Siona boahtteáigi
1 Sátni Juda ja Jerusalema hárrái. Jesaja, Amosa bártni, oainnáhus.
2 Boahtá áigi goas Hearrá
tempelvárri čuožžu nanusin,
váriin alimussan, alážiin bajimussan,
ja álbmogat márret dohko,
3 Eatnat olbmuid čearddat johttájit
ja dadjet:
“Bohtet, vulgot Hearrá várrái,
Jakoba Ipmila vissui.
Son oahpista midjiide geainnuidis,
mii dáhttut vádjolit su bálgáid,
danin go Hearrá láhka vuolgá Sionis,
Hearrá sátni Jerusalemis.”
4 Son dubme álbmogiid,
cealká duomu eatnat olbmuid čearddaide.
Sii dáhkot mihkiideaset plogaávjun
ja sáittiideaset viidnegárdeniibin.
Álbmot ii šat lokte miehki
álbmoga vuostá,
dat eai šat oahpahala soahtat.
5 Jakoba mánát,
bohtet, vádjolehkot Hearrá čuovggas!
Hearrá beaivi
6 Hearrá, don leat hilgon iežat álbmoga,
leat hilgon Jakoba mánáid.
Sin eatnama dievva
leat nuortti einnosteaddjit,
mearkačilgejeaddjit dego Filisteas –
juohke sajis vierroolbmot!
7 Eatnama dievva lea silba ja golli,
dan dávviriin ii leat mihkkege meriid.
Eatnama dievva leat heasttat,
dan soahtevovnnain ii leat mihkkege meriid.
8 Eatnama dievva leat eahpeipmilat,
olbmot luoitádit gieđaideaset duoji ovdii,
dan ovdii maid leat ráhkadan
iežaset gieđaiguin.
9 Dan dihte olmmoš vuoliduvvo,
dan dihte son šaddá čippostit.
– Hearrá, ale atte sidjiide ándagassii!
10 Mana bávtti sisa, čiehkát muldii,
báhtar Hearrá hirpmus fámus,
su alla hearvásvuođas!
11 Čeavlás olbmot šaddet
vuolidit čalmmiid,
olbmo čeavláivuohta sojahuvvo,
dan beaivvi aivvefal Hearrá lea allat.
12 Hearrá, Almmiveagaid Ipmila, beaivi
časká buot dasa mii lea čeavlái ja allat,
buot dasa mii allánaddá
ja goarggasmuvvá,
13 buot Libanona sederiidda,
allagiidda ja stuorráide,
ja buot Bašana áikkaide,
14 buot alla váriide
ja buot ceaggájeaddji dieváide,
15 dat časká buot alla toartnaide
ja buot ceakkomuvrraide,
16 buot Taršiša-skiippaide
ja buot hearvás fatnasiidda.
17 Dalle olbmo goargatvuohta sojahuvvo
ja su čeavláivuohta soardašuvvá.
Dan beaivvi aivvefal Hearrá lea allat,
18 ja eahpeipmilat duššaduvvojit oalát.
19 Báhtarehket bákteráiggiide
ja eananbiejuide
Hearrá hirpmus fámus
ja su alla hearvásvuođas,
go son čuožžila suorggahit eatnama.
20 Dan beaivvi olbmot bálkestit
golleipmiliiddiset ja silbaipmiliiddiset
maid sii ieža leat ráhkadan
ja dasto luoitádan daid ovdii.
Sii bálkestit daid buovnnjahiidda
ja girdisáhpániidda
21 ja báhtarit skoaruide ja báktelomiide
Hearrá hirpmus fámus
ja su alla hearvásvuođas,
go son čuožžila suorggahit eatnama.
22 Allet luohte olbmui,
son lea dušše vuoiŋŋanas.
Man veara son lea?