Vuoigŋa doalvu Esekiela Jerusalemii
1 Lei guđát jahki, guđát mánu viđát beaivi. Mun ledjen čohkkámin iežan viesus, ja Juda vuorrasat ledje mu luhtte. Dalle mu dohppii Hearrá giehta. 2 Mun oidnen muhtuma geas lei olbmo hápmi. Alimiin vulos guvlui son lei oaidnit dego dolla, ja su alimiin bajás guvlui oidnui dego báitin mii šealggui vilges golli láhkái. 3 Son geigii juoidá mii lei gieđa hápmásaš, ja dohppii mu vuovttaide, ja vuoigŋa loktii mu eatnama ja almmi gaskii ja doalvvui mu Ipmila oainnáhusas Jerusalemii. Vuoigŋa doalvvui mu siskkit ovdašilju davvepoartta uksaráiggi ovdii, dasa gokko lea govva mii boktá Hearrá moari. 4 Ja das lei Israela Ipmila hearvásvuohta, seammalágánin go mun ledjen oaidnán dan leagis.
5 Son celkkii munnje: “Olmmoš, geahča davás guvlui.” Nu mun gehččen davás guvlui ja oidnen poartta davábealde áltára, ja poartaráiggi guoras lei govva mii lei boktán Hearrá moari. 6 Son celkkii munnje: “Olmmoš, oainnátgo maid sii dahket? Israellaččat dahket dáppe nu fasttes daguid ahte mun ferten gáidat guhkás iežan bassibáikkis. Muhto don beasat oaidnit vel vearrát fastivuođaid.”
7 Son doalvvui mu ovdašilju uksaráiggi ovdii, ja mun oidnen muvrras ráiggi. 8 Son dajai munnje: “Olmmoš, gaikko muvrra ja mana čađa.” Mun gaikon muvrra, ja mun oidnen uvssa. 9 Son dajai: “Mana sisa ja geahča daid eartnjehas fastivuođaid maid sii doppe dahket.” 10 Mun mannen sisa, ja doppe mun oidnen buotlágáš fasttes diŋggaid, njoammuid ja šibihiid govaid, ja buot israellaččaid eahpeipmilgovaid mat ledje sárgojuvvon seinniide birra buot. 11 Govaid ovddas čužžo čiežalogi Israela vuorrasa, ja sin gaskkas čuoččui Jaasanja, Šafana bárdni. Juohkehaččas lei suovaslihtti gieđas, ja njálggahájat suovvasiid balva loktanii áibmui. 12 Dasto son celkkii munnje: “Olmmoš, oainnátgo maid Israela vuorrasat dahket seavdnjadasas, iešguhtege iežas eahpeipmila gámmáris? Sii dadjet: Hearrá ii oainne min, Hearrá lea hilgon dán eatnama.” 13 Son celkkii munnje: “Don beasat oaidnit sin dahkamin vel vearrát fastivuođaid.”
14 Son doalvvui mu dan poartta uksaráiggi ovdii mii lea davás guvlui ja mas beassá Hearrá tempelii. Doppe čohkkájedje muhtun nissonat ja čirro Tammusa. 15 Son celkkii: “Olmmoš, oainnátgo? Don beasat oaidnit fastivuođaid, vel vearrábuid.”
16 Son doalvvui mu Hearrá tempela siskkit ovdašilljui. Das, Hearrá tempela uksaráiggi guoras, ovdalanja ja áltára gaskkas, ledje sullii guoktelogivihtta olbmá. Sii ledje selggiid Hearrá tempelii, ja sin muođut ledje nuorttas guvlui. Sii gopmárdalle nuorttas guvlui ja rohkadalle beaivváža. 17 Son celkkii munnje: “Olmmoš, oainnátgo? Iige Juda álbmogii leat galle dahkat dákkár fastivuođaid dáppe, sii dahket maiddái veahkaválddi miehtá eatnama ja leat máŋgii moaráhuhttán mu. Geahča, mo sii nahkehit viidnemuora oavssi njuni ovdii! 18 Mun áiggun meannudit suhtustan, mun in árkkálmastte inge árpmit sin. Vaikko sii čurvvošedje munnje man alla jienain ihkinassii, de mun in gula sin.”