkát. ¹⁷ Muorraskoađas olii gitta uvssa badjeravdda rádjái. Tempela siste ja olggobealde miehtá buot seinniid, sihke siskkobeale ja olggobeale seinniid, ledje sajit ¹⁸ main ledje čuhppojuvvon kerubat ja pálmmat, vurrolagaid ain keruba ja pálbma. Guđege kerubas ledje guokte ámadaju, ¹⁹ olbmo ámadadju nuppi pálmma guvlui ja ledjona ámadadjugis nuppi pálmma guvlui. Tempela seinniin ledje dievva diekkár govat. ²⁰ Láhtti rájes uvssa badjeravdda rádjái ledje čuhppojuvvon kerubat ja pálmmat. ²¹ Tempelhállas ledje njealječiegat uksabeallát. Bassi boaššu ovddas oidnui ²² dego áltár mii lei dahkkojuvvon muoras. Dat lei golbma állana alu, guokte állana guhku ja guokte állana govddu. Das ledje čiehkafiellut, ja dan juolgi ja siiddut ledje muoras. Olmmái dajai munnje: “Dát lea dat beavdi mii lea Hearrá muođuid ovddas.” ²³ Sihke tempelhállas ja bassi boaššus ledje guokte uvssa. ²⁴ Goappáge uvssas ledje guokte uksabeali maid sáhtii máhcastit rabas. ²⁵ Tempelhálla uvssat ledje hervejuvvon čuhppojuvvon kerubaiguin ja pálmmaiguin seammá láhkái go seainnit. Olgun ovdalanja ovddas lei muoras dahkkojuvvon goavdi. ²⁶ Ovdalanjas goappáge beale seainnis ledje čeargalasihkkonat ja čuhppojuvvon pálmmat, ja nu lei maiddái tempela siidolanjain ja govddiin.