Ukraina flaggRedder Bibelen liv i Ukraina?
Finn ut mer
Gå til forsiden

Jesaja

11

Vuoigatlaš ráđđejeaddji

1  Isaja jalgŋás bohciida ihtu,

vesá ihtá su ruohttasiin.

2 Hearrá vuoigŋa orru su badjelis,

viissisvuođa ja jierpmi vuoigŋa,

ráđi ja gievravuođa vuoigŋa,

dieđu ja Hearrá balu vuoigŋa.

3 Son ii dubme dan mielde

maid su čalmmit oidnet,

son ii cealkke duomu dan mielde

maid su bealjit gullet.


4 Son dubme heajuid vuoigatlaččat

ja cealká rivttes duomu eatnama gefiide.

Son časká veahkaválddálaččaid

njálmmis rissiin,

son goddá ipmilmeahttumiid

baksamiiddis vuoiŋŋanasain.

5 Vanhurskkisvuohta lea

su alimiid boagán,

oskkáldasvuohta

su spirraliid geazaldat.


6 Dalle gumpe orru lábbá luhtte

ja leopárda goarjada gihci bálddas.

Gálbi ja ledjon guhtot ovttas,

ja smávva bártnáš guođoha daid.

7 Gussa ja guovža guhtot searválaga,

daid čivggat livvadit bálddalagaid,

ja ledjon borrá suoinni nugo vuoksá.

8 Njammimánná duhkoraddá

gearbmaša bieju bálddas,

uhca mánáš geige gieđa

mirkogearbmaša bidjui.

9 Ii oktage vahágahte

iige billis maidege

oppa mu bassi váris,

danin go Hearrá dovdamuš

deavdá eatnama

nugo čáhci deavdá meara.

10 Dan beaivvi Isaja ruohtas čuožžila soahteleavgan álbmogiidda, ja álbmogat mannet su lusa, ja báiki gos son lea, gudnejahttojuvvo.

Hearrá diktá iežas álbmoga máhccat

11 Dan beaivvi Hearrá bajida fas gieđa vai beassá oastit friddjan iežas álbmoga bázahasa Assyrias ja Egyptas, Patrosis ja Nubias, Elamis ja Sinearis, Hamatis ja riddoeatnamiin.

12 Son bajida soahteleavgga álbmogiidda,

čohkke Israela bieđganan olbmuid

ja Juda hádjánan ealu

eatnama njealji čiegas.

13 Dalle Efraima gáđašvuohta jávká

ja Juda vašálašvuohta nohká.

Efraim ii gáđaš Juda

iige Juda vašut Efraima.

14 Sii fallehit filistalaččaid vieltti oarjin,

ovttas sii spedjet nuortaálbmoga.

Edom ja Moab gártet sin gihtii,

ammonlaččat šaddet sin vuollásažžan.

15 Hearrá goikada Egypta mearraluovtta

ja časká Eufrata garra riđuin,

son juohká eanu čiežan jogažin

ja doalvu sin rastá goikejulggiid.

16 Su álbmoga bázahassii,

daidda geat leat ain Assyrias,

šaddá geaidnu

nugo šattai Israelii dan beaivvi

go sii vulge Egyptas.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.