Ukraina flaggRedder Bibelen liv i Ukraina?
Finn ut mer
Gå til forsiden

Hosea

10

Israel duššá

1 Israel lei šattolaš viidnemuorra

mii šaddadii valjis šaddosiid.

Mađe eanet šaddosiid dat šaddadii,

dađe eambbo dat huksii áltáriid.

Mađe buorebut dan eatnamii geavai,

dađe goargadeabbon

dat dagai geađgebácciidis.

2 Dan váibmu lei behtolaš,

dál dasa mávssahuvvo:

Hearrá molle dan áltáriid

ja cuvke dan geađgebácciid.

3 Dál sii dadjet:

“Mis ii leat šat gonagas,

danne go mii eat ballan Hearrás.

Muhto maid gonagas ávkkuhivččii,

maid son sáhtášii dahkat min ávkin?

4 Sárdnot guoros sániid,

vurdnot vearreváliid, dahket lihtuid!”

Duopmu bohciida dego mirkkolaš šattut

bealddu jorgunluottain.

5 Samaria ássit

ballet Bet-Avena gálbbi dihte.

Olbmot dollet dasa morašdoaluid

ja dan báhpat váidalit,

danin go sin hearvásvuohta

lea dolvojuvvon eret.

6 Maiddái dat dolvojuvvo Assyriai

attáldahkan stuorragonagassii.

Efraim oažžu heahpada,

Israel heahpanaddá áigumušainis.

7 Samaria duššá, dan gonagas lea

dego smáhkku čáhcegierragis.

8 Bahávuođa oaffarbáikkit, Israela suddu,

duššaduvvojit.

Bastilislánját ja gáskálasat bohciidit

sin áltáriidda.

Olbmot dadjet váriide: “Gokčet min!”

ja dieváide: “Gahččet min ala!”


9 Israel, don leat suddudan

gitta Gibea beivviid rájes,

ja dan don ain dagat.

Muhto soahti olaha din Gibeas

ja duššada vearredahkkiid.

10 Mun bagadan du

nugo anán vuoigadin,

ja álbmogat čoagganit du vuostá,

go don ráŋggáštuvvot guovttegeardásaččat

iežat suttu dihte.

11 Efraim lei hárjehuvvon guigu,

gearggus ráidnet gortniid.

Mun sesten dan čáppa čeabeha,

muhto dál mun geassastan dan.

Juda ferte jorgut eatnama,

Jakob šaddá dan hárvet.

12 Gilvet vanhurskkisvuođa,

čogget oskkáldasvuođa,

jorgot alcceseattet ođđa eatnama!

Dál lea áigi ohcat Hearrá, vai son boahtá

ja arvviha din badjelii vanhurskkisvuođa.

13 Dii lehpet jorgon ipmilmeahttunvuođa,

láddjen bahávuođa,

borran giellása šattuid.

Dii lehpet dorvvastan

soahtevovnnaidasadet

ja ollu soahteolbmáidasadet.

14 Soahtešlápma gullo din álbmoga gasku,

ja buot din ladnit billistuvvojit,

seammá láhkái go Šalman billistii

Bet-Arbela soađi beaivvi.

Doppe eatnit cuvkejuvvojedje

oktan mánáideasetguin.

15 Nu mun dagan didjiide, Israela álbmot,

din stuorra bahávuođa geažil.

Iđedisgukso áigge Israela gonagas duššá.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.