Nubia áirasat
1 Vuoi du, šuvaideaddji soajáid eanan,
don mii leat Nubia jogaid don bealde!
2 Don vuolggahat áirasiid rastá ábi,
vuolggahat sin papyrusfatnasiiguin
čáziid rastá.
Máhccet, dii johtilis áirasat!
Máhccet allašattot, šelgesliikkat
álbmogeattet lusa,
álbmoga mas olbmot ballet viidát,
gievrras ja vuoitilis álbmoga lusa
man eatnama čađa jogat golget.
3 Eatnanriikka ássit,
dii buohkat geaid ássansadji
lea eatnama alde,
gehččet go soahteleavga
bajiduvvo váriide,
guldalehket go dorve čuodjá!
4 Ná Hearrá lea sárdnon munnje:
“Jávohaga mun geahčan viesustan,
go áibmu libaida beaiveboalddáhahkan,
dahje go suoldni gahččá valjit rádjanáiggi.”
5 Ovdal lájuid,
go liđiid áigi lea nohkan
ja lieđđi šaddan ládda muorjin,
de viidnemuora suorggit
čuhppojuvvojit niibbiin
ja vesát gaikojuvvojit luovos
ja bálkestuvvojit eret.
6 Buot guđđojuvvo
váriid gazzalottiid ja meahcielliid biebmun.
Daid guoras ádjánit
geasi boralottiid moađit,
dálvet daid bálddas eloštit
buot eatnama eallit.
7 Boahtá áigi go Hearrái, Almmiveagaid Ipmilii, buktá attáldagaid allašattot, šelgesliikkat álbmot mas olbmot ballet viidát, gievrras ja vuoitilis álbmot man eatnama čađa jogat golget. Dan álbmoga attáldagat buktojuvvojit baikái maid basuha Hearrá, Almmiveagaid Ipmila, namma: Sionvárrái.